YOYESI YA BAKA-KILISTU
Yehova Akatukwasa Mutukaliwana na Byeseko
Tuli na kuliwana na bukalu bwabwingi muno mu matangwa a kukotoka. Bisimbu bimo tunasa kuliziba ngwetu byeseko bituli na kuliwana nabyo byabingi manene, co kutwasa kukolesa. Oloni nga tutwalelelaho kushwenya kuli Yehova, atukwasa tukolese nameme tuliwane na bukalu buje butuzibisa manene kubabala ku mbunge. (Isa 43:2, 4) Twasa kushwenya bati kuli Yehova nga tuliwana na byeseko?
Lilombelo. Nga tulombela kuli Yehova na kumuleka bukalu bwetu, atukwasa kukala mu kwoloka na kukolesa.—Flp 4:6, 7; 1Te 5:17.
Biwano. Ino ikeyo simbu itutonda manene kulya byakulya bya ku sipilitu na kulikwatasana na bandolome na bandokazi betu ku biwano byakatubwahesela Yehova. (Heb 10:24, 25) Nga tulibwahesela-bwahesela biwano na kukunguluka simbu yoshe, na kukalako na mutamba mu biwano, co sipilitu ya Yehova itukwasa manene.—Kuj 2:29.
Kwambulula. Kuzezama mu cipangi ca kwambulula kutulingisa twake manene mbunge ku byuma byabibwa. Kutukwasa lalo kukanyamesa busamba bwetu na Yehova nobo batupangela hamo nabo.—1Kr 3:5-10.
KENGENI VIDIO YA YEHOVA AMIKWASA. KUTUNDAHO, KUMBULULENI BIHULA BINATAKO:
Bika byakwasele Malu atwaleleleho kukala muyehi na Yehova mwaliwanene na byeseko?
Majwi ali ku mukanda wa Myaso 34:18 asa kutuzembeleka bati nga twaliwana na byeseko, ngwe mwazembelekelele Malu?
Byaliwanene nabyo Malu bimwesa bati ngwabyo Yehova asa kutwana ‘nzili ije itubakana nzili ya bunu’ nga twaliwana na byeseko?—2Kr 4:7.