Twasa Kukulahela Biyendeka Mbimbiliya ha Byuma Byabibi na Byabibwa

Kutwasa kukulahela ngwetu byuma bitwangula kulinga bisungama nga tubyangula kwesekesa nomu mutulizibila nambe mubalizibila bakwetu. Mbimbiliya inendeka bilingisa ngoco, co lalo inatuleke biñanda byabingi bije byasa kutukwasa. Mbimbiliya ikatukwasa kuzibuka byabibi na byabibwa, co oku kukatulingisa tupwe ba kubwahelela.

TUTONDA KUTUTWAMENENA KULI NJAMBI

Kwitila mu Mbimbiliya, Yehovaa Njambi namwesa ngwendi banu kubasa kuliyoyela kwa kujeneka kubatwamenena kuli ikeye. (Njelemiya 10:23) Mukemwo natwana Mbimbiliya muje muli binangulo byabibwa bije byasa kutukwasa. Wazema manene banu, co kashaka ngwendi tuliwane na bukalu bukaija mwafwa ya kujeneka kwangula mwamubwa byakulinga. (Kwituluka mu Mashiko 5:29; 1 Iwano 4:8) Ha kupwa Ishamatanga yetu atuzibuka mwamubwa, co lalo wakala manene na mana ngeci, asa kutwana binangulo bije byasa kutukwasa. (Bisamu 100:3; 104:24) Nameme ngoco, Njambi kesi kusindiya banu bakabangeye binangulo byendi.

Yehova wanene Adama na Eva byuma byoshe bibatondele mangana bapwe ba kubwahelela. (Genese 1:28, 29; 2:8, 15) Co lalo wabanene mashiko amasi, co watondele ngwendi bawakabangeye. Nameme ngoco, wabanene lisesa lya kulyangwila kukabangeya mashiko endi nambe kujeneka kulinga ngoco. (Genese 2:9, 16, 17) Calubinda, Adama na Eva bangwile kujeneka kukabangeya binangulo bya Njambi na kuliyoyela mubashakela. (Genese 3:6) Bika binatundumo? Kuma banu basa kwangununa byabibwa ku byabibi kwa kujeneka Njambi kubatwamenena ndi? Embwe. Ha myaka yaingi ineti, twalilongesa ngwetu kujeneka kukabangeya binangulo bya Njambi kukwasa kulingisa banu bakale mu kwoloka na kupwa ba kubwahelela.—Ekelesiya 8:9.

Mbimbiliya ili na binangulo byabibwa bije bikwasa banu ba miyati yoshe kwangula mwamubwa byakulinga. (2 Timothi 3:16, 17; taleni cipalo ca “Libulu Lya Banu Boshe.”) Tusimutwiyeni muyasa kulingila ngoco.

Kengeni vidio ya Iya Babenya Mbimbiliya? ha jw.org/mck. Nga mushaka kuzibuka binalingisa Mbimbiliya baisane ngwabo “Lijwi lya Njambi.”—1 Tesalonika 2:13.

BYUMA BIKALINGISA BANU BAMO BAJENEKE KUKULAHELA MBIMBILIYA

Banu bamo bakasinganyeka ngwabo Mbimbiliya kuyasa kubakwasa bakale na futisi yaibwa. Banasa kwendeka byuma binatako.

Bamo banasa kwendeka ngwabo: “Mbimbiliya ikalilwisi.”

Busunga: Hakulibanga, kunasa kusholoka ngwe bisoneka bimo bya mu Mbimbiliya kubilitombola, oloni nga muzibuka mubabisonekelele na simbu ibabisonekele mulimwena bene ngweni byalitombola.

Nga mushaka kulimwena biñanda bimo bije bimwesa ngoco, tandeni ñanda ya “Are There Contradictions in the Bible?” ha jw.org.

Bamo banasa kwendeka ngwabo: “Banu baje bakendeka ngwabo bali na kukabengeya Mbimbiliya bali na kulinga byuma byabibi, ngeci Mbimbiliya kuyasa kukwasa banu kukala na futisi yaibwa.”

Busunga: Mbimbiliya keti ikeyo ili na kulingisa banu baje kubesi na kukabangeya byuma bilimo kukala na futisi yaibi. Yapolofwetele ngwayo, banu babangi kwambateselela na bantwama ba bulombelo baje bakalishasha ngwabo bali na kukabangeya Mbimbiliya bakalinga byuma mu ngila yeka. Yendekele lalo ngwayo, kulinga ngoco kulingisa bilongesa bya mu Mbimbiliya ‘babyendeke mwamubi.’—2 Pita 2:1, 2.

Nga mushaka kuzibuka binalingisa bulombelo bwabwingi bujeneke kukabangeya biilongesa Mbimbiliya, tandeni ñanda ya “Is Religion Just Another Big Business?” ha jw.org.

Bamo banasa kwendeka ngwabo: “Banu baje bakakabangeya Mbimbiliya kubesi kusingimika bakwabo baje banaliseze nabo.”

Busunga: Mbimbiliya ishongangeya banu kusingimika bakwabo. Oloni kuitabesa byuma binatako.

kulimona kupwa ba seho kutubakana bakwetu.—Filipu 2:3.
kujeneka kusingimika banu baje bakulahela byuma byeka.—1 Pita 2:17.
kusindiya bakwetu bakulahele byuma bitwakulahela.—Mateu 10:14.

Mbimbiliya imwesa ngwayo Njambi kakele na kaangu, akalingi banu boshe mwamubwa, co ashaka ngwendi netu tulinge ngoco.—Loma 9:14.

Nga mushaka kuzibuka byabingi tandeni ñanda ya “Tolerance—How the Bible Can Help” ha jw.org.

MBIMBILIYA YATULEKE BYATONDA NJAMBI NGWENDI TULINGE

Mbimbiliya inamwesa mwanatwamenenamo banu Njambi kushwa lika kunima. Byuma bilimo byasa kutukwasa kunanguka mwakamwenamo Njambi byuma byabibwa na byabibi, bije byasa kutukwasa nebi byasa kutunenela bukalu. (Bisamu 19:7, 11) Byuma bitukalilongesa mu Mbimbiliya byapwa bya busunga, co bitukwasa kwangula mwamubwa byakulinga mu kuyoya kwetu kwa ha litangwa na litangwa.

Cakumwenako, tusimutwiyeni ha cinangulo cituwana ku mukanda wa Provebia 13:20: “Uje enda na baka-mana apwa muka-mana, oloni uje alikwatasana na bilema akobela mu bukalu.” Eci cinangulo cicili na kupanga na ano matangwa ngwe mucakele na kupangela kunima. Mbimbiliya inashulu na binangulo bya seho bije bitukwasa.—Taleni cipalo ca “Binangulo Bya mu Mbimbiliya Bicili na Kupanga Ano Matangwa.”

Oloni munasa kulihula ngweni, ‘Binangulo bya mu Mbimbiliya byasa kunjikwasa bati ano matangwa?’ Cilongesa cinatako cimwesa binangulo bya mu Mbimbiliya mubinakwaselamo banu bamo.

a Yehova likelyo lizina lya Njambi.—Bisamu 83:18.

BINANGULO BYA MU MBIMBILIYA BICILI NA KUPANGA ANO MATANGWA

Nameme Mbimbiliya baisonekele myaka 2,000 kunima, biñanda bilimo bicipanga na ano matangwa. Banu boshe bashaka kupwa ba kubwahelela na kulikuwa buyoye. (Ekelesiya 1:9) Binangulo bili mu Mbimbiliya byasa kutukwasa kulinga ngoco.

Kupwa Baka-busunga

“Tushaka kupwa baka-busunga mu byuma byoshe.”—Bahebelu 13:18.
“Uje akebi keti ebe lalo, oloni apange na nzili.”—Efeso 4:28.

Mwakulikwatasanena Mwamubwa na Bakwetu

“Munu na munu keti atonde bije bikwasa ikeye babenya, oloni atonde bije bikwasa mukwabo.”—1 Korinte 10:24.
“Twaleleleniho kwecelela buzeye bwa umo na mukwabo na kulikonekela umo na mukwabo kutundilila kwisi ya mbunge.”—Kolose 3:13.

Mwakwangwila Byakulinga

“Munu wa kweba akataba byuma byoshe byaziba, oloni munu wa kunyanyama akatalesesa hoshe halyata.”—Provebia 14:15.
“Munu wa kunyanyama amona bushonde bwija, co abanda, oloni munu wa kujeneka mana abusungama, co aliwana na bukalu.” —Provebia 22:3.