Mwasa Kuwana Kubwahelela kwa Busunga

1. Bika twendekela ngwetu ‘kutonda Njambi’ kutulingisa tupwe ba kubwahelela?

KUBWAHELELA kwa busunga kukwapwile lika kwa kasimbu kakandondo. Munu asa kupwa wa kubwahelela mu buyoye bwendi bwoshe. Asa kulinga bati ngoco? Mu Ñanda yendi ya ha Munkinda, Yesu wendekele ngwendi: “Banabwahelela baje bazibuka ngwabo batonda Njambi.” (Mate 5:3) Yesu wazibukile ngwendi banu bashaka kuzibuka Ishamatanga yabo, Yehova Njambi na kumulemesa. Yehova wapwa “Njambi wa kubwahelela,” co na banu baje bamulemesa basa kupwa ba kubwahelela.—1 Timo 1:11.

2-3. (a) Yesu wendekele ngwendi beya bakwabo basa kupwa ba kubwahelela? (b) Byuma muka bitusimutwiya muno mu cilongesa, co mwafwa bika kunapu kwa seho kusimutwiya ha ñanda ei?

² Kuma twasa kupwa lika ba kubwahelela nga kutwesi na bukalu ndi? Embwe. Mu ñanda yendi, Yesu wendekeleko cuma cimo ca kukomokesa. Wendekele ngwendi nameme “baje bali na kulila” mwafwa ya bubi bubalingile kunima na bukalu bubali na kuliwana nabwo, basa kupwa ba kubwahelela. Yesu wendekele majwi a kulifwa na ku banu “baje babali na kuyandesa mwafwa ya kulinga byuma byabibwa” nambe baje babali na “kushaula” mwafwa ya kukabangeya Kristu. (Mate 5:4, 10, 11) Oloni munu asa bati kupwa wa kubwahelela okuni ali mu bukalu bwa cifwa eci?

³ Yesu wakele na kulumbununa ngwendi kujeneka kukala mu bukalu keti kukekwo lika kwasa kutupwisa ba kubwahelela, oloni twasa kupwa ba kubwahelela nga tutonda Njambi na kushwena kuyehi nendi. (Jemu 4:8) Twasa kulinga bati ngoco? Muno mu cilongesa, tusimutwiya byuma bitatu bije bitukwasa tuwane kubwahelela kwa busunga.

TANDENI NA KULILONGESA MBIMBILIYA

4. Cuma muka cakulibanga citunapande kulinga mangana tuwane kubwahelela kwa busunga? (Myaso 1:1-3)

⁴ CAKULIBANGA: Tunapande kutanda na kulilongesa Mbimbiliya mangana tupwe ba kubwahelela. Yesu wesekesele Lijwi lya Njambi ku byakulya. Banu hamolika na tusitu, banapande kulya byakulya mangana batwaleleleho kuyoya. Oloni banu bakebo lika basa kutanda Lijwi lya Njambi, co banapande kulinga ngoco. Mukemwo Yesu wendekele ngwendi: “Munu kapandele kuyoya makende lika embwe, oloni napande kuyoya na majwi a kutunda mu kanwa ka Yehova.” (Mate 4:4) Ngeci, kutwapandele kutokesa litangwa kwa kujeneka kutanda Lijwi lya Njambi, Mbimbiliya. Muka-kwimba wendekele ngwendi: ‘Abwahelela munu uje azema mashiko a Yehova na kuwatanda butsiki na mutanya.’—Tandeni Myaso 1:1-3, NWT.

5-6. (a) Bika bitwasa kulilongesa mu Mbimbiliya? (b) Kutanda Mbimbiliya kwasa kutukwasa bati?

⁵ Mu Mbimbiliya, Yehova natuleke byuma bitunapande kulinga mangana tupwe ba kubwahelela mwafwa watuzema. Natukwasa tuzibuke bituli na kuyoyela. Natuleke bitunapande kulinga mangana tulikute busamba nendi, nebi bitunapande kulinga mangana atukonekele. Natuleke lalo byuma byanakulahesa kukatulingila kulutwe. (Njele 29:11) Obu busunga butukalilongesa mu Mbimbiliya, bukatulingisa tupwe ba kubwahelela.

⁶ Tuzibuka lalo ngwetu mu Mbimbiliya muli binangulo bije bitukwasa mu buyoye bwetu bwa ha litangwa na litangwa. Nga tupangesa ebi binangulo, co tupwa ba kubwahelela. Nga muliziba kuzeya mwafwa ya bukalu bumunasa kuliwana nabwo mu kuyoya, co tandeni Lijwi lya Yehova na kusinganyekesesa ha byuma bimutanda. Yesu wendekele ngwendi: “Banabwahelela baje baziba lijwi lya Njambi na kulinyunga.”—Luka 11:28.

7. Bika byasa kumikwasa mulikuwe kutanda Mbimbiliya?

⁷ Omwo mutanda Mbimbiliya, waneni simbu ya kusinganyekesesa mangana mu likuwe. Cakumwenako, hamo munu umo namitelekela byakulya bimwashaka manene. Oloni mwafwa ya kuzezama nambe kusinganyekesesa ha byuma byeka, mubilya bwasi-bwasi kwa kujeneka kutakinya. Munima ya kulya, munanguka ngweni kumwalikuwile bije byakulya mwafwa munakala na kubilya bwasi-bwasi. Mu ngila ya kulifwa, simbu imo tunasa kutanda Mbimbiliya bwasi-bwasi kwa kujeneka kusinganyekesesa ha byuma bitutanda. Waneni simbu ya kusinganyekesesa ha byuma bimuli na kutanda. Lingeni ngwe muli na kumona byuma bimuli na kutanda na kuziba majwi a banu. Kulinga ngoco, kumikwasa mupwe ba kubwahelela.

8. “Ndungo wa kulongwa na kunyanyama” ali na kulinga bati cipangi cendi? (Taleni lalo majwi a kwinikila.)

⁸ Yesu nangula “ndungo wa kulongwa na kunyanyama” mangana atwane byakulya bya ku sipilitu ha simbu inapande, co tuli na kulikuwa ebi byakulya.b (Mate 24:45) Byuma byoshe byakatwana ndungo wa kulongwa na kunyanyama, bikatundu mu Bisoneka bya kujela. (1 Tesa 2:13) Ebi byakulya bya ku sipilitu bikatukwasa tuzibuke bisinganyeka bya Yehova kwesekesa nomu mubanabisonekela mu Mbimbiliya. Mukemwo tukatanda magazini ya Kaposhi ka Kukengela na Toneni! na biñanda bili ha jw.org. Tukalibwahesela biwano bya mukati ka calumingo, nebi byakumamaneselelo a calumingo. Co lalo tukayongola JW Broadcasting ya ngonde na ngonde. Nga tweseka mutwasela mwoshe kutanda na kulilongesa Mbimbiliya, co tulinga cuma camucibali cije citukwasa tuwane kubwahelela kwa busunga.

ONONOKENI BINANGULO BYA YEHOVA

9. Cuma muka camucibali citunapande kulinga mangana tuwane kubwahelela kwa busunga?

⁹ CAMUCIBALI: Tunapande kwononoka binangulo bya Yehova mangana tupwe ba kubwahelela. Muka-kwimba wendekele ngwendi: “Abwahelela munu uje azibila Yehova lyoba, uje enda mu bingila byendi.” (Myaso 128:1, NWT) Nga tuzibila Yehova lyoba, co tumusingimika manene na kujeneka kulinga byuma byoshe bije byasa kumuzibisa kubabala ku mbunge. (Visi 16:6) Ngeci tukeseka mutwasela mwoshe kwononoka binangulo bya Yehova bije bibanasoneka mu Mbimbiliya. (2 Koli 7:1) Nga tulinga byuma byazema Yehova na kujeneka kulinga byuma byazinda, co tupwa ba kubwahelela.—Myaso 37:27; 97:10; Loma 12:9.

10. Mukanda wa Loma 12:2, umwesa ngwawo tunapande kulinga bika?

¹⁰ Tandeni Loma 12:2. Munu kapandele lika kuzibuka byuma byazema Yehova nebi byazinda, oloni napande kwononoka na mashiko endi. Cakumwenako, munu nasa kuzibuka ngwendi baka-fulumende kubatabesa kushatukisa manene mota mu mukwakwa uje unazezama manene. Oloni hamo kashaka kwononoka eli lishiko. Ngeci ashatukisa manene mota yendi. Bilinga byetu binapande kumwesa ngwabyo twakulahela ngwetu kwononoka binangulo bya Yehova kwapwa kwakubwa manene. (Visi 12:28) Mukemwo mwalizibilile Devidi. Wendekele hali Yehova ngwendi: “Unanjimwesa ngila itwala ku mwonyo, co njibwahelela kukala kuyehi nobe, simbu yoshe njibwahelela ha kunyunga kwobe.”—Myaso 16:11.

11-12. (a) Mwafwa bika tunapande kunyanyama nga tuli mu bukalu nambe nga tunazeye? (b) Majwi ali ku mukanda wa Filipu 4:8 atukwasa bati omwo twangula byuma byakulizima nabyo buli?

¹¹ Nga tuli mu bukalu nambe nga tunazeye, tunapande kulingako bimo bije byasa kutukwasa twecele kulishoshomwena ha bukalu butuli nabwo. Oloni tunapande kunyanyama mangana keti tulinge byuma bije byazinda Yehova.—Efeso 5:10-12, 15-17.

¹² Mu mukanda wasonekelele baka-Kristu baku Filipu, kapositolo Paulu wabalekele batwaleleleho kulinga byuma “bya busunga, . . . bya seho manene, . . . bya kusungama, [na] byuma byoshe byabibwa.” (Tandeni Filipu 4:8.) Nameme kapositolo Paulu kendekele byuma bitunapande kulizima nabyo buli, oloni byendekele bitukwasa twangule mwamubwa byuma bya kulizima nabyo buli. Esekeni kulinga ebi: Hoshe haje hamuwana lijwi lya “byuma” mu vesi ei, lingiseni na majwi awa “myaso,” “mafilimu,” “bya kutanda,” nambe “bweho bwa ha makina.” Kulinga ngoco kumikwasa muzibuke byuma byakulizima nabyo buli byazema Njambi nebi byazinda. Tushaka kwononoka binangulo bya Yehova mu kuyoya kwetu. Nga tulinga ngoco, co tukala na citaku-taku ca kujela. (Myaso 119:1-3) Co lalo tulinga cuma camucitatu cije citukwasa tuwane ku bwahelela kwa busunga.—Bili 23:1.

MONENI KULEMESA YEHOVA KUPWA KWA SEHO MANENE

13. Cuma muka camucitatu citutukwasa tuwane kubwahelela kwa busunga? (Yiwano 4:23, 24)

¹³ CAMUCITATU: Moneni kulemesa Yehova kupwa kwa seho manene mu kuyoya kweni. Yehova ikeye Ishamatanga yetu, ngeci tunapande kumulemesa. (Kujo 4:11; 14:6, 7) Kulemesa Yehova mu ngila yashaka kukekwo kunapande kupwa kwa seho manene mu kuyoya kwetu. Tunapande kumulemesa “mu sipilitu na mu busunga.” (Tandeni Yiwano 4:23, 24.) Tushaka sipilitu ya kujela ya Njambi itutwamenene mangana tumulemese mu kulitombola na busunga bwa mu Mbimbiliya. Tunapande kumona kulemesa Yehova kupwa kwa seho manene mu kuyoya kwetu, nameme nga twayoya mu lifuti muje mubanashoko cipangi cetu. Ha simbu ino bandolome na bandokazi betu ba kutubakana 100 bali mu kamenga mwafwa ya kupwa Bakaleho ba Yehova.c Nameme ngoco, bakeseka mubasela mwoshe kulombela, kulilongesa Mbimbiliya, na kulekako bakwabo bya Yehova na Bumwene bwendi mu kubwahelela. Kuzibuka ngwetu Yehova ali hamo netu, co atubezikisa, kutukwasa tupwe ba kubwahelela nameme nga batushaula nambe kutuyandesa.—Jemu 1:12; 1 Pita 4:14.

BYALIWANENE NABYO NDOLOME UMO

14. Bika byaliwanene nabyo ndolome umo wa ku Tajikistan, co mwafwa bika?

¹⁴ Bandolome na bandokazi betu bamo banaliwana na bukalu bwakama, oloni banatwalelelaho kupwa ba kubwahelela mwafwa banapangesa byuma bitatu bitunasimutwiya. Tusimutwiyeni ha byuma byalingiwile kuli Jovidon Bobojonov wa myaka 19 uje wakala ku Tajikistan uje wabyanene kukobela buswalale. Ha October 4, 2019, bamukutile na kumwaka mu kamenga na kumulinga mwamubi ngwe cikenya. Byuma byabibi bibamulingile, babyendekele ha intaneti na mu mizimbu ya mu mafuti amangi. Bendekele ngwabo bamupupile mangana atabe kukobele buswalale na kuzala yunifomu ya buswalale. Kutundoho, bendekele ngwabo banamuwana na mulonga, co bamutwalele mu cilombo ca kuyandesela kuketa noho pulezidenti wamukonekelele na kushika mangana bamufumise mu kamenga. Ha simbu yakele omu mu bukalu, Jovidon watwaleleleleho kupwa wa kulongwa na kupwa wa kubwahelela. Bika byamukwasele? Watwaleleleleho kutonda Njambi.

15. Bika byakwasele Jovidon atwaleleleho kulilongesa bya Yehova mwakele mu kamenga?

¹⁵ Mwakele mu kamenga, Jovidon watwaleleleleho kulilongesa bya Yehova nameme ngwabo kakele na Mbimbiliya nambe mabulu a kukundama ku Mbimbiliya. Wasele kulinga bati ngoco? Bandolome na bandokazi mubakele na kumutwalela byakulya, bakele na kumusonekela cisoneka ca litangwa ha bingonga bibakele na kwambatela byakulya. Ngeci wakele na kutanda Mbimbiliya na kusinganyekesesa ha byuma byakele na kutanda ha litangwa na litangwa. Mwatundile mu kamenga, walekele baje kanda baliwane na byeseko byakama ngwendi: “Kunapu kwa seho manene kuzibuka byabingi hali Yehova kwitila mu kutanda Lijwi lyendi na mabulu a kukundama ku Mbimbiliya simbu kanda tuliwane na bukalu.”

16. Byuma muka byakele na kusinganyekesesa ndolome Jovidon?

¹⁶ Ou ndolome wapangesele binangulo bya mu Mbimbiliya. Katwaleleleho kusinganyeka nambe kulinga byuma byabibi, oloni wakele mbunge ku byuma byazema Yehova. Jovidon wakele na kulikuwa kuyongola byuma byabibwa byanatanga Yehova. Simbu yoshe mutondo wakele na kwinduka na kutolilila ku myaso ya tuzila. Butsikico, wakele na kukenga ngonde na bingongonosi. Wendekele ngwendi: “Ebi byuma byanatanga Yehova byanjitakamesele na kunjilingisa njipwe wa kubwahelela.” Nga tukandelela Yehova ha kutwana byuma bya ku sipilitu na byuma bya ku mubila, co tupwa ba kubwahelela, co lalo oku ku bwahelela kutulingisa tukolese.

17. Majwi ali ku mukanda wa 1 Pita 1:6, 7, asa kukwasa bati munu uje ali mu bukalu bwa kufwa ngwe bwaliwanene nabo ndolome Jovidon?

¹⁷ Ndolome Jovidon wamwene kulemesa Yehova kupwa kwa seho manene. Wazibukile ngwendi kutwalelelaho kupwa wa kulongwa kuli Njambi kwapwa kwa seho. Yesu wendekele ngwendi: “Yehova Njambi yobe ikeye lika iunapande kulemesa, co ikeye lika iunapande kupangela bipangi bya kujela.” (Luka 4:8) Maswalale na bakulunu ba maswalale bashakele ngwabo Jovidon alikele kupwa Mukaleho wa Yehova. Watwaleleleleho kulomba Yehova mutanya na butsiki amukwase kukala na likulahelo na kutwalelelaho kupwa wa kulongwa kuli ikeye. Jovidon watwaleleleleho kupwa wa kulongwa nameme bamuyandesele. Ha simbu ino ali na likulahelo lya kukanyama kutubakana lyakele nalyo simbu kanda bamutwale mu kamenga na kumupupa.—Tandeni 1 Pita 1:6, 7.

18. Bika bitunapande kulinga mangana tutwaleleleho kupwa ba kubwahelela?

¹⁸ Yehova azibuka byuma bitunapande kulinga mangana tupwe ba kubwahelela. Nga mulinga byuma bitatu bitunasimutwiya, co mutwalelelaho kupwa ba kubwahelela nameme muliwana na bukalu bwakama. Neni mwasa kwendeka majwi endekele Muka-kwimba uje wendekele ngwendi: ‘Banabezika banu baje Njambi yabo ikeye Yehova.’—Myaso 144:15.