Kulikongomeka Kwapwa Kwakuvwa Manene

Toñi, uje wapwa muka-kunyunga tukulukathzi wohyethele ngenjo ya ha lipito, cho munakathzi umo wakumbulwile. Ou munakathzi watukile na kuyalumukila Toñi mwafwa ya kujeneka kweta na thimbu kwa kunyunga vaina. Toñi kakotokelele ha chipangi embwe. Oloni walombele kumuthambetha, omwo ya kujeneka kuthzivithitha vyakele na kulingiwa.

HA VUNGENDTHZI vukwavo, ou munakathzi wayalumukilile lalo Toñi. Vika vyalingile Toñi? Wendekele ngwendi: “Njakele mu vukalu vwakama manene mwafwa vakele na kunjiyalumukila ngocho kwakujeneka mulonga.” Oloni Toñi anga walombele kumuthambetha, cho walekele uje munakathzi ngwendi wathzivukile vukalu vwakele navwo.

Ngwe yeni Toñi, ngwe munethi kulinga vati? Ngwe mwathele kumwetha kulikongomeka indi ngwe kwamipwililile kwakukalu kupwa va kulikongomeka? Nga tuli mu vukalu ngwe vuje vwaliwanene navwo Toñi, kunatha kupwa kwakukalu kukwata mbunge. Nga tuli mu vishoti nambe nga vatushangumuka vakwetu, kunatha lalo kutupwila kwakukalu kulikongomeka.

Oloni Mbimbiliya ishongangeya Vaka-kilisitu kupwa va kulikongomeka. Lijwi lya Njambi, limwetha ngwavo nga tulinga ngocho, cho tuli na mana. Yakomba wehwile ngwendi: “Kuma hakati keni hali muka-mana na muka-kuthzivithitha ndi? Ikeye napande kuwajombolola na vukaleho vwa kuyoya kwendi kwakuvwa na vilinga vyendi vya chifwa cha kulikehetha na mana.” (Yako. 3:13) Kulikongomeka kwapwa vati vukaleho vwa mana a kutunda mwilu? Cho vyuma muka vyatha kutukwatha kupwa va kulikongomeka?

VUVWA VWA KULIKONGOMEKA

Kulikongomeka kukamanetha vukalu. “Kukumbulula kwakuvwa kwolwetha vukalu, oloni lijwi lya kuvavaletha mbunge lishangumuna vukalu.”—Vithi. 15:1.

Kukumbulula mu ngila yaivi kwatha kuvwethzelela ku vukalu, ngechi lika munu uje ashambeya tuhya. (Vithi. 26:21) Oloni kukumbulula mu ngila yaivwa kwatha kutepulula ku vukalu. Kunatha kulingitha munu naluvala atepulule ku vukalu vwendi.

Toñi wamwene vuthunga vweyi ñanda. Owo munakathzi washangumukile kulila omwo Toñi wamukumbulwile mu kulikongomeka. Walumbunwine ngwendi vukalu vwendi novu vwa mu nanga, vukevwo vwamulingithile atenuke. Toñi wanene vukaleho vwavuvwa na kushangumuka kulilongetha Mbimbiliya nowo munakathzi omwo ya kulikongomeka kwendi na kukumbulula mu kathingimiko.

Kulikongomeka kwatha kutulingitha tupwe va kuvwahelela. “Vanavethzika vaje vaka-kulikongomeka omwo vakashwana hano hathi.”—Mateo 5:5.

Mwafwa vika vaka-kulikongomeka vapwa va kuvwahelela? Vanu vavangi vaje vapwile vaka-vukalu vanatenguluka kupwa vaka-kuvwahelela mwafwa ya kulilumbilitha. Vuyoye vwavo vunatenguluka, cho vathzivuka ngwavo vanavandamena vyuma vyavivwa kulutwe. (Kolo. 3:12) Adolfo uje wapwa ntwama wa kuthzenguluka mu spain, anuka mukwapwile kuyoya kwendi thimbu ije te kanda aije mu vuthunga.

Adolfo ngwendi: “Njakele na kuliyoyela lika ngocho. Njapwile nji muka-kutenuka thimbu yoshe, ngechi nameme vavuthamba vange vashangumukile kunjitewa mwafwa ya lwothzi na kulyaletha thimbu yoshe. Mamanethelelo mwethzile vukalu. Thimbu imo omwo twakele na kulwa, njavulumukile vimbandu vyakama vya kupwa 6, cho vyandwekele manene maninga na kushaka kunjithsiya.”

Matangwa ano, Adolfo ali na kulongetha vakwavo kupwa va kulikongomeka kwitila mu majwi na mu vilinga. Vwingi vwa vanu vamuthzema, mwafwa ya vifwa vyendi vyavivwa. Adolfo ngwendi navwahelela mwafwa ya kutenguluka kwanalingi mu kuyoya kwendi. Cho lalo ali na kukandelela kuli Yehova ha kumukwatha mangana apwe wa kulikongomeka.

Kulikongomeka kukathzivitha Yehova kuvwaha ku mbunge. “Munange, kala na mana, cho njikavwahelela njikatha kukumbulula munu woshe uje anjipaya.”—Vithi. 27:11.

Liyavolo, chitothzi chakama cha Yehova, ikeye ali na kumupaya. Njambi napandele kuluvala mwafwa ya likamba lya chifwa echi, oloni Mbimbiliya imwetha ngwavo Yehova “kethi kuluvala vwatha.” (Kutu. 34:6) Nga tulifwita kutembwinina Yehova mu kujeneka kuluvala vwathi na kupwa va kulilumbilitha, cho tukala na mana aje athzivitha Yehova kuvwaha ku mbunge.—Efeso 5:1.

Lelo lino, kaye kali mu vukalu vwakama. Tunatha kukala mukati ka vanu “vaka-kulishasha na vaka-kulijundula vakevo vavenya na vaka-kushaula. . na vaka-vukaleho vwa makuli na vaka-muka na vaka-vukalu.” (2 Tima. 3:2, 3) Oloni evi vyuma kuvyapandele kwonowetha Muka-kilisitu kupwa wa kulikongomeka. Lijwi lya Njambi litwanukitha ngwavo “mana a kutunda mwilu . . . apwa a kwoloka na vuvwa.” (Yako. 3:17) Omwo tumwetha sipilitu ya kwoloka na vuvwa, cho tumwetha ngwetu tuli na mana a vunjambi. Mana a chifwa echi atulingitha mangana twathe kukumbulula mwamuvwa nga vakwetu vatushangumuka, cho lalo tushwenya muyehi na Yehova, kuje kukatundu awa mana.

Vyuma vije vimikwatha kupwa va Kulikongomeka

Nga munu amilinga mwamuvi nambe kumitenukila, vika vyatha kumikwatha mangana kethi muluvale na kulinga vyuma mu ngila ije ithzivitha Yehova kuvwaha ku mbunge? Thinganyekeni ha vinangulo evi vinakavangeyaho.

1 VYANENI “MUNDTHZINDTHZIME [SIPILITU] WA HANO HA KAYE.”—1 Koli. 2:12.

Vanu vavangi vaketheketha kulikongomeka ku kuthzeya. Vakendeka ngwavo munu wa kukaluka na kutenuka ikeye wapwa wa ndthzili. Vithinganyeka vya chifwa echi visholola sipilitu ya kaye, kethi mana a kutunda mwilu, embwe. Mbimbiliya imwetha ngwavo munu wa kulikongomeka wapwa wa kukanyama manene. “Ha kupwa munu wa kuthimpa watha kuthindiya mwene, cho lijwi lya kwendeka na chithzemo likamanetha vukalu.”—Vithi. 25:15.

Vihula vitunapande kulihula:

Njikamono munu wa kulikongomeka kupwa wa kukanyama indi wa kuthzeya?

Njiketheka kujenjuka “vije vichilinga chithemwa cha vunu” vya kufwa ngwe kalwa na matoto ndi?—Ngala. 5:19, 20.
2 PWENI NA THIMBU YA KUTHINGANYEKETHETHA.

“Vaka-vuthunga vakayongola ha kulivanga thimbu kanda vakumbulule, oloni vaka-vuvi vakathzambula kukumbulula, cho vakalikoveletha mu vukalu.” (Vithi. 15:28) Nga tuthzambula kwendeka oku tuchinaluvala, twatha kwendeka majwi aje anatha kutulingitha tuliveye ku mamanethelelo. Oloni nga tuvanga tahi kuthinganyeka mwamuvwa thimbu kanda twendeke, cho twatha kutengulula vithinganyeka vyetu na kukumbulula mu kathingimiko.

Vihula vitunapande kulihula:

Kuluvala vwathi kwatha kunjinenela vukalu muka?

Njatha kwivalako lika nga mukwetu nanjilingi mwamuvi mangana tukale mu kwoloka ndi? —Vithi. 19:11.
3 LOMBELENI THIMBU YOSHE

Lombeni sipilitu ya kujela ije yapwa ya ndthzili manene kutuvakana vyuma vyoshe. (Luka 11:13) Anukeni ngweni vushuka vwa sipilitu ya kujela ya Njambi vunambatethelela na kulikehetha na kulilula. Adolfo anuka ngwendi: “kulombela kuli Yehova thimbu yoshe kwanjikwathele, maneneni munjaliwanene mu vukalu.” Nga ‘tulomba thimbu yoshe’ kuli Yehova mangana atwane sipilitu yendi ya kujela, cho atha kutukumbulula —Loma 12:12.

Vihula vitunapande kulihula:

Njikalombo kuli Yehova thimbu yoshe mangana elule mbunge yange na vithinganyeka vyange ndi?

Njikalombo sipilitu yendi ya kujela na mana endi mangana njilinge vyuma vije vimuthzivitha kuvwaha ndi?—Myatho 139:23, 24; Yako. 1:5.