Mwene wa Isalele Wakulibanga

Yehova wanene baIsalele maako mangana babatwamenene, oloni ha simbu ei batondele mwene. Balekele Samwele ngwabo: ‘Miyati yoshe yatuzengeleka ili na bimyene. Netu tushaka mwene atutwamenene.’ Samwele kabwahelelele ha byuma bibalombelo, ngeci walombelele kuli Yehova. Co Yehova walekele Samwele ngwendi: ‘Keti yobe ibanabyana. Oloni banabyana yange. Baleke ngwobe basa kukala na mwene, oloni mwene akatonda byuma byabingi kuli bakebo.’ Nameme ngoco, banu bendekele ngwabo: ‘Embwe, yetu tutonda mwene.’

Yehova walekele Samwele ngwendi munalume wa lizina lya Saulu apwa mwene wakulibanga. Saulu mwaile na kusikama kuli Samwele mu Lama, Samwele wetilile mazi ha mutwe wa Saulu mu kumubwabesa kupwa mwene.

Mu kwita kwa simbu Samwele wasanene baIsalele mangana akubamwese mwene yabo wamuha. Oloni Saulu kubamuwanene. Kuma muzibuka kwakele ndi? Wabandele mu bitenga. Mubamuwanene bamunenele mukati ka mbunga. Saulu wapwile wamulaha manene kutubakana banu boshe, co wapwile wamubwa manene. Co Samwele wendekele ngwendi: ‘Ou ikeye yanangula Yehova.’ Banu batambekele ngwabo: ‘Mwene ayoye simbu yailaha!’

Hakulibanga, Saulu watolililile kuli Samwele na kwononoka Yehova. Oloni mu kwita simbu watengulukile. Cakumwenako, mwene kubamutabesele kwenyeka milambu. Litangwa limo, Samwele walekele Saulu amubandamene, oloni Samwele weshwalele kwija. Ngeci, Saulu wambatele milambu na kuyenyeka. Samwele walingile bika mwakuwanene Saulu nenyeka laja milambu? Samwele walekele Saulu ngwendi: ‘Unapandele kwononoka Yehova.’ Kuma Saulu walilongeseleko bimo ku kusebuka kwendi ndi?

Mu kwita kwa simbu, Saulu waile na kulwisa baAmaleke, co Samwele wamulekele ngwendi akanyongese baAmaleke boshe. Oloni Saulu katsiile mwene yabo Agagi. Ngeci, Yehova walekele Samwele ngwendi: ‘Saulu nanjikengesa nima, kesi na kunjitolilila.’ Samwele walizibile kubihya, co waile na kukaleka Saulu ngwendi: ‘Yehova angula mwene weka mwafwa unalikele kumwononoka.’ Co Samwele mwatengulukile ngwendi aye, Saulu wamukwatele, co mukundwilo wa mukanjo wa Samwele watabukile. Ngeci, Samwele walekele Saulu ngwendi: ‘Yehova natabula bumwene na kubutundisa kuli yobe.’ Yehova wanene bumwene ku munu uje wamuzemene na kumwononoka.