Yesu Asangula Lazalo

Yesu wakele na babusamba ba ha mbunge batatu baje bakele ku Bethani. Bapwile Lazalo na bandokazi bendi babali, Maliya na Matha. Litangwa limo Yesu mwakele musambwa lya Jodani, Maliya na Matha bamutuminine muzimbu wa kumuleka ngwabo: ‘Lazalo ali na kubinja manene. Tukulomba wije bwasi.’ Oloni Yesu kaile haje bene. Wacikele tahi matangwa abali asinoni walekele bandongesi bendi ngwendi: ‘Tuyeni ku Bethani. Lazalo nalala tulo, co njiya na kumwindula.’ Tupositolo bendekele ngwabo: ‘Nga nalala lika tulo, co akala mwamubwa.’ Ngeci Yesu wabalekele byakele na kulumbununa ngwendi: ‘Lazalo natsi.’

Yesu mwaketele ku Bethani wakawanene Lazalo banamutsindi laja, co te kuneti matangwa awana. Mbunga ya banu yezile na kuzembeleka Matha na Maliya. Matha mwazibile ngwendi Yesu ali na kwija, wamusheshele. Mubaliwanene, Matha wamulekele ngwendi: “Mwata, ngwe kuunakele kuno, ndolome yange ngwe katsile.” Yesu wamulekele ngwendi, ‘Ndolome yobe ayoya lalo. Kuma wakulahela ngoco ndi?’ Matha wamukumbulwile ngwendi: ‘Njakulahela ngwange akasanguka batsi mubakasanguka.’ Yesu wamulekele ngwendi: “Yange kusanguka na kuyoya.”

Co Matha waile na kuleka Maliya ngwendi: ‘Yesu naija.’ Maliya washatukilile Yesu, co mbunga yamukabele. Wawililile ku mendi endi oku ali na kulila. Co wendekele ngwendi: ‘Mwata, ngwe kuunakala kuno, ngwe ndolome yange aciyoya.’ Yesu wamwene busiwa bwakele nabwo, ngeci nendi wandwekesele misozi. Mbunga muyamwene Yesu andwekesa misozi, yendekele ngwayo: ‘Cili bene Yesu wazemene Lazalo.’ Oloni bamo balihwile ngwabo: ‘Mwafwa bikoni kobwele kabusamba kendi?’ Bika byalingile Yesu?

Yesu waile ku mbumbo kuje kubasilikile limanya lyakama. Co wabalekele ngwendi: ‘Tundiseniko limanya.’ Oloni Matha wamulekele ngwendi: ‘Kuneti oni matangwa awana. Mubila wendi uli na kunika.’ Nameme ngoco, batundisileko lije limanya. Co Yesu walombelele ngwendi: ‘Tate, njikukandelela mwafwa unanjizibi. Cili bene njizibuka ngwange simbu yoshe ukanjizibi. Oloni njendeka ngoco mwafwa yei mbunga yanjizengeleka, mangana itabe ngwayo yobe wanjitumine.’ Kutundaho, watambekele ngwendi: “Lazalo, tuhukomwo!” Kwalingiwile cuma ca kukomokesa manene. Lazalo watuhukile mu mbumbo oku banamuzenge binanga. Yesu wendekele ngwendi: “Muzengununeni alyendele.”

Banu babangi baje bamwene cije cikomokeso bakulahelele Yesu, oloni bamo baile na kuleka Bafalisi. Kutunda bene haje, Bafalisi bashakele kutsiya Lazalo na Yesu. Judasi Isikalioti uje wapwile kapositolo ka Yesu, waile kuli Bafalisi mu bushweke na kukabehula ngwendi: ‘Munjifweta bungai nga njimikwasa kuwana Yesu?’ Balizibasanene kumwana bimbongo bya siuva bya kupwa 30, ngeci Judasi washangumukile kushakezeka ngila yakwendela Yesu bungungu.