Kulombela Kumikwasa Bati?

Pamela mwakele na kubinja mushongo wa kansa, waile ku cipatela. Co lalo, walombelele kuli Njambi mangana amukwase kukolesa. Lilombelo lyamukwasele ndi?

Pamela ngwendi: “Ha simbu ibakele na kusaka mushongo wange wa kansa, njakele na kulishoshomwena. Oloni munjakele na kulombela kuli Yehova Njambi, njakele na kusimpa na kukolesa. Na simbu ino, njikababala kushwa kumo, oloni kulombela kukanjikwasa njimone byuma mu ngila inapande. Co bakwetu mubakanjihula munjili na kulizibila, njikabaleke ngwange: ‘Njicili na kubinja, oloni njabwahelela.’”

Kutwapandele kubandamena ngwetu tukobele mu bukalu bwakama asina tulombela. Tubaboshe tukaliwana na bukalu bwa kuliseza-seza, co tukatondo bakwetu batukwase kukolesa. Kuma lilombelo lyasa kutukwasa ndi?

Mbimbiliya ngwayo: “Kundika tuyando twobe kuli Shukulu Kalunga, co ikeye akakukwasa, ikeye kakataba muka-busunga ngeci bamufungulule embwe.” (Myaso 55:22) Awa majwi atutakamesa. Lilombelo lyasa kumikwasa bati? Nga mulombela kuli Njambi mu ngila inapande, amyana bimutonda mangana mukolese omwo muli mu byeseko.—Taleni cipalo ca “Bukwasi Muka Bumuwana Nga Mulombela?”

Bukwasi Muka Bumuwana nga Mulombela?

Mukala mu kwoloka

“Lombeni Njambi ha bije munajeneka, . . . co kwoloka kwa Njambi, kuje munu naumo wahi asa kuzibisisa kukanyunga bimbunge byeni na biyongola byeni mwamubwa muli Kilistu Yesu.” (Filipu 4:6, 7) Nga tuleka Njambi byuma bitunalishoshomwena, co atukwasa tusimpe na kulinga mwamubwa byuma ha simbu ya bukalu.

Mukala na mana a kutunda kuli Njambi

“Nga kuli umo weni najeneka mana, alombe kuli Njambi, uje akamwanawo, omwo Njambi akaana kuli banu boshe na kushemutuka na kutetela.” (Yakomba 1:5) Bisimbu bimo mutukakala mu bukalu, kutwesi kwangula mwamubwa bya kulinga. Oloni nga tulomba mana kuli Njambi, co asa kutwanukisa binangulo byabingi bya mu Lijwi lyendi bije byasa kutukwasa.

Njambi amyana nzili na kumizembeleka

‘Njasa kulinga byuma byoshe mwafwa kuli umo ali na kunjana nzili.’ (Filipu 4:13) Yehova wapwa Njambi muka-nzili yoshe, co asa kumyana nzili mangana mukolese omwo muliwana na bukalu. (Isaya 40:29) Mbimbiliya ngwayo, Yehova wapwa “Njambi kuje kukatundu bukwasi bwoshe.” Co asa kutuzembeleka “mu tuyando twetu twoshe.”—2 Kolinte 1:3, 4.