CILONGESA 6

Kulumbununa Mwakupangesela Bisoneka

Yowano 10:33-36

SIMPI YAKAMA: Keti utande lika cisoneka kwa kujeneka kucilumbununa. Kwasa baje bakutolilila bamone omwo cisoneka ciunatanda mucinalitabasanena na simpi iushaka kulumbununa.

MWAKULINGILA:

Angula majwi akama. Munima ya kutanda cisoneka, angula majwi aje amwesa simpi yakama. Wasa kulinga ngoco ha kwilukila kutanda owo majwi, nambe kwihula cihula cije cilingisa baje bakutolilila bendeke owo majwi akama.

Nga upangesa majwi eka mu kulumbununa simpi ili mu cisoneka, co kwasa baje bakutolilila bamone omwo majwi a mu cisoneka muwanalikwatasanena na simpi yobe.
Kanyamesa simpi iushaka banuke. Nga unatumbula cisoneka na kumwesa biucitandela, co lumbununa muwanalitabasanena majwi akama ali mu cisoneka.

Omwo ulumbununa cisoneka, Mbimbiliya yobe ipwe ya kufukula. Oku kukwasa banu bamone omwo majwi obe muwanalitabasanena na vesi iunatanda.
Lumbununa bisoneka mu ngila yayasi. Keti wendeka byuma bije bitanganesa banu kumona simpi yakama. Banga kunanguka bibazibuka banu ha ñanda iuli na kwendeka na bubwa bwa simpi iushaka kubaleka. Oku kukukwasa wangule byuma biunapande kwendeka mangana baje bakutolilila bazibisise ñanda.