3 | Muyasa Kutukwasela Myanja ya mu Mbimbiliya

MBIMBILIYA INENDEKA BYA . . . Banalume na banakazi ba kulongwa baje bakele na “kuliziba ngwe mutukalizibila”—JEMUSI 5:17.

Biulumbununa Ou Mukanda

Mu Mbimbiliya muli mizimbu yaingi ya banalume na banakazi baje balizibile mu bingila bya kuliseza-seza. Omwo tutanda mizimbu yabo, twasa kuwanako muzimbu wa munu umo uje walizibile ngwe mutuli na kulizibila.

Bubwa Butundamo

Tubaboshe tukashaka bakwetu bazibisise mutuli na kulizibila. Tukashaka ngoco maneneni nga tuli na kulifwita na mushongo wa ku bwongo. Omwo tutanda mizimbu ya mu Mbimbiliya, twasa kuzibamo bya banu baje bakele na biyongola bya kulifwa na byetu. Kulinga ngoco kutukwasa tumone ngwetu keti yetu lika twaliwana nobwo bukalu, co kutukwasa tulizibe ngwetu kutwesi likalyetu.

Mu Mbimbiliya muli majwi amo abendekele baje bazeyele na kuliziba ngwe wahi asa kubakwasa. Kuma mwalizibaho laja ngweni kumwasa kutwalelelaho kukolesa ndi? Mukemwo mwalizibilile Mosesa, Eliya na Devidi.—Kulava 11:14; 1 Vimyene 19:4; Myaso 55:4.
Mbimbiliya inendeka bya munakazi wa lizina lya Hana uje ‘walizibile manene kubabala ku mbunge’ mwafwa wapwile mumba, co lalo muka-lifuwa lyendi wakele na kumujola na kumushendumuna.—1 Samwele 1:6, 10.
Mbimbiliya inatuleke lalo bya munalume wa lizina lya Yombi, co hamo muzibuka mwamubwa muzimbu wendi. Nameme Yombi wakele na likulahelo lya kukanyama, simbu imo walizibile kuzeya na kukala manene na bishoti, co wendekele ngwendi: “Njinonwa, omwo njajuka kuyoya.”—Yombi 7:16.

Kumona mubakoleselele banu bamo babanendeka mu Mbimbiliya mubaliwanene na bishoti, kutukwasa tukolese nga tuliziba kuzeya.

Mbimbiliya Muili na Kukwasela Kevin

Munjili na Kulifwitila na Mushongo wa ku Bwongo Ubatumbula Ngwabo Bipolar

“Munjakele na myaka ya kukokela ku 50, banjiwanene na mushongo wa ku bwongo ubatumbula ngwabo bipolar. Bisimbu bimo njikalizibi ngwange njasa kuhyana bukalu bwoshe-bwoshe bunjinasa kuliwana nabwo. Oloni simbu imo njikalizibi ngwange na seho ya kuyoya bene yahi.”

Muili na Kunjikwasela Mbimbiliya

“Njikalizibi ngwe mwalizibilile kapositolo Pita. Simbu imo byuma byalingile byamulingisile alizibe ngwe kapwile wa seho. Oloni kutubakana kutwalelelaho kuliziba mu ngila oyo, Pita walikwatasanene na bakwabo baje bamwakele mbunge. Mushongo wa ku bwongo unjili na kubinja muukanjiwana, ukanjilingisa njilizibe ngwe njiwangoco. Ngwe mwa kapositolo Pita, njinananguka ngwange kulikwatasana na babusamba baje bashaka kunjikwasa kukanjikwasa njitwaleleleho kukolesa.”

“Kusinganyekesesa ha mwanja wa Mwene Devidi nakwo kukanjizembeleka manene. Kakangi wakele na kuliziba kukala na bishoti na kuzeya mwafwa ya milonga yalingile kunima. Nange simbu imo njikalizibi ngwe mwalizibilile Devidi mwafwa ya byuma bimo binjikalingi nambe kwendeka, bije binjikalibeye munima. Majwi endi ali ku mukanda wa Myaso 51 akanjizembeleka manene. Ha vesi 3 Devidi ngwendi: “Omwo njizibuka milonga yange, co bubi buli ku mesho ange simbu yoshe.” Ou mukanda umwesa munjikalizibila nga njinazeye, mwafwa kukanjikaluwila kulimona mu ngila inapande. Co lalo majwi ali ha vesi 10 nawo amwesa munjikalizibila. Ngwawo: “Yobe Njambi tanga mbunge ya kujela muli yange, co aka cizemo caciha cije kucesi kutenguluka muli yange.” Nange mukemwo munjikalekela Njambi mangana anjikwase. Vesi 17 nayo ikanjitakamesa. Imwesa ngwayo Njambi kesi kubyana mbunge ya kupokoka ije inazeye. Ei vesi ikanjikwasa njikulahele ngwange Njambi wanjizema.”

“Kwaka mbunge ku myanja ili mu Mbimbiliya na byuma byananjana Njambi ha simbu ino kukakanyamesa lilabelelo lyange lya byuma bya kulutwe. Kukulahela ngwange bikulaheso byoshe bili mu Mbimbiliya bikalishulisilila kukanjikwasa njitwaleleleho kukolesa.”