Lyakeleni Bilengo mu Bingonde bya Canukiso

Mwaka na mwaka, banu ba Yehova bakashungwiya kulikuwila hamo Canukiso. Byalumingo simbu kanda Canukiso cete na munima yaco, tukalingi mwoshe mutukasela kuwana bingila bya kushangazalelamo Yehova na kukandelela kuli ikeye ha bwana bwa ndando ya kupatula bwanatwana. (Efe 1:3, 7) Cakumwenako, tukalingi mwoshe mutukasela kulanya bakwetu ku Canukiso. Bamo bakatengululako byuma bimo mangana base kulingako bupainiya bwa kukwasa bwa maola 30 nambe 50 mu ngonde ya March nambe April. Kuma mushaka kubwezelela ku byuma bimuli na kulinga mu cipangi ca kwambulula mu bingonde bya Canukiso ndi? Bika byasa kumikwasa?

Kakangi tukalingi byabingi, nga twanonekela cimweja byuma. (Vis 21:5) Ha kuwana ngwe simbu ya Canukiso ili muyehi, ino ikeyo simbu yaibwa ya kubwahesela cimweja byuma. Moneni bimwasa kulinga mangana mubwezelele ku byuma bimulinga mu cipangi ca kwambulula mu bingonde bya Canukiso na kumona mumwasa kushulisilila bilengo byeni. Co lombeni Yehova amikwase kubishulisilila.—1Yi 5:14, 15.

Kuma kuli bingila bimo bimumona ngweni mwasa kubwezelelelamo bimulinga mu cipangi ca kwambulula mu bingonde bya Canukiso ndi?