AKENI MBUNGE KU CIPANGI CA KWAMBULULA | BYUMA BIMIKWASA MULIKUWE CIPANGI CA KWAMBULULA
Kukala na Mema ku Mbunge
Kukala na mema ku mbunge kulumbununa kuzibisisa mubali na kusinganyekela bakwetu, nomwo mubali na kulizibila na kunanguka byuma bibamona kupwa bya seho na bujene bubali nabwo. Nga tumwesa bakwetu mema ku mbunge, co nabo bananguka ngoco. Nga tumwesa mema ku mbunge banu batwambulwila, co tuli na kutembwinina cizemo na ngozi ya Yehova, co lalo oku kulingisa banu bapwe babusamba bendi.—Fil 2:4.
Kumwesa mema ku mbunge kuyapwile lika ngila itukambulwilamo, oloni tunapande kuamwesa mu bilinga byetu. Mutwendekela, mututolilila, mutupangesela bilyo bya mubila na sholwesi ya cihanga cetu bikebyo bimwesa indi tuli na mema ku mbunge nambe embwe. Nga twaka mbunge bakwetu, co tumwesa ngwetu tuli na mema ku mbunge. Tunapande kuzibuka byuma bibashaka, byuma bibakulahela na bukalu bubali na kuliwana nabwo. Tunapande kubalekako byuma bimo bibakwasa, oloni kutwapandele kubasindiya ngwetu batenguluke. Tubwahelela manene mu cipangi cetu ca kwambulula nga banu batwambulwila bapangesa bitunabalongesa.
KENGENI VIDIO YA KUPWISA BANU BANDONGESI KUMILINGISA MUBWAHELELE—BWEZELELENI KU BUTONGWE BWENI—KUKALA NA MEMA KU MBUNGE. KUTUNDAHO, KUMBULULENI BIHULA BINATAKO:
Jade mwanakotokelele, Neeta namumwesele bati mema ku mbunge?
Neeta na mwesele bati mema ku mbunge mwanamuleke Jade ngwendi najuka manene, co kasa kulilongesa?
Nga tumwesa banu mema ku mbunge, co tubakwasa bapwe babusamba ba Yehova
Neeta namwesele bati Jade mema ku mbunge mwanamuleke ngwendi kasa kubwahesa mwamubwa byuma?