Munu Wamuha Wa Mu Cibunga Ca Kutwamenena

LYA mu citatu mutondo, baka-naanga ya Mbetele ya ku America na ku Canada babwaelelele manene mubazibile ngwabo Ndolome Kenneth Cook, Jr., banamwangula kupwa umo wa mu Cibunga ca Kutwamenena ca Bakaleo ba Yehova.

Ndolome Cook wasemukilile na kukolela mu south-central Pennsylvania, ku America. Mukaleo umo yakele na nendi ikeye wamulongesele busunga te ali hayehi na kumanesa sikola yendi ya sekondali, co bamumbwitikile ha 7 June, 1980. Washangumukile cipangi ca simbu yoshe ha 1 September, 1982. Walingile bu painiya ha myaka ibali, co ha 12 October, 1984, bamulanyene kukapangela ha Mbatele ya ku Wallkill, mu New York.

Ha myaka ya kutubakana 25, ndolome Cook napangela ha Mbetele mu ma dipatimenti a kulisezaseza. Wambatele Jamie mu 1996, co bashangumikile kupangela hamo ha Mbetele ya ku Wallkill. Mu December 2009, ndolome na ndokazi Cook babatumine kukapangela ku Watchtower Educational Center ku Patterson, mu New York. Wakapangelele mu dipatimenti ya kusoneka. Mu April 2016 ndolome na ndokazi Cook mubezile ku Wallkill, babatumine lalo kukapangela ku Brooklyn, mu New York. Munima ya bingonde 5, bajalukilile ku ofisi yakama ya bakaleo ba Yehova ya mu kaye koshe ku Warwick mu New York. Mu January 2017 ndolome Cook bamwangwile kupwa mukwasi wa mu komiti ya kusoneka ya mu Cibunga ca Kutwamenena.