Kashitiko ka bu 10

Mosesa waile kuli Falo na kukamuleka ngwendi kakelukila lalo kuli ikeye. Oloni simbu kanda eluke, Mosesa walekele Falo ngwendi: ‘Hakati ka butsiki bana ba bantwatwa ba banalume boshe ba baka-Ijipiti batsa, kushangumukila kuli muna Falo kutwala na kuli muna ndungo.’

Yehova walekele baIsalele ngwendi babwahese byakulya bya kulitila. Wabalekele ngwendi: ‘Tsiyeni manga wa nkomba uje ali na mwaka umo nambe muna membe na kushamwina maninga abo ku bibuliko bya bikolo. Co mwoce situ na kuilya na makende a kujeneka musima. Co lalo muzale masanda ku mendi na kulibwahesela kuya mwafwa lelo butsiki njimipatula.’ Acisinganyekeni mubabwahelelele baIsalele mubazibile ou muzimbu.

Hakati ka butsiki, kangelo ka Yehova waile ha njibo na njibo mu Ijipiti. Bana ba bantwatwa boshe baje bakele mu binjibo bije kubakele maninga ha bibuliko bya bikolo batsile. Oloni kangelo katsiile bana baje bakele mu binjibo bije bibakele maninga ha bibuliko bya bikolo. Baka-Ijipiti ba tuhutu na baka-kufuka boshe batsisile bana babo. Oloni naumo wahi watsile ku bana ba baIsalele.

Falo nendi watsisile munendi wa ntwatwa wa munalume. Ha simbu ei, Falo kakaluwisile lalo mbunge yendi. Ngeci, haje bene walekele Mosesa na Aloni ngwendi: ‘Tundeni muno mu lifuti. Yeni mukalemese Njambi yeni. Ambateni na bimuna beni.’

BaIsalele batundile mu Ijipiti kwesekesa na binaanga byabo na miyati yabo. Co buje butsiki kwakele lyezi lya ngonde. Banalume 600,000 hamolika na banakazi babangi na banike babangi batundile mu Ijipiti. Co lalo na banu bakwabo babangi baile na baIsalele mangana bakalemese Yehova. BaIsalele bapatukile oni mu bundungo.

BaIsalele bakele na kulinga cilika ca Paseka mwaka na mwaka mu kwanuka mwabapatwilile Yehova mu bundungo.