Byuma Bitulilongesa ku Mikanda Ibali Yasonekele Pita

1. Simbu kanda kapositolo Pita atse bamuhwimininine asoneke bika?

KAPOSITOLO Pita wazibukile ngwendi ololo atsa. Wapangelele Yehova mu kulongwa ha simbu yailaha, wakele na kwenda na Yesu, wambulwilile mu mitambela yaiha, co wakele mu cibunga ca kutwamenena. Pita anga wacitwaleleleleho kupanga. Mu 62-64 C.E, Yehova wamuhwimininine asoneke mikanda ya mu Mbimbiliya ibali ya lizina lyendi. Pita wakulahelele ngwendi mikanda ibali yasonekele ikwasa baka-Kristu munima ya kutsa kwendi.—2 Pita 1:12-15.

2. Mwafwa bika mikanda ibali yasonekele Pita yapwile ya seho?

² Ha simbu yasonekele Pita ei mikanda, bakwabo baka-kukulahela bakele na “kuyanda na byeseko bya kuliseza-seza.’ (1 Pita 1:6) Banu bababi bashakele kushangumuka kulongesa biñanda bya makuli na kunena bilinga bya kujwala mu cikungulukilo. (2 Pita 2:1, 2, 14) Kwasalele lika simbu yaindondo mangana baka-Kristu baje bakele mu Jelusalema bamone “mamaneselelo a byuma byoshe.” Maswalale ba Baloma bashakele kunyongesa nganda ya Jelusalema na ciyulo ca Bajuda. (1 Pita 4:7) Cili bene, mikanda yasonekele Pita yakwasele baka-Kristu batwaleleleho kupwa ba kulongwa nameme bakele na kuliwana na bukalu na kumona mubasa kukolesela mu bukalu bwija kulutwe.b

3. Mwafwa bika tunapande kusimutwiya ha mikanda ibahwimininine Pita kusoneka?

³ Nameme Pita wasonekelele ei mikanda baka-Kristu bakulibanga, Yehova wabwahesele ngwendi ikale mu Lijwi lyendi. Ngeci, netu ei mikanda itukwasa. (Loma 15:4) Tuli na kuyoya mu kaye muje banu bali na kukundwiya bilinga bya kujwala. Ngeci, netu tuli na kuliwana na byeseko bije byasa kutwonowesa kupangela Yehova. Kutundaho, ololo tuliwana na kayando kakama kaje katubakana kayando kabamwene Bajuda mubanyongesele ciyulo cabo. Mu mikanda ibali yasonekele Pita muli binangulo bimo bya seho. Ebi binangulo netu bitukwasa kulibwahesela litangwa lya Yehova, kujeneka kuzibila banu lyoba na kuzema manene bakwetu. Ebi binangulo bikwasa lalo bakulunu mu cikungulukilo kuzibuka bibanapande kulinga mangana bakwase bimanga.

LIBWAHESELENI

4. Kwesekesa na mukanda wa 2 Pita 3:3, 4, bika byasa kuzeyesa likulahelo lyetu?

⁴ Tuli na kuyoya na banu baje kubakulahelele bupolofweto bwa mu Mbimbiliya. Baka-kulwisa banasa kutushendumuna mwafwa tunabandamena kukotoka kwa kano kaye ha myaka yaingi. Bamoco bakasembulula ngwabo litangwa lya Yehova kulikaija. (Tandeni 2 Pita 3:3, 4.) Nga banu batukambulwila, baka-naanga yetu nambe batwapanga nabo bendeka majwi a cifweci, likulahelo lyetu linasa kuzeya. Pita wendekele byuma byasa kutukwasa.

5. Byuma muka bitukwasa kukala na mbunge ya kubandamena omwo tubandamena kukotoka kwa kano kaye? (2 Pita 3:8, 9)

⁵ Banu bamo bakasinganyeka ngwabo Yehova ali na kukotokela kumanesa kano kaye kakabi. Majwi endekele Pita asa kutukwasa mwafwa amwesa ngwawo mwakamwena Yehova simbu kwaliseze nomu mubakaimwena banu. (Tandeni 2 Pita 3:8, 9.) Kuli Yehova myaka 1,000 inapu lika ngwe litangwa limo. Yehova ali na mbunge ya kubandamena, kashaka kunyongesa munu nambe umo. Oloni litangwa lyendi mulikaija, akanyongesa kano kaye kakabi. Ngeci, tunapande kupangesa ei simbu inasalako kwambulwila banu ba miyati yoshe.

6. Bika byasa kutukwasa “kwanuka” litangwa lya Yehova? (2 Pita 3:11, 12)

⁶ Pita ali na kutushongangeya “kwanuka” kukalako kwa litangwa lya Yehova. (Tandeni 2 Pita 3:11, 12.) Twasa kulinga bati ngoco? Ha litangwa na litangwa tunapande kusinganyekesesa ha bibezikiso bitukalikuwa mu kaye kakaha. Lingeni ngwe muli na kulimona oku muhwima mpunzi ya kujela, muli na kulya byakulya byabibwa na kutambula banu bamwazema baje bakasanguka na kulikuwa kulongesa banu baje bayoyele myaka yaingi kunima mubunalishulisilila bupolofweto bwa mu Mbimbiliya. Kusinganyekesesa ha byuma ebi kumikwasa mubandamene manene kukalimwenabyo na kukulahela manene ngweni tuli na kuyoya mu matangwa amamaneselelo. ‘Kuzibuka ebi byuma’ bikalingiwa kulutwe kutukwasa tujeneke ‘kungumuka’ na bilongesa bya makuli.—2 Pita 3:17.

KETI MUZIBILE BANU LYOBA

7. Kuzibila banu lyoba kwasa kunena bukalu muka?

⁷ Kwaka litangwa lya Yehova mu bisinganyeka byetu kutukwasa twambulwile bakwetu muzimbu waubwa. Oloni simbu imo tunasa kuziba lyoba kwambulula. Mwafwa ya bika? Mwafwa tunasa kuzibila banu lyoba. Pita nendi waliwanene na bukalu bwa kulifwa. Ha butsiki bubasompesele Yesu, Pita wazibile lyoba kulitumbula ngwendi nendi napu ndongesi ya Yesu. Co wamubyanene lutatu. (Mate 26:69-75) Oloni mu kwita kwa simbu, Pita wecelele kuzibila banu lyoba, co wendekele mu kusimpa ngwendi: “Keti mutewe bibatewa nambe kukala mu citanga.”(1 Pita 3:14) Majwi endekele Pita asa kutukwasa kwecela kuzibila banu lyoba.

8. Bika byasa kutukwasa kujeneka kuzibila banu lyoba? (1 Pita 3:15)

⁸ Bika byasa kutukwasa kujeneka kuzibila banu lyoba? Pita ngwendi: “Moneni Kristu kupwa wa kujela mu bimbunge byeni.” (Tandeni 1 Pita 3:15.) Twasa kulinga ngoco nga tulyanukisa ngwetu Yesu Kristu napu Mwene yetu, co ali na nzili manene. Nga mulishoshomwena na kuziba lyoba kwambulwila bakweni muzimbu waubwa, anukeni Mwene yetu. Lingeni ngwe muli na kumumona oku ali na kuyula mwilu, co tungelo babangi banamuzengeleka. Anukeni lalo ngweni banamwana “moko yoshe ya mwilu na hasi,” co ‘akala hamo neni matangwa oshe kweta na kumamaneselelo a katumameno ka myaka ino.’ (Mate 28:18-20) Pita ali na kutwanukisa ngwendi “simbu yoshe” tulibwahesele kwimanena byuma bitwakulahela. Kuma mushaka kwambulwila ku bipangi, ku sikola, nambe kweka ndi? Singanyekeleni cimweja simbu imushaka kulinga ngoco. Kutundaho, libwaheseleni byuma bimushaka kukendeka. Lombeni Yehova amikwase kupwa ba kusimpa, co kulaheleni ngweni amikwasa mujeneke kuzibila banu lyoba.—Bili 4:29.

“LIZEMENI MANENE”

9. Simbu imo Pita wonowele bati kumwesa cizemo? (Taleni na cikupulo.)

⁹ Pita walilongesele mwakumwesela cizemo. Nendi kwakele Yesu mwendekele ngwendi: “Njili na kumyana lishiko lyaliha ngwange, mulizeme umo na mukwabo. Ngwe munjinamizemena yange, neni lizemeni umo na mukwabo.” (Iwano 13:34) Nameme ngoco, Pita wabyanene kulya na banu baje kubapwile Bajuda, mwafwa watewele baka-Kristu baje bapwile Bajuda. Kapositolo Paulu wendekele ngwendi byuma byalingile Pita byapwile “kulikwisa.” (Gala 2:11-14) Pita watambwile cije cinangulo ca Paulu, co wacipangesele. Mu mikanda yendi yoshe ibali, Pita nendeka ngwendi kutwapandele lika kuliziba ngwetu twazema bakwetu, oloni tunapande kubamwesa cizemo.

10. Bika byasa kutukwasa kumwesa “cizemo ca kujeneka kulikwisa”? (1 Pita 1:22)

¹⁰ Pita wendekele ngwendi tunapande kuzema bandolome na bandokazi betu na “cizemo ca kujeneka kulikwisa.” (Tandeni 1 Pita 1:22.) Twasa kumwesa cizemo ca cifweci nga “twononoka busunga.” Obu busunga bunambateselela cilongesa cije cimwesa ngwaco “Njambi kesi na kangu.” (Bili 10:34, 35) Kutwasa kwononoka lishiko lya Yesu nga tuzema bamo mu cikungulukilo na kuzinda bakwabo, nameme tunasa kulizilila manene na bamo mu cikungulukilo ngwe mwalingilile Yesu. (Iwano 13:23; 20:2) Pita atwanukisa ngwendi tunapande kulinga mwoshe mutwasela kuzema bandolome na bandokazi betu boshe mwafwa banapu naanga yetu.—1 Pita 2:17.

11. Kuzema bakwetu “kutundilila kwisi ya mbunge” kulumbununa bika?

¹¹ Pita atushongangeya ngwendi ‘tulizemeni manene umo na mukwabo kutundilila kwisi ya mbunge.’ Kuzema “manene” kubanendeka aha kumwesa ngwabo tunapande kumwesa bakwetu cizemo nameme keti kwakwasi kulinga ngoco. Cakumwenako, bati nga ndolome alinga nambe kwendeka byuma bije bituzibisa kubabala ku mbunge? Hakulibanga tunasa kushaka kulinga shambandinga kutubakana kumumwesa cizemo. Oloni Pita walilongesele kuli Yesu ngwendi Njambi kesi kuziba kubwaha nga twilwisila bubi. (Iwano 18:10, 11) Pita wasonekele ngwendi: “Keti mwilwisile bubi nambe kwilwisila matuka, oloni yeni bezikiseni.” (1 Pita 3:9) Nga muzema manene bakweni, co mwaka mbunge banu boshe na kubamwesa ngozi, nameme baje banamilingi mwamubi.

12. (a) Byuma muka bikwabo bitundamo nga tuzema bakwetu kutundilila kwisi ya mbunge? (b) Kwesekesa na byuma bili mu vidio ya Mubukeleze Swalisano Yeluikola, byuma muka bimunalyangwila kulinga?

¹² Mu mukanda wendi wakulibanga, Pita wapangesele endekesi ya ‘kulizema manene.’ Kumwesa eci cizemo kufwika “bubi bwabwingi.” (1 Pita 4:8) Hamo Pita wanukile byamulongesele Yesu ha ñanda ya kukonekela myaka imo kunima. Pita hamo wasinganyekele ngwendi wakele na kulinga mwamubwa mwakele na kwendeka ngwendi asa kukonekela ndolome yendi “lwa kupwa 7.” Oloni Yesu wamulongesele hamolika netu kukonekela bakwetu “lwa kupwa 77,” kulumbununa ngwabo tunapande kukonekela bakwetu simbu yoshe. (Mateu 18:21, 22) Nga kuli na kumikaluwila kupangesa eci cinangulo, keti muzeye. Bangamba ba Yehova boshe kubalumbunukile, ngeci simbu imo kukabakaluwila kukonekela bakwabo. Oloni cuma ca seho cinapu kulinga mwoshe mutwasela kukonekela bakwetu na kukala nabo mu kwoloka.c

BAKULUNU, NYUNGENI BUTANGA

13. Byuma muka byasa kwonowesa bakulunu kuwana simbu ya kushongangeya bandolome na bandokazi babo?

¹³ Pita kebalele byuma byamulekele Yesu mwasangukile. Wamulekele ngwendi: “Nyunga bimanga bange babandondo.” (Iwano 21:16) Nga mu bakulunu neni eci cinangulo cinamikundama. Bakulunu kunasa kubakaluwila kuwana simbu ya kulinga eci cipangi cije cinapu ca seho. Bakulunu banapande tahi kunyunga binaanga byabo ku mubila, ku sipilitu na kumwesa cizemo boshe bali mu naanga yabo. Bakapanga na nzili mu cipangi ca kwambulula, co lalo bakalibwahesela kwendeka biñanda mu cikungulukilo, ha biwano bya citingitingi na ha biwano byakama. Bamo bali na bipangi bikwabo bya kufwa ngwe kukala mu Komiti ya Kulizibasana na Baka-cipatela nambe kukwasa mu dipatimenti itala bya kutunga (Local Design/Construction.) Bakulunu banazezama manene.

14. Byuma muka byasa kukwasa bakulunu kunyunga butanga? (1 Pita 5:1-4)

¹⁴ Pita walekele bakwabo bakulunu ngwendi: “Nyungeni butanga bwa Njambi.” (Tandeni 1 Pita 5:1-4.) Nga mwapwa mukulunu mu cikungulukilo, tuzibuka ngwetu mwazema bandolome na bandokazi beni, co mushaka kubanyunga. Oloni simbu imo, munasa kuliziba ngweni mwazezama manene, co kumwesi na simbu ya kukwasa bandolome na bandokazi beni. Bika bimwasa kulinga? Lombeni Yehova bukwasi. Pita wasonekele ngwendi: “Nga umo apangela bakwabo, alinge ngoco kwesekesa na nzili yanamwana Njambi.” (1 Pita 4:11) Bandolome na bandokazi beni hamo bali na kuliwana na bukalu bumo buje kubwasa kuhwa ha simbu ino. Munapande kwanuka ngweni “kanyungi wakama,” Yesu Kristu ikeye asa kubakwasa manene. Asa kubakwasa ha simbu ino na mu kaye kakaha. Njambi ashaka lika ngwendi bakulunu bazeme bandolome babo, babanyunge na kupwa “mwanja ku butanga.”

15. Bakulunu bakanyungu bati butanga? (Taleni na cikupulo.)

¹⁵ Ndolome William uje napu mukulunu ha simbu yailaha namono seho ya cipangi ca bunyungi. Mushongo wa COVID-19 muwashangumukile, ikeye na bakulunu bakwabo balyakelele cilengo ca kusimutwiya na umo na umo wakele mu cibunga cabo calumingo na calumingo. Ou ndolome ngwendi: “Bandolome na bandokazi babangi bakele likalyabo ha binjibo, ngeci basele kushangumuka kusinganyeka byuma bya kuhenga.” Ndolome William akatolilila mwamubwa nga ndolome nambe ndokazi amuleka bukalu bwali na kuliwana nabwo. Kutundaho, akatondo byuma byasa kumukwasa. Kakangi akapangesa mavidio aje ali ha webusaiti yetu. Ou ndolome lalo ngwendi: “Kunyunga butanga bwa Njambi kwa seho manene, maneneni ano matangwa. Tukapanga na nzili mu kushaka kukwasa banu baje kubapwile bangamba ba Yehova mangana bamuzibuke. Mu ngila imolika, tunapande kukwasa bandolome na bandokazi betu batwaleleleho kukala mu busunga.”

TABESENI YEHOVA AMANESELELE KUMILONGESA

16. Twasa kupangesa bati byuma bitunalilongesa mu mikanda ibali yasonekele Pita?

¹⁶ Twasimutwiya lika ha bilongesa byabindondo bili ku mikanda ibali ibahwimininine Pita ngwabo asoneke. Hamo binamikwasa kunangukako hamo hamunapande kupangela. Cakumwenako, kuma mushaka kusinganyekesesa manene ha bibezikiso bitukalikuwa mu kaye kakaha ndi? Kuma munalyakela cilengo ca kwambulula ku bipangi, ku sikola nambe mu bingila bikwabo ndi? Kuma munamono mumwasa kumwesela ngweni mwazema manene bandolome na bandokazi beni ndi? Bakulunu, kuma munalyakela cilengo ca kunyunga bimanga ba Yehova kutundilila kwisi ya mbunge ndi? Nga mulilula mwamubwa mwasa kuwana hamunapande kupangela, oloni keti muzeye. “Mwata wakala na ngozi,” co amikwasa kupangela ha buzeye bweni. (1 Pita 2:3) Pita natukulahesa ngwendi: “Njambi . . . ikeye babenya akamanesa kumilongesa. Akamikanyamesa, akamikolesa, akamilingisa mwimane na nzili.”—1 Pita 5:10.

17. Bubwa muka butundamo nga tutabesa Yehova kutulongesa na kutwalelelaho kumupangela?

¹⁷ Simbu imo Pita walizibile ngwendi kafwililile kukala hamo na Muna Njambi. (Luka 5:8) Oloni Yehova na Yesu bamukwasele, co watwaleleleleho kukabangeya Kristu. Pita wabezikile kumutabesa “kukobela mu Bumwene bwa myaka yoshe bwa Mwata wetu na Mwobole wetu Yesu Kristu.” (2 Pita 1:11) Oku kwapwile kubezika kwakama! Nga mutwalelelaho kupangela Yehova ngwe mwalingile Pita na kumutabesa kumilongesa, neni mukatambula kuyoya kwa myaka yoshe. Co ‘mukatambula eci cikandelela mwafwa ya likulahelo lyeni, kulumbununa kwoboka kweni.’—1 Pita 1:9.