Tembwinineni Yesu Uje Wambulwile na Ntwima

1. Banu ba Yehova banaliseze bati na baka-kristu ba makuli?

Bangamba ba Yehova bakambulula na ntwima.a Co eci cikeco cimo ca byuma bikamwesa kuliseza kuli mukati kabo na baka-Kristu ba makuli. (Tito 2:14) Nameme ngoco, bisimbu bimo kunasa kumikaluwila kukala na lishungu lya kwambulula. Hamo mukalizibi ngwe mwakalizibila mukulunu umo mu cikungulukilo uje akapanga na nzili. Wendekele ngwendi: “Bisimbu bimo kunjesi kukala na lishungu lya kuya na kwambulula.”

2. Bika binasa kulingisa kutupwile kwakukalu kutwalelelaho kwambulula na ntwima?

² Tunasa kulikuwa manene bipangi bimo mu munga ya Yehova kutubakana cipangi ca kwambulula. Mwafwa bika? Mwafwa mutukatungu na kubwahesa Binjibo bya Bumwene na kushongangeya bandolome betu nambe kubakwasa nga banaliwana na bukalu bwakulizila, tukalimwena bubwa bukatundu mu byuma bitunalingi. Co oku kukatulingisa tubwahelele. Co lalo tukalikuu kupanga mu kwoloka na bandolome na bandokazi betu na kulimwesa cizemo umo na mukwabo. Oloni mu cipangi ca kwambulula, tunasa kwambulwila mu citingi-tingi cimo ha myaka yaingi, oloni banu babangi kubatambula muzimbu waubwa. Nambe hamo banu kubatutambula mwamubwa mutubambulwila. Co lalo tuzibuka ngwetu omwo tushwena ku matangwa akukotoka, batuyandesa manene mwafwa ya muzimbu waubwa. (Mate 10:22) Bika byasa kutukwasa tutwaleleleho kukala na ntwima nambe kubwezelela ku ntwima yetu ya kwambulula?

3. Bika bitulilongesa ku cisimo ca Yesu cije cili ku mukanda wa Luka 13:6-9?

³ Twasa kulilongesa kwambulula na ntwima ku mwanja wa Yesu. Mwakele hano hasi, Yesu kalikelele kupanga na ntwima cipangi ca kwambulula. Co wambulwile na ntwima maneneni mwakele na kushwena kumamaneselelo a cipangi cendi ca hano hasi. (Tandeni Luka 13:6-9.) Yesu wesekesele cipangi cendi ca kwambulula kuli muka-kukuna binyu uje wapangele na nzili ha myaka itatu mu kunyunga muti wa mukuyu, oloni kuwemine bushuka. Mu ngila imolika, Yesu wambulwilile baJuda ha myaka itatu oloni bwingi bwabo kubapwile bandongesi bendi. Nameme ngoco, Yesu kalikelele kubambulwila. Wapwile ngwe muka-kukuna binyu uje watwaleleleho kukulahela ngwendi muti wa mukuyu wakunine tangwa ukema bushuka. Ngeci Yesu wapangele manene na nzili kwambulwila baJuda mangana bakulahele muzimbu waubwa.

4. Byuma muka biwana bitulilongesa ku mwanja wa Yesu?

⁴ Muno mu cilongesa tusimutwiya omwo Yesu wambululwililemo na ntwima, maneneni mu bingonde 6 bya mamaneselelo mu cipangi cendi ca hano hasi. Kulilongesa na kukabangeya byuma byalingile Yesu, kutukwasa tutwaleleleho kupanga na ntwima cipangi ca kwambulula. Tusimutwiyeni ha byuma biwana bitulilongesa kuli Yesu. Cakulibanga, Yesu wakele manene mbunge ku kulinga cizango ca Yehova. Camucibali, wakele manene mbunge ku bupolofweto bwa mu Mbimbiliya. Camucitatu, wakulahelele manene ngwendi Yehova amukwasa. Camuciwana, wakulahelele ngwendi banu bamo batambula muzimbu waubwa.

YESU WAKELE MBUNGE KU KULINGA CIZANGO CA YEHOVA

5. Yesu wamwesele bati ngwendi wakele mbunge ku kulinga cizango ca Njambi?

⁵ Yesu wambulwile “muzimbu waubwa wa Bumwene” na ntwima, mwafwa wazibukile ngwendi bikebyo byatondele Njambi. (Luka 4:43) Yesu wamwene cipangi ca kwambulula kupwa ca seho manene mu kuyoya kwendi. Nameme mu bingonde bya mamaneselelo bya cipangi cendi ca hano hasi, Yesu waile “mu nganda na nganda, na mu limbo na limbo” mu kwambulula muzimbu waubwa. (Luka 13:22) Co lalo walongesele bandongesi babangi mwakulingila cipangi ca kwambulula.—Luka 10:1.

6. Yehova wamona bati cipangi ca kwambulula nameme kuli bipangi byeka bitwasa kulinga mu munga yendi? (Taleni na cikupulo.)

⁶ Yehova na Yesu batonda ngwabo twambulule muzimbu waubwa mwafwa cikeco cipangi ca seho manene. (Mate 24:14; 28:19, 20) Cipangi coshe-coshe citulinga mu munga ya Yehova cili na kukundwiya cipangi ca kwambulula. Cakumwenako, tukatungu Binjibo bya Bumwene mangana banu batwambulwila balemeselemo Yehova. Co lalo bipangi bitukapanga ha Betheu na mu myela ikwabo ya kulifwa, bikakundwiya cipangi ca kwambulula. Nga kwasholoka bukalu bwakulizila, tukalingi mwoshe mutwasela kukwasa bandolome na bandokazi betu bawane byuma bibatonda mangana bashangumuke lalo kukunguluka na kupanga cipangi ca kwambulula. Nga tunanguka ngwetu cipangi ca kwambulula capwa ca seho manene na kwanuka ngwetu cikeco cipangi catonda Yehova ngwendi tulinge, co tukala na lishungu lya kwambulula simbu yoshe. Ndolome János uje wapwa mukulunu mu cikungulukilo ku Hungary, wendekele ngwendi: “Njikalyanukisa ngwange kukwesi cipangi ceka cinjasa kupangela Yehova cije citubakana cipangi ca kwambulula.”

7. Mwafwa bika Yehova atonda ngwendi tutwaleleleho kwambulula? (1 Timothi 2:3, 4)

⁷ Twasa kubwezelela ku ntwima yetu ya kwambulula nga tumona banu ngwe mwakabamwena Yehova. Yehova atonda ngwendi banu babangi batolilile ku muzimbu waubwa na kulilongesa byendi. (Tandeni 1 Timothi 2:3, 4.) Ngeci, Yehova akatulongesa mangana tubwezelele ku butongwe bwetu bwa kwambulula muzimbu uje wobola banu. Cakumwenako, broshuwa ya Zemeni Banu—Co Mubapwisa Bandongesi ikatulongesa mwakushangumukila kusimutwiya na banu na kubalongesa Mbimbiliya mangana bapwe bandongesi ba Yesu. Nameme banu kubatambula muzimbu waubwa ha simbu ino, basa kukalinga ngoco simbu kanda kayando kakama kahwe. Byuma bitubaleka ha simbu ino, byasa kukabashongangeya bakatambule muzimbu waubwa. Oloni ebi byasa kukalingiwa nga tutwalelelaho kwambulula.

YESU WAKELE MBUNGE KU BUPOLOFWETO BWA MU MBIMBILIYA

8. Bupolofweto muka bwa mu Mbimbiliya bwakwasele Yesu apangese mwamubwa simbu yakelenayo?

⁸ Yesu wazibukile mwamubwa mubulishulisilila bupolofweto bwa mu Mbimbiliya. Wazibukile ngwendi cipangi cendi ca kwambulula cambata lika myaka itatu na hafu. (Danie 9:26, 27) Co lalo wazibukile bupolofweto buje bwendekele bya simbu ibamutsiya na ngila ibamutsilamo. (Luka 18:31-34) Yesu wapangesele mwamubwa simbu yakelenayo mwafwa wazibukile bibwendekele bupolofweto. Ngeci wambulwile na ntwima mangana amanese cipangi cibamwanene.

9. Kuzibisisa bupolofweto bwa mu Mbimbiliya kutukwasa bati tutwaleleleho kwambulula na ntwima?

⁹ Kuzibisisa bupolofweto bwa mu Mbimbiliya kutulingisa twambulule na ntwima. Tuzibuka ngwetu kano kaye ololo kanyonga. Mbimbiliya yapolofwetele mubakafwila banu mu matangwa a mamaneselelo na byuma bikalingiwa, co tuli na kulimwena obu bupolofweto mu buli na kulishulisilila. Mbimbiliya yapolofwetele lalo ngwayo, mwene wa ku Mbwela na mwene wa ku Kunto bakalilwisa mu “simbu ya mamaneselelo.” Co tunazibisisa ngwetu obu bupolofweto bulumbununa kulilwisa kuli mukati ka Ciyulo ca Nzili ca Kaye Koshe ca Anglo-America, na Russia na bifulumende bije binalikwatasana nayo. (Danie 11:40) Co lalo twazibisisa ngwetu Ciyulo ca Nzili ca mu Kaye Koshe ca Anglo-America, cimanena mendi a kamponya ibanalumbununa ku mukanda wa Daniele 2:43-45. Kutanda bupolofweto bwa mu Mbimbiliya, kunatukwasa tukulahele ngwetu mwa busunga bene Bumwene bwa Njambi ololo bunyongesa bifulumende byoshe bili hano hasi. Obu bupolofweto bwoshe bumwesa ngwabwo tuli na kuyoya mu matangwa a mamaneselelo, ngeci tunapande kupangesa mwamubwa simbu yetu mu kwambulula muzimbu waubwa.

10. Bupolofweto bwa mu Mbimbiliya bwasa kutushongangeya bati tutwaleleleho kwambulula na ntwima?

¹⁰ Bupolofweto bwa mu Mbimbiliya buli lalo na muzimbu waubwa uje utushaka manene kwambulula. Ndokazi Carrie uje akapangela mu Dominican Republic, wendekele ngwendi: “Munjikasinganyeka ha byuma byabibwa bya natukulahesa Yehova kulutwe, njikalizibi ngwange njinapande kuleka bakwetu ebi byuma.” Watwaleleleho kwendeka ngwendi: “Munjikamono banu baliwana na bukalu, njikananguka ngwange njinapande kubakwasa bazibuke ngwabo Yehova nakulahesa kukabalingila byuma byabibwa kulutwe.” Bupolofweto bwa mu Mbimbiliya bumwesa ngwabwo Yehova ali na kutukwasa tulinge cipangi ca kwambulula. Co kuzibuka ngoco kukatushongangeya tutwaleleleho kwambulula na ntwima. Leila uje wakala ku Hungary, wendekele ngwendi: “Mukanda wa Isaya 11:6-9 ukanjishongangeya njambulule muzimbu waubwa ku banu boshe nameme baje basholoka ngwe kubasa kuutambula. Co njizibuka ngwange Yehova asa kukwasa munu woshe-woshe atenguluke.” Ndolome Christopher wa ku Zambia wendekele ngwendi: “Ngwe muumwesela mukanda wa Maki 13:10, muzimbu waubwa bali na kuwambulula mu kaye koshe, co njikalizibi kubezika manene kukwasa mu kushulisilila obu bupolofweto.” Bupolofweto muka bwa mu Mbimbiliya bukamishongangeya mutwaleleleho kwambulula?

YESU WAKULAHELELE NGWENDI YEHOVA AMUKWASA

11. Mwafwa bika Yesu wapandele kukulahela Yehova mangana ase kutwalelelaho kwambulula na ntwima? (Luka 12:49, 53)

¹¹ Yesu wakulahelele ngwendi Yehova amukwasa atwaleleleho kwambulula na ntwima. Yesu wakele na kwangula mwamubwa majwi a kupangesa mwakele na kwambulwila banu. Nameme ngoco, wazibukile ngwendi muzimbu waubwa wa bumwene ulingisa banu bamo balubale na kuulwisa. (Tandeni Luka 12:49, 53.) Bakulunu ba bulombelo kubashakele byuma byakele na kulongesa Yesu, ngeci bashakezekele bingila mwa kumutsiila. (Iwano 8:59; 10:31, 39) Oloni Yesu watwaleleleho kwambulula mwafwa wazibukile ngwendi Yehova ali nendi. Wendekele ngwendi: “Kunjesi likalyange, oloni Tate uje wanjitumine ali nange . . . Kanjisezele likalyange embwe, mwafwa njikalingi bije bikamuzibisa kubwaha.”—Iwano 8:16, 29.

12. Yesu wakwasele bati bandongesi bendi balibwahesele kutwalelelaho kwambulula nameme babapakesa?

¹² Yesu wanukisile bandongesi bendi ngwendi bakulahele Yehova mangana abakwase. Wabakwasele bakulahele ngwabo Yehova abakwasa nameme nga babapakesa. (Mate 10:18-20; Luka 12:11, 12) Ha kuwana ngwe Yesu wazibukile ngwendi banu babangi balwisa muzimbu waubwa, walekele bandongesi bendi bapwe ba kunyanyama. (Mate 10:16; Luka 10:3) Wabalekele ngwendi keti basindiye banu kutolilila ku muzimbu waubwa. (Luka 10:10, 11) Co lalo wabalekele ngwendi batewe nga babapakesa. (Mate 10:23) Nameme Yesu wakele na ntwima, co lalo wakulahelele Yehova, kalikobelesele mu byuma bije bimunenela bushonde.—Iwano 11:53, 54.

13. Bika bimilingisa mukulahele ngweni Yehova amikwasa?

¹³ Banu babangi ano matangwa bali na kulwisa cipangi cetu. Ngeci tutonda manene bukwasi bwa Yehova mangana tutwaleleleho kwambulula muzimbu waubwa na ntwima. (Kujo 12:17) Bika byasa kumilingisa mukulahele ngweni Yehova amikwasa? Tusimutwiyeni ha lilombelo lya Yesu lije lili ku mukanda wa Iwano capita 17. Oku ku mukanda Yesu walombele Yehova anyunge tupositolo bendi, co Yehova wakumbulwile lilombelo lyendi. Mukanda wa Bilinga unamwesa Yehova mwakwaselelemo tupositolo bambululule muzimbu waubwa na ntwima nameme bakele na kubapakesa. Yesu walombele lalo Yehova anyunge baje bakulahela byuma bibalongesele tupositolo bendi, kwambateselela neni. Yehova wakwasele tupositolo ba Yesu, co neni amikwasa.—Iwano 17:11, 15, 20.

14. Bika bitulingisa tukulahele ngwetu tutwalelelaho kwambulula na ntwima nameme mu simbu yaikalu? (Taleni na cikupulo)

¹⁴ Nameme kutukaluwila kwambulula muzimbu waubwa na ntwima omwo tushwenya manene kumatangwa a mamaneselelo, tukulaheleni ngwetu Yehova atwana bukwasi bwoshe bututonda. (Luka 21:12-15) Ngwe mwa Yesu na bandongesi bendi, kutwesi kusindiya banu batolilile ku muzimbu waubwa. Co lalo kutwesi kulinga nabo bimata. Nameme mu mafuti muje mu banashoko cipangi cetu ca kwambulula, bandolome banatwalelelaho kwambulula muzimbu waubwa na ntwima mwafwa banakulahela Yehova kutubakana kulikulahela bakebo babenya. Yehova wanene baka-Kristu bakulibanga nzili mangana bambulule muzimbu waubwa. Ngeci, netu ali na kutwana nzili mangana twase “kupanga mu kushula cipangi ca kwambulula” ngwe mwatondela. (2 Timo 4:17) Nga mukulahela Yehova, co amikwasa mutwaleleleho kwambulula na ntwima.

YESU WAKULAHELELE NGWENDI BANU BAMO BATOLILILA KU MUZIMBU WAUBWA

15. Bika bimwesa ngwabyo Yesu wakulahelele ngwendi banu bamo batolilila ku muzimbu waubwa?

¹⁵ Yesu wakulahelele ngwendi banu bamo batolilila ku muzimbu waubwa. Co oku kwamukwasele atwalelele kwambulula na ntwima. Cakumwenako, munima ya mwaka kutunda hashangumukilile cipangi ca kwambulula, wamwene ngwendi banu babangi batondele kutolilila ku muzimbu waubwa. Ngeci, Yesu wabesekesele ku lihya lya bimbuto bya kuhya bije byabandamenene kubiteja. (Iwano 4:35) Mwaka umo kutundoho, Yesu walekele bandongesi bendi ngwendi: “Cipangi ca kuteja cinapu cakama.” (Mate 9:37, 38) Kutundaho, Yesu wendekele lalo ngwendi: “Cipangi ca kuteja cinapu cakama . . . Lombeni Babenya cipangi ca kuteja mangana atume baka-kupanga mu cipangi cendi ca kuteja.” (Luka 10:2) Yesu watwaleleleho kukulahela ngwendi banu bamo batolilila ku muzimbu waubwa, co wabwahelelele mwakele na kubamona balinga ngoco.—Luka 10:21.

16. Bisimo bya Yesu byamwesele bati ngwabyo banu bamo batolilila ku muzimbu waubwa? (Luka 13:18-21) (Taleni na cikupulo.)

¹⁶ Yesu wakwasele bandongesi bendi batwaleleleho kwambulula na ntwima ha kubanukisa ngwendi banu bamo batolilila ku muzimbu waubwa. Tucisimutwiyeni ha bisimo byendi bibali. (Tandeni Luka 13:18-21.) Mu cisimo cakulibanga, Yesu wesekesele muzimbu waubwa ku nona ya masitadi ije yakolele na kupwa muti wakama. Yesu mwatele eci cisimo, walumbunwine ngwendi banu babangi bakatambula muzimbu waubwa, co na cimo cahi cikonowesa muzimbu waubwa kujalakana mu kaye koshe. Mu cisimo cikwabo Yesu wesekesele muzimbu wa bumwene ku musima. Yesu watele eci cisimo mu kumwesa ngwendi muzimbu wa bumwene bakawambulula mu mitambela yaingi ya kaye. Co muzimbu waubwa ukalingisa banu batengulule buyoye bwabo na kubupwisa bwabubwa nameme kukambata simbu mangana banu bananguke kutenguluka kwabo. Ngeci Yesu wakwasele bandongesi bendi bakulahele ngwabo muzimbu waubwa ubali na kwambulula ukwasa banu babangi.

17. Bika bikatulingisa tutwaleleleho kwambulula na ntwima?

¹⁷ Kusinganyekesesa omwo cipangi ca kwambulula cili na kukwasela banu babangi mu kaye koshe, kukatushongangeya tutwaleleleho kwambulula na ntwima. Mwaka na mwaka banu babangi bakaija ku Canukiso. Co lalo bamo babo bali na kulilongesa netu Mbimbiliya. Banu babangi bali na kubambwitika, co tuli na kupangela hamo nabo cipangi ca kwambulula. Kutuzibuka indi banu bakupwa muli batambula muzimbu waubwa, oloni tuzibuka ngwetu Yehova ali na kukungulula mbunga yakama ya banu baje bakoboka kayando kakama. (Kujo 7:9, 14) Yehova ikeye babenya cipangi ca kuteja, co nakulahela ngwendi banu babangi batolilila ku muzimbu waubwa. Ngeci oku kukatulingisa tutwaleleleho kwambulula na ntwima.

18. Tutonda ngwetu bakwetu bananguke bika?

¹⁸ Kushwa lika kunima, bandongesi ba Yesu ba busunga banatwalelelaho kwambulula muzimbu waubwa na ntwima. Cakumwenako, omwo tupositolo bambulwile mu kusimpa na ntwima, banu “bazibukile ngwabo bakele na Yesu.” (Bili 4:13) Ngeci netu twambululeni muzimbu waubwa mu kusimpa na ntwima. Nga tulinga ngoco, banu bamona ngwabo tuli na kutembwinina Yesu.