1 | Lilombelo “Umbileni Bishoti Byeni Hali Ikeye”

MBIMBILIYA NGWAYO: “Umbileni bishoti byeni hali [Njambi] mwafwa wamyaka mbunge.”—1 PITA 5:7.

Biulumbununa Ou Mukanda

Yehova Njambi natulanya ngwendi tusimutwiye nendi. Ashaka ngwendi tumuleke byuma byoshe bili ku mbunge yetu. (Myaso 55:22) Twasa kuleka Njambi bukalu bwetu, ipwe bwabundondo nambe bwakama. Yehova watwaka mbunge. Ngeci, byuma bije binapu bya seho kuli yetu, binapu bya seho na kuli ikeye. Nga tulombela kuli ikeye, co tukala mu kwoloka.—Filipu 4:6, 7.

Bubwa Butundamo

Twasa kuliziba ngwetu tuli likalyetu mwafwa ya kulifwita na mushongo wa ku bwongo. Simbu imo bakwetu kubasa kuzibisisa mwamubwa bukalu butuli na kuliwana nabwo. (Visimo 14:10) Oloni nga tuleka Njambi mu lilombelo mutulizibila mwoshe, Yehova atolilila ku malombelo etu, co atukwasa. Yehova ali na kutumona. Azibuka bukalu butuli na kuliwana nabwo na kubabala kutukalizibi ku mbunge. Ashaka ngwendi tumuleke mwoshe mutulizibila mu lilombelo.—2 Mizimbu 6:29, 30.

Kusimutwiya na Yehova mu lilombelo kutulingisa tukulahele ngwetu watwaka mbunge. Co tuliziba ngwe mwalizibilile muka-kwimba uje walombelele ngwendi: “Unamono tuyando twange, yobe uzibuka ñababa yange.” (Myaso 31:7) Kuzibuka ngwetu Yehova ali na kumona byuma byoshe bituli na kuliwana nabyo kutukwasa tukolese nameme mu simbu ya bukalu. Yehova akamono bukalu bwetu bwoshe, co lalo ali na nzili ya kutukwasa. Azibisisa byuma bituli na kuliwana nabyo kutubakana munu woshe-woshe, co akatukwasa ha kutuzembeleka kwitila mu Mbimbiliya.

Mbimbiliya Muinakwasela Julian

Bukalu Bunjili na Kuliwana Nabwo Mwafwa ya Bishoti

Njili na kubinja mushongo ubasana ngwabo obsessive-compulsive disorder (OCD), co njikalishoshomwena manene. Njikalishoshomwena nameme ha simbu kunjabandamenene. Simbu imo njikalizibi mwamubwa, oloni kukapwa muje njishangumuka kulishoshomwena lalo, kwa kujeneka byuma binapande kunjilingisa njilizibe ngoco. Njikalishoshomwena manene nga njili hamo na bakwetu. Njikalishoshomwena manene ha byuma bibasa kusinganyeka bakwetu hali yange.

“Babusamba bange baje bazibuka bukalu bwange bakanjikwasa manene. Oloni simbu imo byuma bibakendeka bikanjizeyesa. Nameme ngoco, njikakandelelako manene mwafwa bakanjikwasa.”

“Simbu imo bishoti binjikaliwana nabyo bikanjilingisa kunjikaluwile kulombela. Kukanjambatela simbu kwaka mbunge ku byuma na kusimutwiya na Yehova mu lilombelo. Njikasinganyeka byuma bya kuliseza-seza ha simbu imolika. Ngeci, kukanjikaluwila kwaka mbunge ku byuma binjilinga. Nga njinatangana kukanjikaluwila manene kuleka Yehova munjili na kulizibila na bisinganyeka byange.”

Muili na Kunjikwasela Mbimbiliya

“Njalilongesa mu kutanda Mbimbiliya ngwange malombelo ange kuwapandele kupwa amalaha manene, co lalo keti ngwabo kubanga njipangese majwi a kuziminina asina Yehova anjitolilila. Simbu imo mukukanjikaluwila kuleka Yehova munjikalizibila njikendeka lika ngwange: ‘Yehova, njikwase.’ Nameme ngoco, njikamono ngwange Yehova anjizibisisa, co akanjana bukwasi bunjitonda ha simbu oyo. Kutundaho lalo, njinalombele bukwasi ku banu baje bakakwasa banu bali na kubinja mishongo ya ku bwongo. Njabwahelela mwafwa ebi bingila bibali binanjikwasa, co hano njili na kulizibako bwino. Nameme kukanjikaluwila kuleka Yehova munjilizibila mwafwa ya kubinja mushongo wa ku bwongo, njikalingi ngoco mwafwa njizibuka ngwange wanjizema, co ashaka kunjikwasa.”