Byeseko Byoshe Bikete ha Kuhwa

Byeseko byasa kutuzeyesa, maneneni nga kubihu bwasi. Nameme Mwene Saulu walwisile Ndabiti ha simbu yailaha, oloni Ndabiti wazibukile ngwendi bukalu bwendi tangwa bukahwa. Co lalo akapwa mwene ngwe mwamukulaheselele Yehova. (1 Sa 16:13) Likulahelo lya Ndabiti lyamukwasele akwate mbunge na kwaka byuma byoshe mu maboko a Yehova.

Yehova natwana cashu ca kusinganyeka. Ngeci, nga tuli mu bukalu twasa kupangesa mana na cashu cetu ca kusinganyeka mangana tutepululeko ku bukalu bwetu. (1 Sa 21:12-14; Vis 1:4) Oloni bukalu bumo anga bucinasa kutwalelelaho nameme tuneseka mutunasela kutepululako kwa kujeneka kupokola mashiko a Yehova. Nga bukalu bwetu kubuhu, tunapande kukala na mbunge ya kubandamena na kukulahela Yehova. Ololo amanesa tuyando twetu twoshe na ‘kusikumuna misozi yoshe’ ku mesho etu. (Kuj 21:4) Nameme nga Yehova ikeye amanesa bukalu bwetu nambe indi hamo buhwa mwafwa ya byuma byeka, oloni kuzibuka ngwetu bukalu bwoshe bukete ha kuhwa, kutuzembeleka.

KENGENI VIDIO YA BYAHI BYASA KWONOWESA BANU BA YEHOVA KULIKWATASANA. KUTUNDAHO, KUMBULULENI BIHULA BINATAKO:

• Bukalu muka bubaliwanene nabwo bandolome na bandokazi baku mbwela ya ku United States?

• Bamwesele bati cizemo na mbunge ya kubandamena?

• Bika byabakwasele bake mbunge ku ‘byuma bya seho’?—Fil 1:10