Viwano vya Kuya mu Lihya Vije Vitukwatha

1. Vika kwakela viwano vya kuya mu lihya?

¹ Thimbu imo, Yesu na vandongethi vendi 70 vakungulukile hamolika thimbu kanda avatume kuya na kwambulula. (Luk. 10:1-11) Wavakanyamethele na kuvaleka ngwendi kuvethi likalyavo embwe, oloni Yehova, “vavenya vimbuto” ikeye avatwamenena. Wavanene lalo mashiko aje avakwathele kupanga chipangi, cho wavatumine “vavali vavali.” Matangwa ano, viwano vitukakala navyo thimbu kanda tuye mu lihya vikapu vya kutukanyametha na kutukwatha na kutukungiya.

2. Chiwano cha kuya mu lihya chinapande kwambata thimbu ya kupwa hali?

² Chiwano cha kuya mu lihya chikambata minutu 10 nambe 15, kwakelako na kupanga vanu, na kuvana chitingitingi cha kwambulwila, na kulomba. Oloni vanatengululako mweka. Kushangumuka mu April, chiwano cha kuya mu lihya chambata minutu 5 nambe 7. Nga chipwako hanima ya viwano vikwavo vya chikungulukilo, cho chinapande kwiha manene, mwafwa vaje vakalako vanalikuu laja mithzimbu ya mu Vithoneka. Kwihitha viwano vya kuya mu lihya, kulingitha voshe vapwe na thimbu yailaja ya kupanga mu lihya. Cho lalo, nga kuli vapayiniya nambe vaka-kwambulula vaje vanashangumuka laja kwambulula thimbu kanda chiwano cha kuya mu lihya, kuvakwatha vonwe kuthzethzama.

3. Viwano vya kuya mu lihya vanatha kuvivwahetha vati vikwathe vaka-kwambulula?

³ Viwano vya kuya mu lihya vanapande kuvivwahetha vwino vikwathe vaka-kwambulula. Mu vikungulukilo vyavingi, kukapu kwakuvwa kwangununa vivunga vya vaka-kuya mu lihya kutuvakana kuvikumbathana hamolika. Oku kukwatha vaka-kwambulula kweta vwathi ku viwano vya kuya mu lihya na ku vitingitingi vivakambulwila. Vaka-kwambulula vatha kuliwana vwathivwathi, cho chipwa chachathi lalo kuli vantwama va vivunga kukwatha vaje vali mu vivunga vyavo. Mbunga ya vakulunu inapande kuwana ngila ije ipanga vwino mu chikungulukilo chavo. Thimbu kanda mushoke na lilombelo lyalihi, voshe vanapande kuthzivuka kuvakapangela na munu ivapanga nendi.

4. Mwafwa vika tunapande kumona viwano vya kuya mu lihya kupwa vya kulema ngechi mwa viwano vikwavo?

⁴ Vyalema Ngechi mwa Viwano Vikwavo vya Chikungulukilo: Viwano vya kuya mu lihya vikakwatha vaje vaya mu lihya, ngechi kethi voshe mu chikungulukilo vanapande kukalako. Echi kuchilumbununa ngwavo tunapande kumona evi viwano kupwa vyangocho ha kuvyetheketha ku viwano vikwavo vya chikungulukilo, embwe. Viwano vya kuya mu lihya vanatwanavyo kuli Yehova ngechi mwa viwano vikwavo, cho vitukwatha kulithzema umo na mukwavo na kulinga mwamuvwa. (VaHe. 10:24, 25) Muka-kutwamena napande kulivwahethela vwino mangana vivathimutwiya vithingimike Yehova na kukwatha vaje vanakunguluka. Vaka-kwambulula vaje vaya mu lihya, vanapande kukala ku viwano evi nga chinatha kulinga ngocho.

Kutwapandele kumona viwano vya kuya mu lihya kupwa vyangocho ha kuvyetheketha ku viwano vikwavo vya chikungulukilo

5. (a) Vika vyanapande kulinga ntwama wa chipangi mu kunoneka viwano vya kuya mu lihya? (b) Ndokathzi napande kutwamenena vati chiwano cha kuya mu lihya?

⁵ Vyanapande Kulivwahethela Muka-kutwamenena: Nga mushaka munu akendeke vwino ñanda yendi ku chiwano, cho munapande kumwanayo chimweja mangana alivwahethele. Omu mukemwo muchinapande kupwa na ku viwano vya kuya mu lihya. Nga vivunga vya vaka-kuya mu lihya viliwana halikalyavo, kukwatha vantwama va vivunga na vaka-kuvakwatha vatwamenene viwano vya chivunga chavo. Oloni nga chikungulukilo choshe chiliwanena hamolika, cho ntwama wa chipangi napande kwangula munu uje atwamenena chiwano. Vantwama vamo va chipangi vakana chinoneko kuli vaka-kutwamenena voshe, na kwaka chinoneka chimo ha livaya lya mithzimbu. Ntwama wa chipangi napande kwangula vwino vaka-kutwamenena, mwafwa vuvwa vwa viwano evi vwakundamena ha vutongwe vwakulongetha vwa vaka-kutwamenena. Nga kukwethi mukulunu, nambe muka-kupangela, nambe ndolome ivambwitika uje napande kutwamenena ha matangwa amo, ntwama wa chipangi natha kwangula ndokathzi ivambwitika atwamenene.—Kengeni mutwe wa “Nga Ndokathzi Ikiye Atwamenena.”

6. Vika chapwila cha kulema kuli muka-kutwamena kulivwahethela vwino?

⁶ Nga tunatambula ñanda mu Sikola ya Kulilongetha Kwambulula nambe ha Chiwano cha Vipangi, tukakako mana na kulivwahethela vwino. Kutwethi kuvandamena litangwa lituya ku chiwano athinoni tushangumuke kuthinganyeka vitukendeka. Omu mukemwo tunapande kulinga nga vanatuleke kutwamenena chiwano cha kuya mu lihya. Ha kuwana ngwe thimbu ya kutwamenena chiwano cha kuya mu lihya vanayiyitha manene, ngechi tunapande kulivwahethela vwino mangana chiwano chivwahe, na kuchishoka mu thimbu ya kutamo. Kulivwahethela vwino kunambatethelela na kutambwila chimweja chitingitingi cha kwambulwila.

7. Vyuma muka vyanatha kuthimutwiya muka-kutwamenena?

⁷ Viñanda vya Kuthimutwiya: Ndungo wa kulongwa katwanene chinoneko cha viñanda vitunapande kuthimutwiya ha chiwano na chiwano, mwafwa vitingitingi vyalithethzathethza. Chipalo chije chili na mutwe wa “Munatha Kwendeka Evi ha Chiwano cha Kuya mu Lihya,” chili na vinimbu vimo vitunatha kuthimutwiya. Kakangi echi chiwano chinapande kupwa cha kuthimutwiya. Oloni vithimbu vimo, tunatha kulinga chimwetho cha kuvwahetha vwino, nambe kumwetha vindiyo ya ha jw.org, ije inapande. Ha kulivwahethela chiwano cha kuya mu lihya, muka-kutwamenena napande kuthinganyeka vyuma vije vyatha kukakanyametha na kukwatha vaje vaya mu lihya.

Ha kulivwahethela chiwano cha kuya mu lihya, muka-kutwamenena napande kuthinganyeka vinimbu vije vikanyametha, na kukwatha, na kukungiya vaje vaya mu lihya litangwa olyo

8. Vika tunapande kuthimutwiya ha viwano vya kuya mu lihya lya Sapalalo na Chalumingo vije vyatha kutukwatha?

⁸ Chakumwenako, lya Sapalalo vaka-kwambulula vavangi vakana Kaposhi ka Kukengela na Toneni! Vavangi vaje vakayi na kwambulula lya Sapalalo, kuvethi kuya mu lihya mukati ka thimano, ngechi vanatha kwivala vingila vyakwendekelamo vivanathimutwiyiye ha Kulombela kwa Nanga. Chivwaha nga muka-kutwamenena etuluka mu ngila imo yakwendekelamo ha liputa lya mamanethelelo lya Chipangi Chetu cha Vumwene. Natha kwendeka lalo omwo twatha kulikwathetha mithzimbu ya ha vithandthzi mu kuthimutwiya mwakwanena mangazini, nambe mwakujalela mwela wa kukathimutwiya ha vungendthzi vukwavo nga natambula mangazini. Nga hali vaje vanakunguluka ku chiwano cha kuya mu lihya hali vamo vanana laja mangazini ya kwana mu ngonde, muka-kutwamenena natha kuvalomba vendekeko mukavatu vingila vivanapangetha, nambe vyakuliwana navyo vyavivwa. Cho lya Chalumingo, muka-kutwamenena natha kukavangeya ngila eyi ha kwana mavulu mu ngonde. Mavulu akulilongethamo akufwa ngwe Muthzimbu Wauvwa na Tolilileni Kuli Njambi na Bibele I lutañi tunatha kuwana ku vanu litangwa lyoshe ilyoshe. Ngechi muka-kutwamenena natha kuthimutwiya mu kwihitha mwakwanena livulu limo lya mavulu awa.

9. Vika twatha kuthimutwiya ku shongo ya thimano mu thimbu ya kampeni?

⁹ Nga chikungulukilo chili na kampeni ku shongo ya thimano, muka-kutwamenena natha kwendeka mwakwanena mangazini amaha hamolika na chilanyo, nambe tilakiti nambe kwendeka vitunapande kulinga nga tuwana munu uje navwahelela. Natha lalo kwihula vanu vendeke vyakuliwana navyo vije vimwetha vuvwa vwa kampeni.

10, 11. Nga vaka-kwambulula valivwahethela chimweja kulingitha vati chiwano cha kuya mu lihya kwenda vwino?

¹⁰ Vivanapande Kulivwahethela Vaka-kwambulula: Vaka-kwambulula vanapande kulingako vimo mangana chiwano cha kuya mu lihya chivwahe. Nga valivwahethela chimweja, mpamo ha kulombela kwavo kwa nanga, vanatha kukakanyametha vakwavo. Kulivwahethela vwino kunambatethelela na kwambatela chimweja mangazini na mavulu thimbu kanda tuye ku chiwano cha kuya mu lihya mangana twonowe kuthzethzama, oloni tuye vwathivwathi mu chitingitingi chetu.

¹¹ Kwapwa kwakuvwa lalo kulivanga kweta ku chiwano cha kuya mu lihya thimbu kanda chiwano chishangumuke. Tuvavoshe twashaka kulivanga kweta ku viwano vyoshe vya chikungulukilo. Oloni kukotokela kweta ku chiwano cha kuya mu lihya kunatha kutanganetha vyuma. Mu ngila muka? Muka-kutwamena chiwano akatala ha vyuma vyavingi thimbu kanda apange vaje vanakunguluka. Nga kunaija vaka-kwambulula vavandondo lika, natha kuvaleka vakapengele mu chitingitingi chije vanambulwila kamandondo. Nga vamo vanende hathi kwakweta ku chiwano cha kuya mu lihya, cho chitingitingi cha kwambulwila lalo chili kulyala, muka-kutwamenena natha kuvapanga na vaje vali na minyau. Nga mu chitingitingi muli manene vutothzi, cho natha kwangula vandolome vapangele hamo na vandokathzi, nambe kupangela muyehi navo. Vaka-kwambulula vaje vavinja vanatha kuvangula vapangele kuje kukwethi vingulunga nambe ku vinjuvo kwakujeneka vindondelo. Vaka-kwambulula vavaha vanatha kuvapanga hamolika na vaka-kwambulula vakuhya. Nga vaka-kwambulula vakotokela, kulingitha muka-kutwamena awane ngila yeka nambe kuwana veya vanapade kupangela hamolika na vaje vanakotokela. Thimbu imo tukakotokela mwafwa ya vyuma vimo. Oloni nga kapwa kalingolingo ketu, cho tunatha kulihula tumone nambe ngwe tuli na kwombwanetha evi viwano vya kuya mu lihya, indi mpamo kutwethi kulivwahethela chimweja.

12. Vika vimunapande kulinga nga mwangwila chimweja vanu va kupanga navo?

¹² Vaka-kwambulula vaje vakunguluka ku chiwano vatha kwangwila chimweja munu ivakapanga nendi thimbu kanda chiwano chishangumuke, nambe kuvandamena vavane munu wa kupanga nendi. Nga mwangwila chimweja munu wa kupanga nendi, cho munapande kupanga na vaka-kwambulula va kulithethzathethza kethi kupanga lika na vavuthamba veni thimbu yoshe. (2. Koli. 6:11-13) Mwatha kupanga na muka-kwambulula wamuha mangana mumukwathe kuvwethzelela ku vutongwe vwendi vwa kulongetha ndi? (1 Koli. 10:24; 1 Tim. 4:13, 15) Munapande kutolilila vwino ku mashiko avamyana na kuthzivuka hamunapande kushangumukila kwambulula. Hanima ya chiwano, kethi mutengulule muvanavwahethela vyuma, oloni yeni ku chitingitingi vwathivwathi.

13. Nga vaka-kwambulula voshe vakako mana na kulinga vinavapande, cho viwano vya kuya mu lihya vitukwatha vati?

¹³ Hanima ya kwambulula, vandongethi 70 vaje Yesu watumine “velukile lalo na kujolela kwakama.” (Luk. 10:17) Chiwano chalingile navo Yesu thimbu kanda vaye mu lihya chavakwathele vapange vwino. Netu matangwa ano, viwano vya kuya mu lihya vyatha kutukwatha. Nga vaka-kwambulula voshe vakako mana na kulinga vinavapande, cho viwano vya kuya mu lihya vitukanyametha na kutukwatha na kutukungiya mangana tushulithilile chipangi chetu cha kwana “vukaleo ku miyati yoshe.”—Mat. 24:14.

Nga Ndokathzi Ikiye Atwamenena

Ndokathzi napande kulithzitika chitambala ku mutwe, cho napande kutumbama omwo atwamenena chiwano cha kuya mu lihya. Viñanda vyathimutwiya vinapande kulifwa nevi vyanethi kuthimutwiyiye ndolome. Kapandele kumwetha ngwe ali na kushika vaje vanakunguluka, oloni napande kuthimutwiya navo. Nga alanya ndokathzi mukwavo wa kumbwitika alombe, cho nendi napande kulithzitika chitambala ku mutwe. Nga ndolome wa kumbwitika nete oku chiwano chinashangumuka laja, ndokathzi natha kumulanya atwamenene chiwano. Ntwama wa chipangi napande kuthungametha vwimo vyuma mangana vyende mwamuvwa kwakujeneka kulipyakana. Chakumwenako, thimbu imo ndolome wa kumbwitika wa mwanike manene natha kupwa ku chiwano chije chivakatwamena kuli ndokathzi, oloni vakulunu vanamono ngwavo kanda ete ha kutwamenena chiwano. Nga chili ngocho, ntwama wa chipangi atha kuvaleka ngwendi ndokathzi atwamenene ngano chiwano, oloni uje ndolome wa mwanike ikeye napande kulomba nga vakulunu vanamono ngwavo napande. Ku chiwano kunatha kupwa lalo ndolome uje ivavyanetha kutwamenena chiwano, nambe kulomba mu chikungulukilo mwafwa ya vyuma vimo vivanathzivuka vakulunu. Vakulunu kethi vajombolole viñanda vya kushweka, oloni vanapande kuleka vandokathzi vaje vavanangula vatwamenene na kulomba nambe ou ndolome kwali. Vakulunu vanatha kuleka ou ndolome matangwa aje avanana vandokathzi kutwamenena viwano vya kuya mu lihya.

Munatha Kwendeka Evi ha Chiwano cha Kuya mu Lihya:

Vingila vyakwendekelamo vije vili mu Chipangi Chetu cha Vumwene.
Vindiyo ya ha jw.org ije ili na vinimbu vyakwambulwilamo.
Vingila vyakwendekelamo vyakufwa ngwe, mwakushangumukila kwendeka, mwakujalela mwela wa kukathimutwiya ha vungendthzi vukwavo, nambe mwakulekela munu vya milambu nga atambula livulu.
Kutanda chithoneka chachivwa chije chinakundama ku chipangi cha mu lihya.
Vyakuliwana navyo vya mu lihya vya mu chitingitingi cheni nambe vije vivanathoneka mu mavulu.
Viñanda vya mu Chipangi Chetu cha Vumwene.
Viñanda vitunathzivi ololo ha Chiwano cha Vipangi.
Viñanda vya kukundama ku chipangi cha kwambulula vya mu Kaposhi ka Kukengela.
Viñanda vya kukundama ku chipangi cha kwambulula vya mu Sikolo sa Bukombwa na “Come Be My Follower.”
Vyuma vimo vya ha jw.org vije twatha kupangetha ku chipangi cha kwambulula.
Vyuma vimo vya mu Mbimbiliya yaiha ya New World Translation vije twatha kupangetha ku chipangi cha kwambulula.
Mwakushangumukila kwendeka na munu imuwana mu chitingitingi cheni uje kavatavele ngwendi Njambi kwali, na uje wamona ngwendi vyuma vyalithzililile vivenya na kaHindu, nambe kaBuddha.
Mwakukumbulwila munu uje ashaka kumyonowetha kuthimutwiya.
Mwakukwathela munu imupanga nendi mu lihya ambulule vwino muthzimbu.
Mwakulingila nga tuliwana na munu uje endeka ndaka yeka.
Mwakupangethela vingila vimo vyakwambulwilamo vije vatha kupangetha vakwetu, vyakufwa ngwe chipangi cha kutonda vanu, na kwambulula ha foni, na kwambulula ku mbunga, na mangendthzi a kwilukila, nambe vilongetha vya Mbimbiliya.
Mwakulinyungila ku vushonde, na kupwa va kuvothsiya, na kumwetha kathingimiko, na kupwa va ndthzandthzu, na vilinga vyeka vyachifwa echi.