3 Mbimbiliya Imikwatha Kukolethela Vukalu Vuje Kumwatha Kumanetha

Kuli vukalu vumo vuje kumwatha kutewa nambe kumanetha. Chakumwenako, nga munathsitha munu imwathzema nambe nga muli na kuvinja mushongo wa lulanga, kumwatha kumanetha ovu vukalu, oloni munatha lika kuvukolethela. Kuma Mbimbiliya yatha kumikwatha kukolethela ovu vukalu vwakama ndi?

MUSHONGO WA LULANGA

Rose wendekele ngwendi: “Njakala na mushongo unjatambula ku vithemi vange, cho ukanjithzivitha manene kuvavala thimbu yoshe. Vuyoye vwange vunakaluwa manene.” Vukalu vwakama manene vwaliwanene navwo vwapwile vwa kwonowa kulilongetha Mbimbiliya na kulinga vyuma vyeka vya vunjambi. Oloni majwi ali ku Mateo 19:26 amukwathele manene. Oku ku mukanda Yesu wendekele ngwendi: “Kuli Njambi vyuma vyoshe vyavyathi.” Rose wendekele ngwendi kulilongetha Mbimbiliya kuli mu vingila vyavingi. Washangumukile kutolilila ku majwi a mu Mbimbiliya na mu mavulu aje avanatanda na kuwaka ha intaneti, mwafwa mushongo wendi wakele na kumwonowetha kutanda Mbimbiliya.a Rose wendekele ngwendi: “Kunjithzivuka munjinethi kukanyamethela vuthamba vwange na Njambi ngwe kukwethi eyi pulongilamu ya kutolilila ku majwi a vanatanda, aje ali ha intaneti.”

Rose akalithzivi manene kuthzeya omwo akonowa kulinga vyuma vije vyakele na kulinga kunima, oloni majwi ali ku 2 Kolinte 8:12 akamuthzembeleka manene. Ou mukanda ngwawo: “Nga yeni muli na chithzango cha kwana, cho Njambi akatambula vwana vweni hali vije muli navyo kuvyana, oloni kethi hali vije kumwethi navyo.” Awa majwi akwathele manene Rose amone ngwendi Njambi akavwahelela kumona vipangi vyakalingi kwetheketha na ndthzili yendi.

VUTHIWA

Delphine itunendeka mu ñanda inahu, wendekele ngwendi: “Munange wa mumbanda wa myaka 18 mwatokele, njathzivile manene kuvavala ku mbunge, cho kunjakulahelele ngwange njatha kutwalelelaho kuyoya. Njakele mu vuthiwa vwakama manene.” Oloni majwi ali ku Myatho 94:19, amuthzembelekele. Oku ku mukanda, muka-kwimba walekele Njambi ngwendi: “Omwo viyongola mu mbunge yange vyatumine, oloni yove wanjithzembelekele na kunjithzivitha kuvwaha.” Delphine wendekele lalo ngwendi: “Njalombelele kuli Yehova mangana anjikwathe kulinga vyuma vije vinjikwatha kupwa wa kuvwahelela.”

Walyanene mu vipangi vyavivwa. Cho lalo walyethekethele ikeye vavenya ku choki ije yatha kuthoneka nameme inapokoka ha kati. Nendi walithzivile kupokoka mbunge, oloni wanangukile ngwendi atha kukwatha vakwavo. Wendekele ngwendi: “Njanangukile ngwange kupangetha vinangulo vya mu Mbimbiliya, mu ku kuthzembeleka vanu vanjalilongethele navo Mbimbiliya, yapwile ngila yanjithzembelekelelemo Yehova na kunjitakametha.” Wathonekele mukana wa vanu va mu Mbimbiliya vaje vakele mu vuthiwa vwakama. Wendekele ngwendi: “Ava vanu vakele na kulombela kuli Njambi thimbu yoshe.” Kutundoho, wendekele lalo ngwendi: “Kutwatha kukolethela vukalu nga kututanda Mbimbiliya.”

Kulilongetha Mbimbiliya kunakwatha Delphine akele mana ku vyuma vya kulutwe, kethi vya kunima embwe. Chikulahetho chili ku Vilinga 24:15 chamuthzembelekele manene. Ou mukanda ngwawo: “Vanu voshe vavavwa na ava vavavi vakathanguka ku vathsi.” Kuma Delphine wakulahelele ngwendi Yehova akathangula munendi ndi? Eyo mwafwa wendekele ngwendi: “Njikakala lalo na munange kulutwe. Njambi navwahetha laja litangwa litukaliwana na munange. Mu vithinganyeka vyange njikamono ngwe njili hamo na munange mu lihya na kumuthzema ngwe munjamuthzemene ha litangwa lyathemukile.”

a Awa majwi a kutolilila a vanatanda mwatha kuawana ha wembusaiti ya jw.org.

Mbimbiliya yatha kumithzembeleka nameme muliwana na vukalu vwakama manene

NJAMBI ATHA KUTUKWATHA VATI?

Mbimbiliya yakumbulula ngwayo: “Ikeye ali muyehi na vanu vaje voshe vatambeka kuli ikeye, vanu vaje vatambeka kuli ikeye mu vuthunga. Ikeye akutitha vithzango vya vaje vamukomoka, athziva mitambi yavo, cho avamena.” (Myatho 145:18, 19) Awa majwi akatutakametha manene. Njambi akakumbulula vati malombelo a vanu vaje vakalombo kuli ikeye mu vuthunga?

AKATWANA NDTHZILI:

Vukalu vumo vukatuthzeyetha manene ku muvila na mu vithinganyeka na ku sipilitu. (Vithimo 24:10) Oloni Yehova ‘akakoletha vaje vanathzeye na kujuka.’ (Isaya 40:29) Muka-kwimba wendekele ngwendi: “Njambi ikeye vutewelo vwetu na ndthzili yetu, wakala muyehiyehi netu na kutukwatha ha thimbu ya tuyando.” (Myatho 46:1) Njambi akana vangamba vendi sipilitu yendi ya kujela mangana vakolethe. Neni lombeni Njambi mangana amyane sipilitu yendi ya kujela.—Luka 11:13.

AKATWANA MANA:

Munapande kulinga vika nga kukamikaluwila kuthzivithitha vinangulo vya mu Mbimbiliya na kuvikavangeya? Ndongethi Yakomba wathonekele ngwendi: “Nga kuli umo weni najeneka mana, alombe kuli Njambi uje akamwanawo, omwo Njambi akana kuli vanu voshe na kushemutuka na kutetela.” (Yakomba 1:5) Nga mutanda Mbimbiliya na kupangetha vyuma vimulilongethamo, cho mulinga vyuma vije vilitombola na malombelo eni. (Yakomba 1:23-25) Kulinga ngocho kumikwatha mumone vuvwa vuli mu kukavangeya vinangulo vya mu Mbimbiliya.

AKATWANA KWOLOKA:

Yehova amikwatha kupwa va kuvwahelela nameme muli na vishoti vyavingi. Lijwi lyendi ngwalyo: “Kethi mushote mbunge ha chuma chimo, oloni mu malombelo eni oshe lombeni Njambi ha vije munajeneka, thimbu yoshe mulombeni na mbunge ya kukandelela. Cho kwoloka kwa Njambi, kuje munu na umo wahi atha kuthzivithitha, kukanyunga vimbunge vyeni na viyongola vyeni mwamuvwa muli Kilisitu Yesu.” (Filipu 4:6, 7) Lombeni kuli Yehova mangana amyane kwoloka.

Mulinga vati nga vukalu vweni vuchitwalelelaho? Kethi muthinganyeke ngweni Njambi namiyengula. Nameme vukalu vweni vuchili na kutwalelelaho, oloni Njambi amyana ndthzili na kuthimpa mangana mukolethe. (1 Kolinte 10:13) Mbimbiliya yakulahetha ngwayo Njambi akamanetha tuyando twetu twoshe.