Yesu Angula Saulu

Saulu wapwile muka-Loma uje wasemukilile mu Tasasi. Wapwile Kafalisi uje wazibukile manene mashiko a baJuda, co wazindile baka-Kristu. Wakele na kukwata baka-Kristu ba banalume na ba banakazi ha binjibo byabo na kubatwala mu tumenga. Simbu imo wemanene kumukulo omwo cibunga ca banu catsiile Setefano ha kumwasha mamanya.

Saulu kakutile lika baka-Kristu bakele mu Jelusalema. Walombele kapilistu wahakamwa lisesa lya kuya ku Damasika mangana akakwate baka-Kristu baje bakeleko. Saulu mwakele muyehi na nganda, ceke camutwililile mu kukasumuna co wawililile hasi. Wazibile lijwi lije lyendekele ngwalyo: ‘Saulu, bika biuli na kunjiyandesela?’ Saulu wehwile ngwendi: ‘Yobe iya?’ Lije lijwi lyendekele ngwalyo: ‘Yange Yesu. Ya ku Damasika mangana bakakuleke biunapande kulinga.’ Haje bene Saulu wapwile kapuputwa, co bamukwatelelele ku liboko na kumutwala mu nganda.

Mu Damasika mwakele muka-Kristu wa kulongwa wa lizina lya Ananiyasi. Yesu walekele ou munalume mu cimona ngwendi: ‘Ya ku njibo ya Judasi ku ngila ibasana ngwabo Kusungama mangana ukaliwane na Saulu.’ Ananiyasi wendekele ngwendi: ‘Mwata, njizibuka byendi owo munalume. Ali na kwaka bandongesi bobe mu tumenga.’ Oloni Yesu wendekele ngwendi: ‘Ya lika. Njinangula Saulu mangana ambulule muzimbu waubwa ku mafuti amangi.’

Ananiyasi wawanene Saulu, co wamulekele ngwendi: ‘Saulu ndolome yange, Yesu nanjitumu ngwendi njikangwise mesho obe.’ Co haje bene Saulu washangumukile kumona lalo. Walilongesele bya Yesu na kupwa muka-kumukabangeya. Munima ya kumumbwitika na kupwa muka-Kristu, Saulu washangumukile kwambulwila mu masinagogi hamolika na baka-Kristu bakwabo. Acisinganyekeni lika mubakomokelele baJuda mubamwene Saulu alongesa bya Yesu! Bendekele ngwabo: ‘Kuma ou keti ikeye wakele na kukwata bandongesi ba Yesu ndi?’

Saulu wambulwilile banu ba mu Damasika ha myaka itatu. BaJuda bazindile Saulu, co bashakele kumutsiya. Oloni bandolome bazibile bibashakele kulinga baje baJuda, ngeci bamukwasele abomboloke. Bamwakele mu cizuma na kumusikumwisila mu mbengwa ije yakele ha cibumbe.

Saulu mwaile ku Jelusalema washakele kulikwatasana na bandolome, oloni bakele na kumutewa. Co kwakele ndongesi wa ngozi wa lizina lya Banabasi, watwalele Saulu ku tupositolo na kubalumbunwina ngwendi Saulu natenguluka mu busunga. Saulu washangumukile kwambulula muzimbu waubwa na ntwima hamolika na cikungulukilo mu Jelusalema. Mu kwita kwa simbu, banu bashangumukile kumusana ngwabo Paulu.