Watchtower LAIBRALI YA HA INTANETI
Watchtower
LAIBRALI YA HA INTANETI
Mbunda
  • MBIMBILIYA
  • MABULU
  • BIWANO
  • w16 March pp. 5-7
  • Vika Yesu Vyayandelele na Kuthsa?

Haunanyateka kuhesi vidio.

Cabihya, kuli bukalu bunonowesa ei vidio kushokoloka.

  • Vika Yesu Vyayandelele na Kuthsa?
  • Kaposhi Ka Kukengela Kali Na Vumwene Vwa Yehova (Kaposhi ka Kukengela ka Kulilongetha)—2016
  • Tumitwe twa Biñanda
  • Biñanda bya Kulifwa
  • VIKA VINANENE KUTHSA?
  • VYANALINGI NJAMBI
  • OVYO VYAYANDELELE YESU NA KUTHSA
  • VUKWATHI VUMWATHA KUWANA
  • Kutsa kwa Yesu Kutwobola Bati?
    Likuweni Kuyoya Myaka Yoshe!—Kulilongesa Mbimbiliya Kumikwasa
  • Bika Byanalingi Njambi?
    Kaposhi Ka Kukengela Kali Na Vumwene Vwa Yehova (Kaposhi ka Mbunga)—2019
Kaposhi Ka Kukengela Kali Na Vumwene Vwa Yehova (Kaposhi ka Kukengela ka Kulilongetha)—2016
w16 March pp. 5-7
Vanu va miyati ya kulithethza valikuwa kuyoya mu Palandaisi

MUTWE WAKAMA

Vika Yesu Vyayandelele Na Kuthsa?

“Vuvi vwethzile hano ha kaye hali munu umo lika [Andama], cho vuvi vwendi vunanene kuthsa. Cho kuthsa kunete ku miyati yoshe ya vanu omwo voshe vanalingi vuvi.”—Loma 5:12

Va Andama na Eva vanatala ku miti uvavavyanethele; Va Andama na Eva vanakuluvala; Chula vachitwala ku vihilo

Mukumbulula vati nga munu amihula ngwendi: “Ushaka kuyoya myaka yoshe ndi?” Vavangi vanatha kukumbulula ngwavo vashaka, oloni vakathembulula. Vakendeka ngwavo kuthsa kukaija kuli yetu mwafwa tuli na kuyoya.

Oloni vati cho nga vamihula ngwavo: “Ushaka kuthsa ndi?” Kwendeka lika vuthunga, vavangi vanatha kukumbulula ngwavo embwe. Echi chimwetha vika? Nameme tukaliwana mu vukalu, oloni tukashaka kuyoya myaka yoshe. Mbimbiliya imwetha ngwavo Njambi watangele vanu na chithzango cha kuyoya myaka yoshe. Yatuleka ngwavo “nalingitha vanu kuyongola vyuma vya kulutwe.”—Muka-kwambulula 3:11.

Oloni vanu kuvethi na kuyoya myaka yoshe. Mwafwa vika? Kuli vimo vyanalingi Njambi mangana amanethe ovu vukalu ndi? Viyendeka Mbimbiliya vikanyametha, cho ituleka vyayandelele Yesu na kuthsa.

VIKA VINANENE KUTHSA?

Mu tupetulu vatatu va kulivanga mu mukanda wa Kushangumuka vendeka ngwavo Njambi mwatangele va Andama na Eva, wayongwele ngwendi vayoye myaka yoshe. Wavalekele vivapandele kulinga mangana vawane okwo kuyoya. Oloni vakevo kuvononokele kuli Njambi, cho vonowele kuyoya myaka yoshe. Eyi ñanda vaithoneka mu ngila yayathi manene, cho vanu vavangi vakayombwanetha na kuthinganyeka ngwavo chithimo. Oloni viñanda vyavingi vya kuthañulu vya mu mukanda wa Kushangumuka vyapwa vya vuthunga ngwe vije vivathoneka mu Viñanda Vyavivwa.a

Vika vinatundu mu kujeneka kwononoka kwa Andama? Mbimbiliya ikumbulula ngwavo: “Vuvi vwethzile hano ha kaye hali munu umo lika [Andama], cho vuvi vwendi vunanene kuthsa. Cho kuthsa kunete ku miyati yoshe ya vanu omwo voshe vanalingi vuvi.” (Loma 5:12) Omwo Andama kononokele kuli Njambi, waviyithile. Wathzimbalethele kuyoya kwa myaka yoshe, cho mu kwita kwa thimbu wathsile. Ha kupwa vana vendi, netu tunatambulako vuvi vwendi. Mukemwo tukavinji na kukuluvala na kuthsa. Twatambula vuvi vutwala kukuthsa muvakatambwila vanike vifwa vimo kuli vithemi vavo. Oloni kuli vimo vyanalingi Njambi mangana amanethe ovu vukalu ndi?

VYANALINGI NJAMBI

Njambi wavwahethele ngila ya kwilwitha nambe ngwetu kulandela vana va Andama vwana vwa kuyoya myaka yoshe, vuje vwathzimbalethele Andama. Njambi walingile vati ngocho?

Ku Loma 6:23 Mbimbiliya ngwayo: “fweto ya vuvi inapu kuthsa.” Echi chimwetha ngwavo vuvi vukevwo vunanene kuthsa. Andama wavihithile, mukemwo wathsile. Netu tukavitha, mukemwo tukatambula fweto ya vuvi, kuthsa. Oloni twathemukilile mu vuvi kwa kujeneka kulishakela. Njambi mu chithzemo chendi watumine Munendi Yesu kwakutufwetela “vuvi” vwetu. Echi chalingiwile vati?

Va Andama na Eva vanatala ku miti uvavavyanethele;

Kuthsa kwa Yesu kunatutuvila ngila ya kukayoya myaka yoshe mu kuvwahelela

Munu umo lika wa kulumbunuka Andama wanenele vuvi na kuthsa mwafwa ya kujeneka kwononoka. Cho kwatondewele lalo munu wa kulumbunuka uje wononokele kutwala na ku kuthsa mangana atupatule ku vuvi. Mbimbiliya ngwayo: “Ngwe omwo vanu voshe vavapwithile vaka-vuvi a kujeneka kwononoka kwa munu umo lika, mu ngila eyi vene voshe vakavapwitha vaka-vuthunga ku mesho a Njambi ha kwononoka kwa munu umo lika.” (Loma 5:19) Owo “munu umo lika” ikeye Yesu. Wapwile munu wa kulumbunukab, cho watundile mwilu kwakututhsila. Echi chinatulingitha tupwe vanu vavavwa ku mesho a Njambi, cho lalo tukakala na mwonyo wa myaka yoshe.

OVYO VYAYANDELELE YESU NA KUTHSA

Mwafwa vika Yesu wapandele kuthsa mangana apatule vanu ku vuvi? Mwafwa vika Njambi Muka-ndthzili Yoshe kashikile lika ngwendi vana Andama vavatavethe kuyoya myaka yoshe? Njambi wakele na ndthzili ya kulinga ngocho. Oloni kulinga ngocho ngwe kukwasholwele vuthunga vwa lishiko lyendi lya kwendeka ngwavo fweto ya vuvi inapu kuthsa. Eli lishiko kethi lya kutengulula lika thimbu yoshe yoshe. Lyamwethele kuthompa mu vuthunga.—Myatho 37:28.

Ngwe Njambi kathompele mu vuthunga eyi ñanda, ngwe vanu vanathembulula ngwavo na mu viñanda vikwavo mukemwo mwakalingila. Chakumwenako, ngwe nethi kuthzivukile vati vana va Andama vaje vanapande kuyoya myaka yoshe? Kuma vanu ngwe vamukulahela ngwavo akalinga vyanakulahetha ndi? Kuthompa mu vuthunga kwa Yehova mu kuvwahetha vya kutwovola, kwatulingitha tukulahele ngwetu Njambi akalingi vyavivwa thimbu yoshe.

Njambi natutuvila ngila ya kukayoya myaka yoshe mu Palandaisi hano hathi kwitila mu ñombelo ya Yesu. Kengeni majwi a Yesu ku Yowano 3:16. Wendekele ngwendi: “Omwo Njambi wathzemene vaka-kaye manene ngechi wanene Munendi umo lika, ngechi woshe akulahela kuli ikeye kethi anyonge, oloni akale na mwonyo wa myaka yoshe.” Kuthsa kwa Yesu kukumwetha lika ngwavo Njambi akathompo mu vuthunga, oloni kumwetha lalo ngwavo wathzema manene vanu.

Oloni mwafwa vika Yesu wayandele na kuthsa vuthsi vwa kuvavala manene vuje vuvanendeka mu mikanda ya Viñanda vyavivwa? Omwo Yesu wakanyamenene vyetheko vyakama na kutwalelelaho kupwa wa kulongwa, wamwethele ngwendi Liyavolo wakwithile omwo wendekele ngwendi vanu kuvatha kutwalelelaho kulongwa kuli Njambi nga valiwana mu vyetheko. (Yombi 2:4, 5) Awa majwi a Satana hamo asholokele ngwe a vuthunga omwo wongumwine munu wa kulumbunuka Andama. Oloni Yesu wa kulumbunuka uje walifwile na Andama, ikeye watwaleleleho kwononoka nameme mu thimbu ya tuyando. (1 Kolinte 15:45) Yesu wamwethele ngwendi nameme Andama ngwe walyangwilile kwononoka kuli Njambi, ngwe wononokele. Yesu mwakanyamenene vyetheko, watwakelele mwanja utunapande kukavangeya.—1 Petulu 2:21.

VUKWATHI VUMWATHA KUWANA

Yesu wathsile vene. Natutuvila ngila ya kukayoya myaka yoshe. Neni mushaka kuyoya myaka yoshe ndi? Yesu watulekele vitunapande kulinga. Wendekele ngwendi: “Cho mwonyo wa myaka yoshe ukewo ou, ngechi vakuthzivuke yove Njambi umo lika wa vuthunga, cho na kuthzivuka Yesu Kilisitu, uje iwatumine.”—Yowano 17:3.

Vaje vanathoneka eyi mangazini, vali na kumilanya mulilongethe vyavingi hali Njambi wa vuthunga Yehova na Yesu Kilisitu. Vakaleho va Yehova vamwatunga navo vavwahelela manene kumikwatha. Mwatha kuwana vukwathi vukwavo lalo ha wembusaiti yetu ya www.jw.org.

a Kengeni mutwe wa “The Historical Character of Genesis,” mu livulu lya Insight on the Scriptures, ha liputa 922, livanathoneka Vakaleho va Yehova.

b Njambi wanungulwile kuyoya kwa Munendi kutunda mwilu na kuchaka mwimo lya Maliya. Ngechi Maliya wemitile. Cho sipilitu ya kujela ya Njambi yavingilikiyiye Yesu mangana kethi atambule kujeneka kulumbunuka kwa Maliya.—Luka 1:31, 35.

Vetithamo likende lya kujeneka muthima ku chanukitho

“Lingeni Echi”

Vuthsiki vuje te kanda athse, Yesu wakungulwile vapositola vendi va kulongwa na kulinga navo chilika cha kulivanga cha kwanuka kuthsa kwendi. Wendekele kuli vakevo ngwendi: “Lingeni echi mu kunjanuka yange.” (Luka 22:19) Mu kwononoka eli lishiko, Vakaleho va Yehova mu kaye mwoshe vakalikungulula ha mwaka kwanuka kuthsa kwa Yesu. Mwakawali, vanu vakele oku ku chilika vapwile 19,862,783.

Uno mwaka, Chanukitho cha kuthsa kwa Yesu chikalako lya chitatu, March 23, mangwethzi. Tuli na kumilanya hamo lika na nanga yeni na vavuthamba veni mukatolilile ku ñanda ya Mbimbiliya. Eyi ñanda ikalumbununa theho ya kuthsa kwa Yesu nomwo kumikwathelamo. Vaje vakakunguluka kuvakavafwetetha. Ihuleni Vakaleho va Yehova va mu chitingitingi cheni vamileke thimbu na mutambela kuchikakela chilika, nambe yeni ha wembusaiti yetu ya www.jw.org.

    Mabulu a Mbunda (1987-2025)
    Tundaho
    Kobela
    • Mbunda
    • Anako bakweni
    • Biushaka
    • Copyright © 2025 Watch Tower Bible and Tract Society of Pennsylvania
    • Mashiko a Mwakuipangesela
    • Mwakupangesela Mizimbu Yobe
    • Mwakunonekela Mizimbu Yobe
    • JW.ORG
    • Kobela
    Anako Bakweni