Yehova Akatukwasa Bati Tukolese?

1. Mwafwa bika kwapwa kwakukalu kutwalelelaho kukolesa kweta na kushongo, co iya asa kutukwasa tukolese? (1 Pita 5:10)

TUBABOSHE tukaliwana na bukalu bwa kulisezaseza. Ngeci simbu imo, tunasa kuliziba ngwetu kutwasa kukolesa kweta na kushongo. Bamo banababala ha simbu yailaha. Bamoco banatsisa babushoko bwabo baje babazema. Co lalo bamo bali na kubayandesa kuli baka-naanga yabo nambe baka-fulumende. (Mate 10:18, 36, 37) Nga muli na kuliwana na bukalu bwa cifweci, co kulaheleni ngweni Yehova amikwasa mukolese mu bukalu bwoshe-bwoshe bumuli na kuliwana nabwo.—Tandeni 1 Pita 5:10.

2. Iya akatwana nzili mangana tukolese?

² Kukolesa kulumbununa kutwalelelaho kupwa ba kulongwa kuli Yehova na kumupangela mu kubwahelela nameme tuli na kuliwana na bukalu, nambe bali na kutuyandesa nambe nga tuliwana mu ceseko ca kulinga bubi. Ngeci hakulinga mangana tukolese, tunapande kukulahela ngwetu byuma bikala mwamubwa. Kukolesa kwetu kukwemanene ha nzili yetu babenya, oloni kukatundu kuli Yehova uje asa kutwana “nzili ya kutubakana nzili ya bunu.” (2 Kori 4:7) Muno mu cilongesa, tusimutwiya ha byuma biwana bya natwana Yehova bije bitukwasa tukolese. Tulilongesa lalo byuma bitunapande kulinga mangana tuwane bukwasi ku byuma bya natwana.

LILOMBELO

3. Mwafwa bika twendeka ngwetu lilombelo lyapwa bwana bwa kukomokesa bwa kutunda kuli Yehova?

³ Yehova natulingila cuma ca kukomokesa cije citukwasa tukolese. Nameme twapwa tu baka-bubi, Yehova natutabesa kusimutwiya nendi, co akatutolilila. (Hebe 4:16) Cakumwenako, twasa kulombela kuli ikeye simbu yoshe-yoshe na kumuleka byoshe-byoshe bili ku mbunge yetu. Asa kutuziba nga tulombela kuli ikeye mu ndaka yoshe-yoshe, kwoshe-kwoshe kutuli, nameme nga tuli likalyetu nambe tuli mu kamenga. (Jona 2:1, 2; Bili 16:25, 26) Nga munalishoshomwena, co kumwesi na bya kwendeka mu lilombelo, Yehova amizibisisa, co azibuka byuma bimushaka kwendeka. (Loma 8:26, 27) Mwa busunga, lilombelo lyapwa bwana bwa kukomokesa bwa kutunda kuli Yehova.

4. Mwafwa bika twendeka ngwetu malombelo etu a kulomba Yehova mangana atukwase tukolese analitombola na cizango cendi?

⁴ Kwitila mu Lijwi lyendi Mbimbiliya, Yehova natukulahesa ngwendi: “Cuma coshe citulomba kwesekesa na cizango cendi atuziba.” (1 Iwa 5:14) Kuma twasa kulomba Yehova mangana atukwase tukolese ndi? Eyo. Mwafwa kulinga ngoco kunalitombola na cizango cendi. Mwafwa bika twendeka ngoco? Mwafwa nga tutwalelelaho kukolesa mu byeseko, co tulingisa Yehova ase kukumbulula Satana Liyabolo uje ali na kumushendumuna. (Prov 27:11) Co lalo, Mbimbiliya inendeka ngwayo Yehova ashaka “amwese nzili baje banakulahela kuli ikeye na bimbunge byabo byoshe.” (2 Kolo 16:9) Ngeci twasa kukulahela ngwetu Yehova ali na nzili na lishungu lya kutukwasa tukolese.—Isaya 30:18; 41:10; Luka 11:13.

5. Lilombelo likatukwasa bati tukale mu kwoloka? (Isaya 26:3)

⁵ Mbimbiliya inendeka ngwayo nga tulombela kuli Yehova, co “kwoloka kwa Njambi kuje kunatubakana kuzibisisa kwoshe kunyunga bimbunge [byetu] na bisinganyeka [byetu].” (Filp 4:7) Singanyekeseseni ha cuma eci. Banu baje kubesi kupangela Yehova bakaliwana na bukalu bwabwingi, co bakatondo bingila bije bibakwasa bakale mu kwoloka kwa mu bisinganyeka. Cakumwenako, bamo bakapangesa bingila bije binasa kubakobelesa mu bushonde ku sipilitu na kulingisa badimona base kubatwamenena. (Esekeseni Mateu 12:43-45.) Nameme nga banu bakala mu kwoloka mwafwa ya kupangesa ebi bingila, kubasa kukala mu kwoloka kwa busunga kuje kukatundu kuli Yehova. Nga tulombela kuli Yehova tumwesa ngwetu twamukulahela manene, co atukwasa tukale mu “kwoloka simbu yoshe.” (Tandeni Isaya 26:3.) Ngila imo mwakatwanena kwoloka Yehova, inapu kutwanukisa bisoneka bije bituzembeleka. Ebi bisoneka bikatwanukisa ngwabyo Yehova watuzema, co ashaka kutukwasa. Ngeci oku kukatulingisa tukale mu kwoloka.—Samu 62:1, 2.

6. Byuma muka bimwasa kwendeka mu malombelo eni? (Taleni na cikupulo.)

⁶ Bimwasa kulinga. Nga muli mu bukalu, lekeni Yehova mwoshe mumuli na kulizibila. Co ‘umbileni citele ceni hali Ikeye’ na kumulomba amyane kwoloka. (Samu 55:22) Mulombeni lalo amyane mana aje amikwasa muzibuke byakulinga nga muli mu bukalu. (Prov 2:10, 11) Co lalo keti mwibale kukandelela Yehova mu malombo eni. (Filp 4:6) Singanyekeseseni mwali na kumikwasela Yehova mukolese ha litangwa na litangwa na kukandelela ku bukwasi bwendi na ku byuma byabibwa byali na kumyana. Keti mutabese byeseko bimibalese byuma byabibwa bya namyana Yehova.—Samu 16:5, 6.

LIJWI LYA NJAMBI

7. Kulilongesa Mbimbiliya kutukwasa bati tukolese?

⁷ Yehova natwana Lijwi lyendi mangana litukwase tukolese. Mu Mbimbiliya muli bisoneka byabingi bije bitukwasa tukulahele ngwetu Yehova atukwasa. Tucisimutwiyeni ha cakumwenako cimo. Mukanda wa Mateu 6:8, wendeka ngwawo: “Ishweni azibuka byuma bimutonda nameme simbu kanda mumulombebyo.” Yesu ikeye wendekele awa majwi, co azibuka mwamubwa Yehova kutubakana munu woshe-woshe. Ngeci twasa kukulahela ngwetu nga tuliwana na tuyando, Yehova azibuka mwamubwa byuma bitutonda, co atukwasa. Mu Mbimbiliya munashulu bikulaheso byabibwa bya kutunda kuli Yehova bije bitukwasa tukolese nga tuli mu bukalu.—Samu 94:19.

8. (a) Cinangulo muka cimo ca mu Mbimbiliya cije citukwasa tukolese? (b) Bika byasa kutukwasa twanuke binangulo bya mu Mbimbiliya ha simbu itubitonda?

⁸ Binangulo bya mu Mbimbiliya byasa kutukwasa tukolese. Ebi binangulo byasa kutwana mana aje atukwasa twangule mwamubwa byakulinga. (Prov 2:6, 7) Cakumwenako, Mbimbiliya ikatushongangeya ngwayo tukulahele Yehova ha litangwa na litangwa kutubakana kulishoshomwena ha byuma bilingiwa kulutwe. (Mate 6:34) Nga mulizilisa kutanda Mbimbiliya ha litangwa na litangwa na kusinganyekesesa ha byuma bimutanda, co kumipwila kwakwasi kwanuka binangulo bya mu Mbimbiliya ha simbu imubitonda.

9. Mizimbu ya mu Mbimbiliya itukwasa bati tukulahele manene ngwetu Yehova atukwasa?

⁹ Mu Mbimbiliya muli mizimbu ya banu baje bakulahelele Yehova na kutambula bukwasi bwendi. (Hebe 11:32-34; Jems 5:17) Nga tusinganyekesesa hali ei mizimbu, co tukulahela manene ngwetu Yehova wapwa “butewelo bwetu na nzili yetu. Nalibwahesela kutukwasa simbu yoshe ituliwana na bukalu.” (Samu 46:1) Kusinganyekesesa omwo bangamba ba Yehova ba kunima bamweselele likulahelo kuli ikeye na kutwalelelaho kumupangela nameme bakele na kuliwana na bukalu, kutushongangeya tubatembwinine.—Jems 5:10, 11.

10. Bika bimunapande kulinga mangana Mbimbiliya imikwase manene?

¹⁰ Bimwasa kulinga. Tandeni Mbimbiliya ha litangwa na litangwa na kusoneka mukana wa mavesi aje asa kumikwasa. Bandolome na bandokazi bakatanda Cisoneka mu libulu lya Kwilula Bisoneka ha Litangwa na Litangwa, mutondo. Ngeci oku kukabakwasa bawane majwi a mu Mbimbiliya abasa kusinganyekesesa ha litangwa lyoshe lyamutunu. Ebi bikebyo byakwasele ndokazi Mariea mwakele na kunyunga baina na baishe baje bakele na kubinja mushongo wa kansa. Ndokazi Marie wendekele ngwendi: “Ha litangwa na litangwa mutondo, njakele na kutanda cisoneka ca mu libulu lya Kwilula Bisoneka ha Litangwa na Litangwa na kusinganyekesesa ha byuma binjinalilongesa. Kulinga ngoco, kwakele na kunjikwasa njisinganyekesese hali Yehova na byuma byabibwa byakatulongesa mu Lijwi lyendi ha litangwa na litangwa kutubakana kwaka lika mbunge ku bukalu bunjakele na kuliwana nabwo.”—Samu 61:2.

BAKWETU BAKA-KRISTU

11. Kuzibuka ngwetu bandolome na bandokazi bali na kuliwana na tuyando tutuli na kuliwana natwo kutukwasa bati?

¹¹ Yehova natwana bandolome na bandokazi mu kaye koshe mangana batukwase tukolese. Kutuzembeleka kuzibuka ngwetu tuyando ‘tutuli na kumona tuketwo tuyando twa kulifwa tubali na kuliwana natwo bandolome’ betu mu kaye koshe. (1 Pita 5:9) Oku kulumbununa ngwabo kuli bandolome na bandokazi baje banaliwana na bukalu butuli na kuliwana nabwo, oloni banatwalelelaho kukolesa. Ngeci netu twasa kukolesa.—Bili 14:22.

12. Bandolome na bandokazi basa kutukwasa bati, co netu twasa kubakwasa bati? (2 Korinte 1:3, 4)

¹² Bandolome na bandokazi bakatushongangeya tukolese kwitila mu byuma bibakendeka na kulinga. Kapositolo Paulu walimwenenene busunga bwawa majwi. Mu mikanda yendi, Paulu watumbwile mazina a baje bamukwasele ha simbu ibamukutililile mu njibo. Co wakandelelele manene kuli bakebo. Aba baka-Kristu bazembelekele Paulu na kumukanyamesa na kumwana bukwasi bwatondele. (Filp 2:25, 29, 30; Kolo 4:10, 11) Na ano matangwa, bandolome na bandokazi bakatuzembeleka na kutukwasa nga tuli mu bukalu. Co netu twasa kubakwasa nga bali na kuliwana na bukalu.—Tandeni 2 Korinte 1:3, 4.

13. Bika byakwasele ndokazi Maya akolese?

¹³ Mu 2020, tupokola mu Russia bakobelele mu njibo ya ndokazi Maya na kutonda-tondamo kwa kujeneka lisesa lyendi. Kutundaho, ndokazi Maya wakemanenene likulahelo lyendi mu nkuta. Co wendekele ngwendi bandolome na bandokazi bamushongangeyeye manene ha simbu ei yaikalu. Ndokazi Maya wendekele ngwendi: “Ha simbu injakele mu bukalu njajukile manene, njakele na bishoti, co njazeyele. Oloni bandolome na bandokazi banjitumininine foni na kunjisonekela mizimbu na mikanda na kunjileka ngwabo banjizema manene. Njazibukile ngwange bandolome na bandokazi bange banjizema, co bapwa naanga yange. Oloni kutunda ha banjikwaselele, njakulahela manene ngwange banjizema.”

14. Bika bitunapande kulinga mangana tuwane bukwasi kuli bandolome na bandokazi betu? (Taleni na cikupulo.)

¹⁴ Bimwasa kulinga. Nga muli mu bukalu shweneni manene kuyehi na bandolome na bandokazi beni. Keti mukwata-kwate ku masinde kulomba bukwasi ku bakulunu. Bakulunu basa kupwa ngwe “mwela wa kubanda lihunzi, mwela wa kubanda nyonzi ya lihunzi” (Isaya 32:2) Anukeni lalo ngweni bandolome na bandokazi beni nabo bali na kuliwana na bukalu. Ngeci, nga mukwasa baje bali mu bujene, co mupwa bakubwahelela na kukolesa nga mwaliwana na bukalu.—Bili 20:35.

LILABELELO LYETU

15. Lilabelelo lya byuma bya kulutwe lyakwasele bati Yesu, co netu litukwasa bati? (Bahebelu 12:2)

¹⁵ Yehova natwana lilabelelo lya kukanyama lije litukwasa tukolese. (Loma 15:13) Anukeni ngweni, lilabelelo lyakwasele Yesu akolese ha litangwa lyalikalu manene mu kuyoya kwendi kwa hano hasi. (Tandeni Bahebelu 12:2.) Yesu wazibukile ngwendi nga atwalelelaho kupwa wa kulongwa, co ajelesa lizina lya Yehova. Co wazibukile lalo ngwendi eluka kuli Ishe mwilu na kukabandamena simbu yakapwa Mwene na kukayula hamo na bandolome bakubwabesa bakupwa 144,000. Mu ngila imolika, lilabelelo lya kukayoya myaka yoshe mu kaye kakaha, likatukwasa tukolese mu bukalu butukaliwana nabwo muno mu kaye ka Satana.

16. Lilabelelo lyakwasele bati ndokazi Anna akolese, co bika bitulilongesa ku majwi endekele?

¹⁶ Nangukeni omwo lilabelelo lya kukayoya mu kaye kakaha lyakwasele ndokazi Anna uje wakala ku Russia. Munalume wendi bamukutile na kumwaka mu kamenga simbu bacikele na kubandamena kutala ñanda yendi. Munalume wendi mwakele mu kamenga, Anna wendekele ngwendi: “Kulombela ha lilabelelo lya kulutwe na kusinganyekesesaho, kukanjikwasa keti njizeye manene. Njizibuka ngwange nameme tuli na kuliwana na bukalu, kulutwe kuli byuma byabibwa. Yehova akahyana bitozi bendi, co akatubezikisa.”

17. Twasa kumwesa bati ngwetu twakandelela ku lilabelelo lya natwana Yehova? (Taleni na cikupulo.)

¹⁷ Bimwasa kulinga. Waneniko simbu ya kusinganyekesesa ha byuma byabibwa bya natukulahesa Yehova kulutwe. Lingeni ngwe muli mu kaye kakaha, co muli na kulikuwa bibezikiso byabingi bya namikulahesa Yehova. Kayando ka muli na kuliwana nako “kanapu ka simbu yaindondo lika, co lalo kakehu” nga mukesekesa ku buyoye bumukalikuwa mu kaye kakaha. (2 Kori 4:17) Co lalo lingeni mwoshe mumwasela kulekako bakweni byuma bya natukulahesa Njambi kulutwe. Acisinganyekeni ha bukalu bubali na kuliwana nabwo baje kubesi na kupangela Yehova. Bali na kuliwana na bukalu bwabwingi, oloni kubazibuka byuma bya natukulahesa Yehova kulutwe. Nga musimutwiya nabo nameme byuma byabindondo lika, co mushambeya lishungu lyabo lya kushaka kulilongesa bya Bumwene bwa Yehova na bikulaheso byendi.

18. Mwafwa bika tunapande kukulahela bikulaheso bya Yehova?

¹⁸ Munima ya kukolesa mu bukalu bwabwingi bwaliwanene nabwo na kutwalelelaho kupwa wa kulongwa, Yombi wendekele ngwendi: “Hanwoni njazibuka ngwange wasa kulinga byuma byoshe, co nacimo cahi cije kuwasa kulinga nga unayongola kucilinga.” (Yombi 42:2) Yombi walilongesele ngwendi na cimo cahi casa kwonowesa Yehova kushulisilila biyongola byendi. Kwanuka ngwetu Yehova akashulisilila bikulaheso byendi na kumanesa bukalu bwoshe, kutwana nzili mangana tutwaleleleho kukolesa. Cakumwenako, acisinganyekeni hali munakazi umo uje nababala ha simbu yailaha, co nazeye mwafwa nai ku bandotolo babangi ba kuliseza-seza, oloni na umo wahi nasa kumusaka. Oloni mu kwita kwa simbu aliwana na ndotolo uje amuleka mwamubwa byuma bili na kumubinjisa na kumuleka mwamukwasela mangana akanguke. Uje munakazi abwahelela manene nameme kwita simbu mangana akanguke. Co kumupwila kwakwasi kutwalelelaho kukolesa nameme ali na kubinja, mwafwa azibuka ngwendi akanguka. Mu ngila imolika, twasa kutwalelelaho kukolesa mwafwa tuzibuka ngwetu Yehova akashulisilila cikulaheso cendi ca kunena Paradaisi.

19. Bika bitukwasa tukolese?

¹⁹ Ngwe mutunamwena, Yehova akatukwasa tukolese mu byeseko kupangesa lilombelo, Lijwi lyendi, bakwetu baka-Kristu na lilabelelo lyetu. Nga tulinga mwoshe mutwasela kupangesa mwamubwa ebi byuma bya natwana, co Yehova atukwasa mu bukalu bwoshe butuliwana nabwo ha simbu ino. Co lalo tutwalelelaho kukolesa kweta noho kaye ka Satana na tuyando twoshe bikahwa.—Filp 4:13.