Byuma Bitukwasa Tulikuwe Ciwano ca Kuya mu Lihya

Yehova ikeye akatubwahesela biwano bya kuya mu lihya, co bikatukwasa tumwese cizemo ku bakwetu na kulinga mwamubwa, ngeci mwa biwano byoshe bya cikungulukilo. (Hev 10:24, 25) Ebi biwano binapande kupwa bya minutu 5 nambe 7, co omu mu minutu mukemwo mu munapande kutepa banu na kubaleka kwakupangela na kulombela. (Nga ciwano ca kuya mu lihya cikalako hanima ya kukunguluka, co cinapande kupwa cacihi manene) Muka-kutwamenena ciwano napande kwendeka biñanda bije bikwasa banu baya mu lihya ha litangwa lije bene. Cakumwenako, lya Sapalalo, nga baka-kwambulula kubapangele mu lihya mukati ka calumingo, co tunasa kusimutwiya bitunapande kwendeka ku banu batwambulwila. Byuma muka bikwabo bitwasa kusimutwiya?

• Bingila bya kwendekelamo bili mu Mukanda wa Biwano wa Buyoye Bwetu Baka-Kilistu na Cipangi Cetu

• Mwakushangumukila kusimutwiya na munu kupangesa byuma binalingiwa ololo nambe muzimbu wa ha cisanzi

• Mwakukumbulwila munu uje ashaka kumyonowesa kwendeka

• Mwakushangumukila kwendeka na munu uje kakulahelele ngwendi Njambi kwali, nambe uje wamona ngwendi byuma byalizilile, nambe uje akendeka ndaka yeka, nambe uje wakala mu bulombelo buje kubwalisalele mu citingitingi ceni

• Mwakupangesela byuma bimo bili ha webusaiti ya jw.org, nambe ha JW Library^® app nambe mu Mbimbiliya

• Mwakupangesela cikwata cimo ca mu Bikwata bya Kupangesa mu Kulongesa

• Mwakupangesela bingila bimo byakwambulwilamo, byakufwa ngwe kwambulwila ha foni, kwambulula kupangesa mikanda na kwambulwila ku mbunga, na mangenzi a kwilukila, nambe bilongesa bya Mbimbiliya.

• Mwakulinyungilila ku bushonde, mwakutengulwilatengulwila ku bingila bya kwendekelamo, mwakumwesela kasingimiko, mwakukela na bisinganyeka byabibwa ha banu batwambulwila nambe byuma byeka byakulifwako nebi

• Kusimutwiya ha cilongesa nambe vidio ya mu broshuwa ya Aka Mana ku Kutanda na Kulongesa

• Mwakukwasela munu imupanga nendi mu lihya

• Kutanda cisoneka cije cinakundama ku cipangi ca mu lihya nambe kwendeka cakuliwana naco cacibwa cinakundama ku cipangi ca kwambulula