Futisi Yange Yakele na Kuya Mweka

BUYOYE BWANGE BWA KUNIMA:

Njasemukilile mu Los Angeles, ku California, mu lifuti lya U.S.A., mu citingitingi muje mwakele menene bibunga bya bikenya na baka-kupangesa mambanda a kupendesa. Twapwile tu ba 6 mu naanga, co yange njapwile wamucibali.

Banana bakele na kuya netu ku ceci ya evangelical. Nameme ngoco, munjapwile mukwenje njakele na bilinga byabibi. Lyacalumingo, njakele na kwimbila hamo na bakwetu mu ceci. Oloni ha matangwa akwabo a mu calumingo njakele na kuya ku bilika na kupangesa mambanda a kupendesa na kulinga bukwizi.

Njapwile muka kulubala-lubala bwasi. Co njakele na kupangesa citwa coshe-coshe cakele muyehi mu kushaka ngwange njihyane omwo njilwa na bakwetu. Binjakele na kulilongesa ku ceci kubyasele kutengulula futisi yange. Njakele na kwendeka ngwange, “Mwene ikeye lika napande kulinga shambandinga, co ali na kupangesa yange!” Munjakele ku sikola mu myaka yama 1960, njongumukile na cibunga cimo ca baka bupolitiki cibatumbwile ngwabo Black Panthers cije cakele na kulwila lisesa lya banu. Ngeci, njalikwatasanene na cibunga cije cakele na kulwila lisesa lya bana ba sikola. Co ha bisimbu byabingi twakele na kunena mpindangano ije yalingisile sikola baishoke ha bisimbu bimo.

Njalizibile ngwange kunena lika mpindangano kukwapwilemo. Ngeci, njashangumukile kulikwatasana na banu baje bakele na kulwisa banu ba miyati yeka. Cakumwenako, bisimbu bimo, nange na babusamba bange twakele na kuya na kuyongola mafilimu aje amwesele mubakele na kuyandesela banu ba ku Africa baje bapwile bindungo mu United States. Mutwamwene mubabayandeselele, twakele na kulubala manene, co twakele na kupupa bakwenje ba bindele batwakele nabo mu mulili mutwakele na kukengela mafilimu. Twakele lalo na kuya na kushakezeka bindele bakwabo batwatungile nabo mangana tubapupe.

Munjakele na myaka ya kukokela ku 20, nange na bandolome bange twalingile manene bukenya. Co tupokola bakele na kutukwata kushwa kumo. Shongo yange walikwatasanene na cibunga cimo ca bikenya, co nange njakobelele omu mu cibunga. Futisi yange yakele na kuya mweka.

MBIMBILIYA MUYATENGULWILILE BUYOYE BWANGE:

Bisemi ba kabusamba kange umo bapwile Bakaleho ba Yehova. Banjilanyele ku biwano byabo bya cikungulukilo, co njaile. Munjetele kuje, njalimwenenene ngwange Bakaleho ba Yehova balisezela kulako na bakwabo. Boshe bakwatele Bimbimbiliya, co bakele na kubipangesa. Na banike nabo bakele na kwendeka biñanda! Njakasamene manene munjazibukile ngwange lizina lya Njambi ikeye Yehova, na kuziba oku balipangesa. (Myaso 83:18, NWT) Cikungulukilo cakele na banu ba miyati na mafuti a kuliseza-seza, oloni kukwakele kaangu mukati kabo.

Ha kulibanga kunjashakele kulilongesa Mbimbiliya na Bakaleho, njashakele lika kuwaniwa-waniwa ku biwano byabo. Litangwa limo mangwezi munjaile ku biwano, babusamba bange baile ku cilika. Co bakapupile mukwenje umo na kumutsiya mwafwa wabyanene kubana cikobelo cendi ca lisika. Lyamukwabo balishashele ngwabo banatsii munu. Omwo bakele na kubasompesa mu nkuta, bamwene ngwe mulonga ubalingile kuwapwile wakama manene. Co bwingi bwabo babasompelele kukala mu kamenga kweta noho habakatsila. Njabezikile mwafwa kunjakele nabo lije litangwa. Ngeci, njalyangwilile kushangumuka kulilongesa Mbimbiliya na kutengulula futisi yange.

Mwafwa ya kuyoya na banu baje bakele na kaangu ha simbu yailaha, njakasamene munjamwene kulizibasana kwakele mukati ka Bakaleho. Cakumwenako, cindele uje wapwile Mukaleho mwaile ku lifuti lyeka wasezele bana bendi bawana mu naanga ya banu ba kuzibala mangana bamunyungilebo. Co lalo naanga imo ya bindele yakwasele mwanike wa kuzibala uje kakele na kwakukala. Njalimwenenene ngwange Bakaleho ba Yehova bakebo bali na kukabangeya cinangulo cili ku mukanda wa Yowano 13:35: “Nga mulizema umo na mukwabo asinoni boshe bakazibuka ngeci mu bandongesi bange.” Njazibukile ngwange njinawana babushoko.

Munjakele na kulilongesa Mbimbiliya njanangukile ngwange njapandele kutengulula munjakele na kusinganyekela. Njapandele kutengulula biyongola byange mangana njiyoye mu kwoloka na bakwetu na kumona seho ya kulinga ngoco. (Loma 12:2) Mu kwita kwa simbu, njashangumukile kukola ku sipilitu. Mu January 1974, banjimbwitikile, co njapwile umo wa Bakaleho ba Yehova.

Nameme munima ya kunjimbwitika anga njapandele kupanga na nzili mangana njecele kulubala-lubala bwasi. Cakumwenako, litangwa limo mutwakele na kwambulwila ha njibo na njibo, njashatukisile mwizi uje webile cisanzi cakele mu munyau wange. Omwo njakele muyehi na kumukwata, wombilile cisanzi na kutewa. Munjalekele bakwetu ou muzimbu, mukulunu uje wakele hamo netu wanjihwile ngwendi, “Stephen, ngwe wamukwatele ngwe wamulingile bati?” Eci cihula canjilingisile njinanguke ngwange njapandele kutwalelelaho kulifwita kukala mu kwoloka na bakwetu.

Mu October 1974, njapwile muka-kwambulula wa simbu yoshe, co njakele na kulongesa bakwetu Mbimbiliya ha mahola 100 ngonde na ngonde. Mu kwita kwa simbu, njakapangelele ku cikota ca Bakaleho ba Yehova ku Brooklyn mu New York. Mu 1978, njelukile ku Los Angeles kukanyunga banana baje bakele na kubinja. Mukwetile myaka ibali njambatele mwebwange Aarhonda uje injazema manene. Wanjikwasele manene kunyunga banana kweta noho habatokelele. Mu kwita kwa simbu, nange na Aarhonda twaile ku Sikola ya Ngilyande, co batutumine kukapangela ku ­Panama kuje kutucili na kupangela mu cipangi ca bumishinali.

Kushwa habanjimbwitikilile, njaliwana na byuma byabingi bije byesi kunjilingisile njilubale manene. Oloni njalilongesa kukwata mbunge na kuseza banu baje balingila shakelo byuma mangana banjilubalese nambe kumanesa bukalu mu ngila yeka. Banu babangi, kwambateselela na mwebwange bakanjishangala mwafwa ya kulifwita kwange. Kunjasinganyekele ngwange njasa kutenguluka! Kunjesi kulishasha mwafwa ya kutengulula futisi yange. Njakulahela ngwange obu bunapu bukaleho bumwesa ngwabwo Mbimbiliya ikatengulula buyoye bwa banu.—Vahevelu 4:12.

BUKWASI BUNJINAWANA:

Mbimbiliya inanjikwasa kuzibuka binjili na kuyoyela na kunjikwasa kukala mu kwoloka na bakwetu. Hanoni njili na kukwasa banu bazibuke busunga keti kuya na kubapupa embwe. Co lalo njalilongesele Mbimbiliya na munu uje wapwile citozi cange ha simbu injakele ku sikola! Munima ya kumumbwitika twatumbamene mu njibo imo ha simbu yaindondo. Co tunatwalelelaho kupwa babusamba bakama kweta na lelo lino. Yange na mwebwange tunakwasa banu ba kutubakana 80 balilongese Mbimbiliya na kupwa Bakaleho ba Yehova.

Njakandelelako manene kuli Yehova ha kunjikwasa kupwa wa kubwahelela na zibuka binjili na kuyoyela na kukala mukati ka bandolome na bandokazi baje balizema umo na mukwabo.