Vyanukitho vya Chiwano Chakama

Thimbu ya Kukunguluka: Vikolo vikashokoloka na thimbu ya 7:00. Myatho ya maputukilo ishangumuka na thimbu ya 8:20 ha matangwa oshe atatu. Ha thimbu eyi tuvavoshe tunapande kutumbama mu vitumbamo vyetu mangana kukunguluka chishangumuke mu ngila ya kathingimiko. Lya Chitanu na lya Sapalalo, kukunguluka chikahwa na thimbu ya 16:00, cho lya Chalumingo chikahwa na thimbu ya 15:00.

‘Imbeni Myatho ya Kushangathzala Yehova’: Vanu va Njambi va kuthañulu vashangathzalele Yehova na myatho, ngechi myatho yapwa chuma cha kulema mu vulombelo vwa vuthunga matangwa ano. (Mya. 28:7) Mutamba na mutamba wa chiwano chetu cha mutambela ukashangumuka na myatho. Eyi kethi myatho ya ngocho embwe, oloni itukwatha tunanguke vya Yehova na kumulemetha. Nga cheyamani atambeka ngwendi myatho ololo ishangumuka kwimba, cho tunapande kutumbama na kutolilila vwino ku myatho, kethi thimbu ya kuthimutwiya embwe. Nga tulinga ngocho, cho tumwetha kukandelela kwetu ku chivunga cha vaka-kwimba myatho ya vimbendo. Ava vandolome na vandokathzi vakapangetha vimbongo vyavo kuya ku Patterson, New York luvali mu mwaka mangana vakatwimbile myatho yaivwa ije itwatha kulikuwa. Hanima ya kutolilila vwino ku myatho ya maputukilo, voshe vanapande kushangathzala Yehova mu kwimbila hamo myatho yetu ya Vumwene.

Kwakukundikila Minyau: Ha myela yoshe ya viwano vyakama hakala noku kwakukundikila minyau, cho myela ikapu ya vwana. Ngechi mwatha kuwana kwa kukundika nga mulivanga. Hakuwana ngwe myela yakukundikila minyau yapwa yayindende, ngechi tuli nakumilomba mukalikumbathane navakweni nakupangetha munyau umo lika. Munapande kukakavangeya vyuma vakamileka vandolome vaje vakamileka kwakukundikila minyau nambe kinga yeni.

Kunyunga ha Kutumbama: Kumwapandele kulithzungilila ha kwangula myela ya kutumbama, mwafwa echi chikasholola ngwe muli nakulilwitha navakweni. Kukala na mbunge ya kulyana yije yitulingitha tuvwahethe vakwetu kutuvakana etu vavenya kutusholola kupwa tu vaka-Kilisitu va vuthunga, cho kukalingitha vanu vashangathzale Njambi. (Yow. 13:34, 35; 1 Koli. 13:5; 1 Pet. 2:12) Mwatha kunyungila myela yakutumbama vaje vamunaija navo mu munyau, nambe vaje vamwakala navo hembo, nambe vamukalilongetha navo Mbimbiliya. Kethi muthikinine vakweni na ma ambulela eni nambe vyuma vyeka vije viminenela muthdzithdze. Munapande kushakula vwino chela chakwaka vyuma vyakufwa ngechi. Lihuleni ngweni: Kutala vyuma vinjishaka kulinga vithikinina vakwetu nakuvalingitha vajeneke kulikuwa chiwano tahi? Kuli mwela uvanavwahethela tukulukathzi na vaje vavinja. Ha kuwana ngwe mwela ou waundondo, ngechi kavushoko umo lika nambe vavali vakeko vanapande kutumbama navo.

Thzalethi Yaivwa: Ha thimbu ya chiwano, tunapande kuthzala mwamuvwa, kethi kukavangeya thzalethi yaivi ya mu kaye. (1 Tim. 2:9) Thzalethi yetu inapande kupwa ya kathingimiko na mu thimbu ya kuya na kulya ku vitanda na mu kupashala thimbu kanda chiwano chiputuke nambe hanima yacho. Ngechi, tupwa vakuthzituka kuthzala tuthzivukitho twetu twa chiwano, cho kututhzivi shwamwa ya kwambulula nga tunatulukwa munu. Sholwethi yetu na vilinga vyetu mu thimbu ya viwano, kulingitha vanu vavimbunge vyavivwa vatolilile ku muthzimbu wa mu Mbimbiliya uje ukavovola, cho lalo kuthzivitha Yehova kuvwaha.—Zef. 3:17.

Pangetheni Vinoma Vyeni mu Ngila Yaivwa: Tumwetha ngwetu tunaka vakwetu mu vithinganyeka nga mafoni etu, nambe vinoma vikwavo kuvyethi nakutangula vakwetu ha chiwano. Nga tuli na kupangetha kamela, nambe likina lya vindiyo, nambe tambuleti na vinoma vyeka, tunapande kwaka vakwetu mu vithinganyeka kutewa tuvatanganetha nambe kuvathzikinina. Tusholola ngwetu twathingimika vakwetu nga tujenjuka ku kulitumina mithzimbu mu thimbu ya kukunguluka.

Vyakulya vya Mutanya: Lyambateleni vyakulya vyeni mangana mwakulile ha mwela wa chiwano kutuvakana kuthethza kuya kweka mu shakathzeka vyakulya ha thimbu ya kuhwima. Munatha kwambatela mu chizuma chije chatha kukala kuyehi neni nambe mwithi ya chitwamo cheni. Kumwapandele kwambata vitenga vije vyatha kutavuka vwathi, vyakufwa ngwe vinganja na malonga a vuma nambe a ngilazi. Munapande kukambata vyakulya vije vikathalaho nambe mathilo eka mangana mukavyumbilile kwimbo lyeni nga chatha kukalinga ngocho.

Milambu: Tusholola ngwetu twakandelela ha chiwano chivanatuvwahela nga twana milambu ya kulyanukila ku chipangi cha mu kaye koshe ha thimbu ya chiwano. Macheki oshe munapande kuwatuma ku “Watch Tower Society.”

Vyemba: Lyambateleni vyemba vyeni nga mwavinja, mwafwa kukukakala vyemba vya chifwa echi ku chiwano. Munapande kumbila vinguya na mavotela a vyemba mu vwina vuje vunapande, kethi mu vwina vwoshe ivwoshe vuli ha chiwano.

Kulinyunga ku Vimonde: Tumyanukitha ngwetu munapande kulinyunga kutewa mulivulumuna ha kuthenunuka nambe kutanuka. Mwaka na mwaka vavangi vakavulumuka mwafwa ya kuthzala vikatulo vya vilaja. Chikavwaha nga mukathzala vikatulo vije vinapande, vije kuvyatha kumyana vukalu ha kwenda mu mingulunga, nambe kulonda ha vindondelo. Vithemi vanapande kukanyunga vana vavo kutewa valivulumuna nambe kuvulumuna vakwavo. Vithemi vanapande kukwatha vana vavo nga vali nakuluwanganetha vakwavo.

Vitumamo vya Kuthindumwina va Mbututu: Vitwamo vya kuthindumwina va mbututu kumwapandele kuvyaka mu ngila, oloni mwatha kuvyaka kuyehi neni vithemi vendi.

Mathzi a Kunika: Tumwetha ngwetu twathzema vakwetu nga kutulikwiti mathzi a kunika manene aje atha kunena vukalu ku vakwetu vaje vali na mishongo ya mu nulo na mishongo yeka.—1 Koli. 10:24.

Mafomu a Shangwe Mu Mu Potele (S-43): Munapande kuthoneka fomu ya Shangwe Mu Mu Potele nga muwana munu uje navwahelela imunambulwila chintulu ha thimbu ya chiwano. Mafomu oshe avanathoneka laja vanapande kuwatwala Mulili wa Mavulu nambe kuli muka-kuthoneka wa chikungulukilo cheni omwo mwiluka ku membo.

Vitanda vya Kulila na Vyela Vyeka: Vilinga vyeni vinapande kuthingimika lithzina lya Yehova nga muli ku vitanda cha kulila na ku vyela vyeka. Shololeni mbunge ya kathingimiko nga muli mu munyau nambe muli nakwenda mu ngila. Thzaleni mu ngila ije inapande muka Kilisitu.

Kumbwitika: Vaka-kukopa mithzithzime kuvapandele kulichikinina ku mwela wa kumbwitikila vanu. Cho nawa vanike kuvapandele kwehela kumwela ou. Vaje vashaka kumona muvambwitika vanu vanapande kwimanena halako mukathingimiko. Vanike vanapande kukala na vithemi vavo nambe mukulunu weka uje avakandangeya.