Kusimutwiya na Banu mu Lihya Kwesekesa na Byuma Bili na Kulingiwa

Yesu mwakele na kulongesa banu wakele na kupangesa byakumwenako bya byuma byakele na kulingiwa ha simbu oyo. (Luk 13:1-5) Neni mwasa kukwasa banu bakale na lishungu lya kutolilila ku muzimbu waubwa nga mupangesa byakumwenako bya byuma bili na kulingiwa. Munima ya kwendeka ha kulonda kwa bindando nambe ha bukalu bwa kulizila nambe ha bimpindangano nambe ha bukalu bukatundu mu kupangesa mambanda a kupendesa nambe ha byuma byeka, ihuleni munu imuli na kusimutwiya nendi cihula mangana mutwaleleleho kusimutwiya nendi. Mwasa kwihula ngweni: “Kuma bingandi tangwa bikahwa ndi?” nambe “Musinganyeka ngweni bika byasa kumanesa . . . ?” Co tandeni cisoneka cije cikumbulula cihula cimunamwihula. Nga namwesa kubwahelela, co mumweseni vidio nambe kumwana libulu lya mu Cikasha ca Bikwata bya Kupangesa mu Kulongesa. Omwo tweseka mutwasela mwoshe kweta ku bimbunge bya banu ba mu citingitingi cetu, tunapande ‘kulinga byuma byoshe mwafwa ya muzimbu waubwa.’—1 Ko 9:22, 23.

Biñanda muka byasa kweta manene banu ku bimbunge mu citingitingi ceni?