Kuli Kumwasa Kuwana Binangulo Bimikwasa Mukayoye Mwamubwa?

Ngwe mutunendekela mu biñanda binahu, banu babangi banatwalelelaho kukulahela ngwabo kuya ku masikola a helu, kukala na bufuko na kupwa munu wamubwa nambe kukulahela ngwabo byuma byaliwana nabyo munu banabinonekela cimweja kubakwasa bakayoye mwamubwa kulutwe. Oloni kukulahela byuma bya cifwa eci kunapu ngwe kulomba munu uje kazibuka mwamubwa ngila ngweni amitwamenene. Kuma oku kulumbununa ngwabo kutwasa kuzibuka byuma bitukwasa tukayoye mwamubwa kulutwe ndi? Embwe.

KULI MUNU WA KULITILA UJE ASA KUTUTWAMENENA

Kakangi mutukangula bya kulinga tukalombo munu uje nakolo, co ali na mana kututubakana mangana atunangule. Mu ngila imo lika, twasa kuwana binangulo byabibwa bije bitukwasa tuyoye mwamubwa kuli munu uje nakalako ha simbu yailaha, co lalo ali na mana kututubakana. Binangulo byendi tubiwana mu bisoneka bya kujela bibashangumukile kusoneka myaka 3,500 kunima. Ebi bisoneka bya kujela byoshe bili mu libulu libatumbula ngwabo Mbimbiliya.

Mwafwa bika munapande kukulahela Mbimbiliya? Mwafwa babenyayo ikeye nakalako simbu yailaha kutubakana banu boshe, co ali manene na mana. Banamutumbula ngwabo, “wakala ku myaka yoshe” co lalo ‘wapwa Njambi ku myaka yoshe.’ (Ndanyele 7:9; Myaso 90:2) Ikeye ‘watangele melu, co ikeye lika Njambi wa busunga. Co lalo, ikeye watangele kaye.’ (Isaya 45:18) Co nendeka ngwendi lizina lyendi ikeye Yehova.—Myaso 83:18, NWT.

Mbimbiliya yatunda kuli Ishamatanga wa banu boshe, ngeci kuyamwesele ngwayo miyati imo nambe bisemwa bimo byapwa bya seho kutubakana bikwabo. Binangulo byakalamo bikapanga simbu yoshe, co binakwasa banu ba mu mafuti oshe. Ili mu bindaka byabingi, co banayana banu babangi kutubakana mabulu oshe.a Ngeci, banu boshe basa kuizibisisa na kupangesa binangulo bilimo. Ebi biñanda bilitombola na majwi a mu Mbimbiliya anatako:

“Njambi kesi na kaangu. Oloni woshe amukomoka na kulinga bije byabibwa bakamutambula kuli ikeye.”—VILINGA 10:34, 35.

Cisemi uje wazema bana bendi akabakwasa. Mu ngila imolika, Tate yetu wa cizemo Yehova ali na kutukwasa kupangesa Lijwi lyendi Mbimbiliya. (2 Timateo 3:16) Twasa kukulahela Lijwi lyendi mwafwa ikeye watutangele, co azibuka byuma bije byasa kutulingisa tupwe ba kubwahelela.

TWASA KUKULAHELA MBIMBILIYA

Twasa kukulahela biyendeka Mbimbiliya ha byuma bikalingiwa kulutwe mwafwa myaka 2,000 kunima Mbimbiliya yapolofwetele byuma bili na kulingiwa ano matangwa na futisi ya banu, co ebi byuma bili na kulishulisilila.

BYUMA BILI NA KULINGIWA

“Lifuti limo likalwa nzita na lifuti likwabo, co bumwene bukalwisa bumwene bukwabo. Kukakala mandunduma akama na njala ya lyangengela na mishongo ya kulitambwisa.”—LUKA 21:10, 11.

FUTISI YA BANU

“Oloni zibuka cuma eci ngwobe, mu matangwa a kukotoka kukaija bisimbu byabikalu. Mwafwa banu bakalizema bakebo babenya, bakazema bimbongo, bakapwa baka-kulishasha, baka-kulyalesa, baka-kushaula, baka-kujeneka kwononoka bisemi babo, baka-kujeneka kukandelela, kubakapu baka-kulongwa, kubakazeme babushoko bwabo, kubakalizibasana na bakwabo, bakapwa baka-kubangeya bakwabo, baka-kujeneka kukwata mbunge, baka-kukenyuka, baka-kuzinda byabibwa, baka-kwenda bakwabo bungungu, baka-kuminina bimbunge, baka-kulijundula mwafwa ya kulyalesa, baka-kuzema manene senga kutubakana kuzema Njambi.”—2 TIMATEO 3:1-4, NWT.

Kuzibuka ngwetu byuma biyapolofwetele Mbimbiliya bili na kulishulisilila ano matangwa kutulingisa tuimone bati? Tunapande kuimona ngwe mwakaimwena Leung wa ku Hong Kong, uje wendekele ngwendi: “Mbimbiliya yapolofwetele laja ebi byuma. Kukwesi munu asa kwendeka ebi byuma mu kusungama. Ngeci, babenya Mbimbiliya ali na mana kutubakana banu boshe.”

Byuma byabingi biyapolofwetele Mbimbiliya binalishulisilila.b Ebi bimwesa ngwabyo Mbimbiliya yapwa Lijwi lya Njambi. Yehova wendekele ngwendi: “Yange lika nji Njambi, co kukwesi weka lalo wa kulifwa nange wahi. Tunde ku bushangumukilo, njendekele bati byuma mubikafwa.” (Isaya 46:9, 10) Ngeci, mwasa kukulahela biyendeka Mbimbiliya ha byuma bikalingiwa kulutwe.

BINANGULO BIJE BIMIKWASA HA SIMBU INO NA KULUTWE

Kukabangeya binangulo bili mu Lijwi lya Njambi kumikwasa. Tusimutwiyeniko ha binangulo bimo.

MONENI BIMBONGO NA BIPANGI MU NGILA INAPANDE

“Mwamubwa kukala lika na byabindondo mu kwoloka kutubakana kuungama bisimbu byoshe na kupanga na maboko abali mu kusheka lihunzi.”—MUKA-KWAMBULULA 4:6.

MWAKUPWILA BA KUBWAHELELA MU NAANGA

“Munalume woshe napande kuzema munakazi wendi ngwe mwalizema ikeye babenya, co munakazi woshe napande kusingimika munalume wendi.”—EFESO 5:33.

MWAKUYOYELA MWAMUBWA NA BAKWETU

‘Kesi ushote mbunge nambe kulubala na kulinga bubi.’—MYASO 37:8.

Nga mupangesa biyendeka Mbimbiliya, co mupwa ba kubwahelela ha simbu ino na kulutwe. Mu Mbimbiliya, Njambi natukulahesa byuma byabibwa kulutwe kwambateselela na bikulaheso binatako

BANU BAKAYOYA MU KWOLOKA

“Bakajolela na kukala mu kwoloka.”—MYASO 37:11.

BANU BOSHE BAKAKALA NA BINJIBO NA BYAKULYA

“Bakatunga binjubo byabo, co bakakuna bitungu bya mikolobozi ya bushuka bwa binyu na kulya bushuka bwakwo.”—ISAYA 65:21.

NAUMO WAHI AKABINJA NAMBE KUTSA

“Akasikumuna misozi yoshe ku mesho abo. Co kukukakala kutsa nambe busiwa nambe kulila nambe kukemanga.”—KUJOMBOLOLA 21:4.

Bika bimunapande kulinga mangana mukalikuwe ebi bibezikiso? Tandeni ñanda inatako.

a Nga mushaka kuzibuka mubananungulwila Mbimbiliya nomwo mubali na kuyanenamo ku banu, yeni ha www.jw.org/loz, co nyatekeni ha LITUTO ZA MWA BIBELE > LITABA ZEEZAHEZI KWAMULAHO NI BIBELE.

b Nga mushaka kuzibuka bupolofweto bwabwingi buje bunalishulisilila, tandeni capita 9 ya libulu lya The Bible—God’s Word or Man’s? libanasoneka Bakaleho ba Yehova. Mwasa kuliwana ha webusaiti ya www.jw.org. Nyatekeni ha LIBRARY > BOOKS & BROCHURES.