2 | “Kutuzembeleka Kutuli na Kuwana mu Bisoneka”

MBIMBILIYA NGWAYO: “Mwafwa byuma byoshe bibasonekele kusañulu, babisonekelele kutulongesa, co tuli na lilabelelo mwafwa ya kukolesa kwetu na kutuzembeleka kutuli na kuwana mu Bisoneka.” —LOMA 15:4

Biulumbununa Ou Mukanda

Mu Mbimbiliya muli Bisoneka bije byasa kutukanyamesa na kutukwasa tukolese nga tuli na bisinganyeka bije kubyapandele. Mbimbiliya lalo itukwasa tukale na lilabelelo na kutukwasa tukulahele ngwetu Yehova ololo amanesa byuma byoshe bili na kutunenela bishoti.

Bubwa Butundamo

Tubaboshe tukakala na bishoti simbu imo, oloni baje bakakala manene na bishoti bakombwa simbu yoshe. Mbimbiliya yasa kukwasa bati?

Mu Mbimbiliya muli byuma byabibwa bije byasa kukwasa munu uje ali na bisinganyeka bya kuhenga. (Filipu 4:8) Ituzembeleka na kutukwasa mangana tukale na bisinganyeka byabibwa bije bitukwasa tutengulule mutuli na kulizibila.—Myaso 94:18, 19.
Mbimbiliya itukwasa tulikele kusinganyeka ngwetu keti tu ba seho.—Luka 12:6, 7.
Mikanda ya mu Mbimbiliya yaingi imwesa ngwayo kutwesi likalyetu, co lalo imwesa ngwayo Njambi, Ishamatanga yetu azibisisa mwamubwa mutukalizibila.—Myaso 34:18; 1 Iwano 3:19, 20.
Mbimbiliya yakulahesa ngwayo Njambi akamanesa byuma byoshe bikanenela banu bishoti. (Isaya 65:17; Kujombolola 21:4) Nga tuli mu bishoti, kusinganyekesesa ha bikulaheso bya mu Mbimbiliya kwasa kutwana nzili ya kukolesa.

Mbimbiliya Muili na Kukwasela Jessica

Mubikanjiyandeselamo Bishoti

“Munjakele na myaka 25 njakele manene na bishoti, co banjiwanene na mushongo wa ku bwongo. Njakele na kusinganyeka manene ha byuma byanjizibisile manene kubabala ku mbunge bije byalingiwile mu buyoye bwange kunima. Bandotolo banjikwasele njizibisise ngwange njakele na bishoti mwafwa njakele na kusinganyeka manene ha byuma byalingiwile mu buyoye bwange kunima. Kutundaho, bandotolo banjanene bumbanda, co lalo njasimutwiiye na munu uje akakwasa baje bali na kubinja mushongo wa ku bwongo mangana anjikwase kutengulula munjikasinganyekela.”

Muili na Kunjikwasela Mbimbiliya

“Ha simbu injombwele manene njakele na kubabala mbunge. Njakele na kulishoshomwena manene, co kunjakele na kumona tulo. Ha bisimbu byabingi butsiki njakele na kulishoshomwena manene ha byuma bije kunjasele kutengulula. Mukanda wa Myaso 94:19 umwesa ngwawo Njambi akatuzembeleka na kutushubulwisa nga twaliwana na bishoti. Ngeci, njakele Mbimbiliya na kalibulu muje munjasonekele mikanda ije itakamesa kuyehi na mwela wange. Munjakele na kukala na cilabulabu, njakele na kutanda bisoneka bimo bya mu Mbimbiliya mangana Lijwi lya Njambi linjizembeleke.

“Mbimbiliya ikatushongangeya kwecela kusinganyeka byuma bije bilwisa cizango ca Njambi. Kunima njakele na kuliziba ngwange keti njiwaseho, co naumo wahi wanjizema. Oloni njalilongesa ngwange bisinganyeka bya cifweci kubilitombola na byuma biilongesa Mbimbiliya, mwafwa Mbimbiliya imwesa ngwayo Njambi watuzema, co wakala na ngozi, ngeci waka umo na umo wetu mbunge. Kamandondo-kamandondo, njashangumukile kwendesa bisinganyeka byange kutubakana kubitabesa binjendese. Njalilongesa ngwange njinapande kulimona ngwe mwakanjimwena Njambi. Kulinga ngoco kwanjikwasele njilimone ngwange njapwa wa seho.

“Njabandamena simbu ije omwo kunjikasinganyeka lalo ha byuma byabibi bije byalingiwile mu buyoye bwange kunima, co kutukalishoshomwena lalo. Kuzibuka ngwange mishongo ya ku bwongo kuikakalako lalo, kukanjikwasa njikolose simbu ino, oku njibandamena ngwange kulutwe Njambi mwakatengulula byuma byoshe, bishoti byange bikahwa.”