Paulu na Timothi

Timothi wapwile ndolome wa mukwenje mu cikungulukilo ca Listra. Ishe wapwile kaGriki, co ina wapwile kaJuda. Ina Yunisi na kuku yendi Loisi bakebo bamulongesele bya Yehova kushwa ku bwanike bwendi.

Paulu mwaile ku Listra ha bungenzi bwendi bwa kwambulula bwamucibali, wanangukile ngwendi Timothi wazemene manene bandolome, co washakele kubakwasa. Paulu walanyele Timothi ende nendi mu bungenzi bwendi. Mu kwita kwa simbu, Paulu walongesele Timothi kupwa muka-kwambulula na muka-kulongesa muzimbu waubwa wa mutongwe.

Sipilitu ya kujela yatwamenenene Paulu na Timothi kwoshe kubakele na kuya. Litangwa limo butsiki, munalume umo walekele Paulu mu cimona ngwendi aye ku Masedonia mangana akabakwase. Ngeci, Paulu, Timothi, Silasi na Luka baileko na kwambulula na kukashimbika bikungulukilo.

Banu babangi ba mu nganda ya Masedonia mu Tesalonika bapwile baka-Kristu. Oloni baJuda bamo bazibilile cipululu Paulu na bakwabo bakele na kupanga nabo. Mbunga ya banu yakwatele bandolome na kubatwala kuli baka-kuyula na kukendeka ngwabo: ‘Aba banalume bali na kutengulukila fulumende ya baka-Loma.’ Buyoye bwa Paulu na Timothi bwakele mu bushonde, ngeci haje bene batewelele ku Beleya.

Banu ba mu Beleya bashungwiiye manene kulilongesa muzimbu waubwa, co baGriki na baJuda bapwile baka-kukulahela. Oloni baJuda bamo batundile ku Tesalonika bezile na kunena bimpindangano, ngeci Paulu watewelele ku Atena. Timothi na Silasi bakebo basalele mu Beleya mangana batakamese bandolome. Mu kwita kwa simbu, Paulu watumine Timothi eluke ku Tesalonika mangana akakwase bandolome ha simbu ibakele na kubayandesa manene. Kutundaho, Paulu watumine Timothi mangana endele bikungulukilo byabingi na kubitakamesa.

Paulu walekele Timothi ngwendi: ‘Baje bapangela Yehova babayandesa.’ Timothi bamuyandesele na kumwaka mu kamenga mwafwa ya likulahelo lyendi. Wabwahelelele mwafwa kumuyandesa kwamukwasele amwese kulongwa kwendi kuli Yehova.

Paulu walekele baka-Filipi ngwendi: ‘Njili na kutuma Timothi kuli yeni. Akumilongesa bikulumbununa kwenda mu busunga na mwakupangela cipangi ca kwambulula.’ Paulu wazibukile ngwendi Timothi amukwasa manene. Bapangelele hamo ha myaka yaingi ha kupwa babusamba na bangamba ba Njambi.