Mwakupangethela Majwi a Kutolilila Avanatanda Mwamuvwa
1. Viñanda muka vikwavo viliko vya kuvwethzelela ku mavulu vije vyatha kutukwatha?
1 Vanu vavangi vashaka manene kutanda viñanda vya kuthzembeleka vya vuthunga vya ha jw.org. (Kwambu. 12:10) Yenicho mwapangethaho laja majwi a kutolilila avanatanda mwamuvwa ndi? Nga mulinga ngocho, cho mutolilila ku viñanda vyavingi vili ha wembusaiti yetu. Majwi a kutolilila avanatanda mwamuvwa atha kutukwatha vati?
2. Tunatha kupangetha vati majwi a kutolilila avanatanda mwamuvwa ha chilongetha cha munu likalyendi nambe cha nanga?
2 Vitukwatha mu chilongetha cha munu likalyendi Nambe cha Nanga: Kutolilila ku viñanda vivanatanda mwamuvwa vya mu Mbimbiliya na vya mu mangazini nambe mu mavulu eka oku tuli mu vungendthzi nambe oku tuli na kupanga, kutukwatha kupangetha thimbu mwamuvwa. (Efeso. 5:15, 16) Thimbu imo ha kulemetha kwa nanga, tunatha kutolilila ku viñanda evi oku netu tukavangeya mu mavulu etu. Nga tutolilila ku majwi avanatanda mwamuvwa ha chilongetha cha munu likalyendi, cho twatha kulilongetha kutanda mwamuvwa nambe kulilongetha kwendeka muyati uje kututhzivuka.
3. Veya vatha kuwana vukwathi ku majwi a kutolilila avanatanda mwamuvwa mu chitingitingi chetu?
3 Mu Lihya: Vanu va mu chitingitingi chetu vaje vathinganyeka ngwavo kuvethi na thimbu ya kutanda, vanatha kushaka kutolilila ku majwi avanatanda mwamuvwa. Thimbu imo tunatha kuwana munu uje endeka muyati weka, oloni ashaka kuthziva muthzimbu wa Vumwene “mu ndaka yendi vavenya.” (Vili 2:6-8) Ku vithemwa vya mu mitambela imo, kutolilila chapwa chuma cha kulema kutuvakana kutanda. Cha kumwenako, mu chithemwa cha vaHmong, vakulunu vakaleke vanike kwitila mu mithzimbu. Muno mu Africa vanu vavangi vakalilongetha vyuma kwitila mu mithzimbu.
4. Vihula muka vitunatha kulihula vije vitukwatha kuthzivuka mwakukwathela vanu va mu chitingitingi chetu?
4 Ngila muka yatha kupanga mwamuvwa mu chitingitingi cheni? Kuthzivitha vavenya njuvo majwi a kutolilila avanatanda mwamuvwa ndi? Kutumina munu livulu livanatanda mwamuvwa ha likina ndi? Indi kwaka livulu livanatanda ha CD na kwambata livulu halyo cho kuvitwalela vavenya njuvo? Kwana munu livulu lya mutunu livanatanda nambe mbuloshuwa nambe mangazini nambe tilakiti, kulifwa na kumwana livulu halyo. Majwi a kutolilila avanatanda mwamuvwa vanawavwahethela kuwapangetha ha chilongetha chetu cha ha kapandi na mu kukuna mbuto ya Vumwene.—1 Koli. 3:6.