Tutwaleleleniho Kwenda na Likulahelo

1. Mwafwa bika Paulu wabwahelelele mwasinganyekesesele ha buyoye bwendi?

PAULU wazibukile ngwendi bamutsiya. Nameme ngoco, mwasinganyekesesele ha buyoye bwendi wabwahelelele. Wendekele ngwendi: “Njinalu nzita yaibwa, njinashatuka kweta na kushongo, njinanyungu likulahelo.” (2 Timo 4:6-8) Paulu wangwile kupangela Yehova. Co wazibukile ngwendi Yehova wabwahelelele mwafwa ya byuma byangwile kulinga. Netu tushaka kwangula mwamubwa byakulinga mangana tuzibise Yehova kubwaha. Twasa kulinga bati ngoco?

2. Kwenda na likulahelo kulumbununa bika?

² Kapositolo Paulu wendekele kutalesa kuli ikeye na bakwabo baka-Kristu ngwendi: “Tuli na kwenda na likulahelo keti na kumona na mesho.” (2 Kori 5:7) Bika byalumbunwine Paulu? Bisimbu bimo, mu Mbimbiliya lijwi lya “kwenda” linasa kutalesa ku ngila yangwilamo munu mwayoyela. Banu baje kubakulahelele Yehova bakangula byakulinga kwesekesa na byuma bibali na kumona, bibali na kuziba, nomu mubali nakulizibila. Oloni munu uje wakulahela Yehova akasinganyekesesa ha byuma bije byatonda Yehova omwo angula byakulinga. Nakulahela ngwendi nga akabangeya binangulo bya mu Mbimbiliya, co Yehova amubezikisa ha simbu ino na kulutwe.—Samu 119:66; Hebe 11:6.

3. Bubwa muka butunda mu kwenda na likulahelo? (2 Korinte 4:18)

³ Bisimbu bimo tubaboshe tukangula byakulinga kwesekesa na byuma bitumona na kuziba nomwo mutuli na kulizibila. Oloni kakangi nga twangula byakulinga mu ngila ei, co twasa kulikobelesa mu bukalu. Mwafwa bika? Mwafwa bisimbu bimo, byuma bitukamono nambe kuziba kubyesi kupwa bya busunga. Co lalo kakangi, byuma bitwangula kwesekesa na byuma bitumona na kuziba nomwo mutulizibila, kubyesi kuzibisa Yehova kubwaha ku mbunge. (Ekele 11:9; Mate 24:37-39) Oloni nga twenda na likulahelo, co twasa kwangula byakulinga bije “byatabesa Mwata.” (Efeso 5:10) Nga tukabangeya binangulo bya Njambi, co tukala mu kwoloka kwa mu bisinganyeka na kupwa ba kubwahelela. (Samu 16:8, 9; Isaya 48:17, 18) Co lalo nga tutwalelelaho kwenda na likulahelo tukalikuwa kuyoya myaka yoshe.—Tandeni 2 Korinte 4:18.

4. Munu asa kuzibuka bati ngwendi ali na kwenda na likulahelo indi na mesho?

⁴ Mwasa kuzibuka bati ngweni muli na kwenda na likulahelo nambe na mesho? Lihuleni ngweni: ‘Bika binjikakulahela munjikangula byakulinga? Kuma njikakulahela byuma binjili na kumona indi njikakulahela binangulo bya Njambi?’ Tucisimutwiyeni mumwasa kwendela na likulahelo mu byuma bitatu. Cakulibanga, omwo mwangula cipangi. Camucibali, omwo mwangula munu wakulyambata nendi. Camucitatu, nga mutambula binangulo mu munga ya Yehova. Co lalo tusimutwiya ha byuma bimunapande kusinganyekesesa mangana mwangule mwamubwa byakulinga.

NGA TWANGULA CIPANGI

5. Byuma muka bitunapande kusinganyekesesa omwo twangula cipangi?

⁵ Tubaboshe tukatondo kuwana byuma bya ku mubila bije bitukwasa hamolika na naanga yetu. (Ekele 7:12; 1 Timo 5:8) Bipangi bimo bikalingisa munu atambule bimbongo byabingi. Co bipangi bya cifweci, byasa kukwasa munu awane bimbongo bya kulikwasesa ha litangwa na litangwa na kutulikako bimo byakalikwasesa kulutwe. Oloni bipangi bimo bikalingisa munu awane bimbongo byakupwamo bije bimukwasa lika awanene naanga yendi byuma bya ku mubila. Mutukangula cipangi, tukasinganyekesesa ha bimbongo bitutambula. Oloni munu asa kwenda na mesho kutubakana kwenda na likulahelo nga aka manene mbunge ku bimbongo byatambula omwo ashakezeka cipangi.

6. Twasa kumwesa bati ngwetu tuli na kwenda na likulahelo omwo twangula cipangi? (Bahebelu 13:5)

⁶ Nga muli na kwenda na likulahelo, co musinganyekesesa ha cipangi cimushaka kwangula na kumona mucikundamena busamba bweni na Yehova. Mwasa kulihula ngweni: ‘Kuma eci cipangi casa kunjilingisa njilinge byuma byazinda Yehova ndi?’ (Prov 6:16-19) ‘Kuma casa kunjonowesa kuwana simbu ya kukunguluka, kuya na kwambulula nambe kusikama na naanga yange ndi?’ (Filp 1:10) Nga mukemwo, co kwakubwa kujeneka kutambula oco cipangi nameme kuli na kumikaluwila kuwana bipangi. Nga twenda na likulahelo, co twangula byuma bije bimwesa ngwabyo twakulahela ngwetu Yehova atwana bya ku mubila bitutonda.—Mate 6:33; tandeni Bahebelu 13:5.

7-8. Ndolome umo wa ku South America wendele bati na likulahelo? (Taleni na cikupulo.)

⁷ Ndolome Javier,a wa ku South America wamwene seho ya kwenda na likulahelo. Wendekele ngwendi: “Njatondele cipangi ceka cije cinjikwasa njiwane bimbongo byabingi bya kupangesa mu kulanda byuma byabingi bya ku mubila.” Nameme ngoco, ndolome Javier washakele manene kulinga bupainiya. Watwaleleleho kwendeka ngwendi: “Banjisanene na kunjihula bihula mu kushaka kuzibuka ndi njasa kupanga eci cipangi. Simbu kanda banjihule bihula, njalombele Yehova anjikwase. Co njakulahelele ngwange Ikeye lika azibuka byuma binjitonda. Njashakele kupanga na nzili cipangi cange mangana njitambule bimbongo byabingi, oloni kunjatondele ngwange eci cipangi cinjonowese kulinga byuma bya ku sipilitu.”

⁸ Javier wendekele ngwendi: “Mukulunu wa cipangi uje wakele na kunjihula bihula, wanjilekele ngwendi, muukobela eci cipangi upanga-panga na ha simbu ya kulembuka. Njamulumbunwinine mu kasingimiko ngwange, kunjasa kupanga-panga ha simbu ya kulembuka mwafwa njazema manene kulemesa Yehova.” Javier wabyanene eci cipangi. Munima ya byalumingo bibali washangumukile bupainiya. Co mu kwita kwa simbu wawanene cipangi ca kupanga-panga ha matangwa amo mu calumingo. Javier wendekele ngwendi: “Yehova wakumbulwile malombelo ange na kunjikwasa njiwane cipangi cije cinjikwasa njilinge bupainiya. Njabwahelela manene mwafwa njawana cipangi cije cinjikwasa njikale na simbu yaingi ya kupangela Yehova na bandolome bange.”

9. Bika bimulilongesa ku byuma byaliwanene nabyo Trésor?

⁹ Tulinga bati nga tunanguka ngwetu cipangi cituli na kupanga kucitutabesa kwenda na likulahelo? Tucisimutwiyeni ha byuma byaliwanene nabyo Trésor, wa ku Congo. Wendekele ngwendi: “Njawanene cipangi cije cinjazemene manene. Bakele na kunjifweta bimbongo byabingi bije bikobela lutatu ku bimbongo binjakele na kutambula ku cipangi cange cakulibanga, co lalo banu babangi bakele na kunjisingimika.” Nameme ngoco, bisimbu bimo Trésor wakele na kuloja biwano mwafwa ya kupanga ha simbu ya kulembuka. Co lalo ku cipangi, bakele na kumusindiya kulinga byuma bije kubilitombola na mashiko amu Mbimbiliya. Trésor washakele kulikela eci cipangi, oloni walishoshomwenene ngwendi hamo kawana cipangi ceka. Bika byamukwasele? Wendekele ngwendi: “Mukanda wa Habakuki 3:17-19 wanjikwasele njikulahele ngwange nameme njitunda cipangi, Yehova atwalelelaho kunjinyunga. Ngeci njalikelele cije cipangi.” Trésor watwaleleleho kwendeka ngwendi: “Banu babangi baje bakakobelesa bakwabo bipangi, bakasinganyeka ngwabo munu asa kwaka naanga yendi na byuma bya ku sipilitu kumukulo mwafwa ya cipangi cije casa kumulingisa akale na bimbongo byabingi. Njabwahelela manene mwafwa njanyungililile busamba bwange na Yehova hamolika na naanga yange. Munima ya mwaka umo, Yehova wanjikwasele njiwane cipangi cibakele na kunjifweta bimbongo byakupwamo. Co ebi bimbongo byakele na kunjikwasa njilande byuma bya ku mubila binjatondele na kuwana simbu ya kulinga byuma bya ku sipilitu. Nga twaka bya Yehova mu mutamba wakulibanga, bisimbu bimo twasa kukala mu bujene bwa bimbongo, oloni Yehova atwalelelaho kutunyunga.” Nga tutwalelelaho kukulahela binangulo bya Yehova na bikulaheso byendi, co tutwalelelaho kwenda na likulahelo. Nga tulinga ngoco, Yehova atubezikisa.

NGA MWANGULA MUNU WA KULYAMBATA NENDI

10. Bika byasa kutulingisa twende na mesho omwo twangula munu itulyambata nendi?

¹⁰ Bulo bwapwa bwana bwa kutunda kuli Yehova, co kukwabihile kutonda kukobela mu bulo. Nga ndokazi ashaka kushomboka kuli ndolome umo, nasa kusinganyekesesa ha sholwesi yendi, mwakalingila byuma, mubakamumwena banu, mwakapangesela bimbongo na kumona indi hamo ou ndolome ali na kulelako babushoko bwendi bamo nambe nga ou ndolome akamuzibisa kubwaha.b Kwapwa kwa seho kusinganyekesesa hali ebi byuma. Oloni nga asinganyekesesa lika hali ebi byuma, co ali na kwenda na mesho.

11. Twasa kwenda bati na likulahelo omwo twangula munu wakulyambata nendi? (1 Korinte 7:39)

¹¹ Yehova akalizibi kubwaha mwakamono bandolome na bandokazi bakabangeya binangulo byendi omwo bangula munu ibalyambata nendi. Cakumwenako, bakakabangeya cinangulo ca mu Mbimbiliya cije cendeka ngwaco banapande kubandamena na kutubakana ha “ntwitwi ya bukwenje” simbu kanda bakobele mu bulo. (1 Kori 7:36) Bakangula kukobela mu bulo na munu uje ali na bifwa bije byatonda Yehova ngwendi munalume nambe munakazi uje ali mu bulo akale nabyo. (Prov 31:10-13, 26-28; Efeso 5:33; 1 Timo 5:8) Kubesi kushangumuka busamba na munu uje kapwile mukaleho, oloni bakakabangeya cinangulo cili ku mukanda wa 1 Korinte 7:39. (Tandeni.) Cije cendeka ngwabo “kubanga muli Mwata lika.” Bakatwalelelaho kwenda na likulahelo na kukulahela ngwabo Yehova abakwasa bakele mu kwoloka.—Samu 55:22.

12. Bika bimulilongesa ku mwanjwa wa Rosa?

¹² Tucisimutwiyeni byaliwanene nabyo ndokazi Rosa uje wapwa painiya mu Colombia. Munalume yakapanga nendi uje kapwile Mukaleho, washangumukile kumutonda. Rosa nendi wazemene ou munalume. Wendekele ngwendi: “Washolokele kupwa munalume wamubwa. Wakele na kukwasa banu mu citingi-tingi cakele, co wakele na kulinyunga mwamubwa ku mubila. Wakele na kunjimwesa ngozi. Co lalo wakele na bifwa byoshe binjatondele muli munalume, oloni kapwile Mukaleho wa Yehova.” Watwaleleleho kwendeka ngwendi: “Kukwapwile kwakwasi kumubyanena mwafwa nange njatondele kushomboka. Ha simbu ije njalizibile bulika mwafwa kunjawanene ndolome uje asa kunjambata.” Nameme ngoco, Rosa kakele lika mbunge ku byuma byakele na kumona na mesho. Wasinganyekesesele mubwasa kufwila busamba bwendi na Yehova, nga angula kukobela mu busamba na munu uje kapwile Mukaleho. Ngeci walikelele kulikwatasana na uje munalume, co wazezamene mu bipangi bya ku sipilitu. Mu kwita kwa simbu, bamulanyele kukakobela Sikola ya Baka-kwambulula bya Bumwene, co ha simbu ino napu painiya wakulitila. Rosa wendekele ngwendi: “Yehova nanjibezikisa mu bingila byabingi bije byanjilingisa njipwe wakubwahelela.” Kesi kwakwasi kwenda na likulahelo mu byuma bya cifweci, oloni kuli bubwa bukatundu mu kulinga ngoco.

NGA MUTAMBULA MASHIKO MU MUNGA YA YEHOVA

13. Bika byasa kutulingisa twende na mesho nga twatambula mashiko mu munga ya Yehova?

¹³ Kakangi bakulunu mu cikungulukilo, tunyungi ba kuzenguluka, baka-munango na Cibunga ca Kutwamenena bakatwana mashiko atunapande kukabangeya mangana tupangele mwamubwa Yehova. Oloni bisimbu bimo, kukatukaluwila kuzibisisa bibakatwanena mashiko. Co tunasa kusinganyeka ngwetu mashiko abanatwana kuwasa kupanga. Tunasa kushangumuka kwaka manene mbunge ku tupenga twa bandolome baje banatwana mashiko.

14. Bika byasa kutukwasa twende na likulahelo omwo tutambula mashiko mu munga ya Yehova? (Bahebelu 13:17)

¹⁴ Kwenda na likulahelo kutukwasa tukulahele ngwetu Yehova ikeye ali na kutwamenena munga yendi, co azibuka byuma bituli na kuliwana nabyo. Kukulahela ngoco, kutukwasa tukale na biyongola byabibwa na kutambula mashiko abatwana. (Tandeni Bahebelu 13:17.) Nga tukabangeya mashiko abatwana, co tukwasa cikungulukilo cilikwatasane. (Efeso 4:2, 3) Tuzibuka ngwetu bandolome baje bali na kututwamenena kubapwile ba kulumbunuka. Nameme ngoco, Yehova atutwamenena nga tukabangeya mashiko endi. (1 Samwe 15:22) Twakulahela ngwetu Yehova akabwahesa byuma byoshe ha simbu inapande.—Mika 7:7.

15-16. Bika byakwasele ndolome umo ende na likulahelo nameme wakele na kuuwasana mwafwa ya kutenguluka catambwile? (Taleni na cikupulo.)

¹⁵ Tucisimutwiyeni byakuliwana nabyo bije bimwesa seho ya kukala na likulahelo na kukabangeya mashiko aitwana munga ya Yehova. Nameme mu lifuti lya Peru bakapangesa manene ndaka ya Spanish, banu babangi omu mu lifuti bakendeka bindaka bya kuliseza-seza. Co ndaka ya Quechua yapwa imo yebi bindaka. Ha myaka yaingi bandolome na bandokazi baje bakendeka ndaka ya Quechua, bashakezekele banu babasa kwambulwila baje bakendeka ei ndaka. Mukushaka kwendelela na mashiko a baka-fulumende, baka-munango batengulwileko ku ngila ya kwambululwilamo. (Loma 13:1) Ngeci, bandolome na bandokazi babangi basinganyekele ngwabo hamo kubakaluwila kuwana banu bakwambulwila mu citingi-tingi cabo mwafwa yoku kutenguluka. Omwo bandolome bakabangeyeye eci kutenguluka, Yehova wabezikisile kulifwita kwabo na kubakwasa bawane banu baje bakendeka ndaka ya Quechua.

¹⁶ Kevin uje wapwa mukulunu mu cikungulukilo cibakapangesa ndaka ya Quechua, nendi walishoshomwenene manene mwafwa yeci kutenguluka. Wendekele ngwendi: “Njalishoshomwenene manene mwafwa kunjazibukile mutwasa kuwanena banu baje bakendeka ndaka ya Quechua.” Bika byalingile Kevin? Wendekele ngwendi: “Njanukile mukanda wa Provebia 3:5. Co njasinganyekesesele hali Mosesa. Yehova wanene Mosesa lishiko lije lyasholokele ngwe kulyasa kupanga. Walekele Mosesa atwamenene BaIsalele kubatundisa mu Ijipiti na kubatwala ku kalunga-ndonga wa Kubenga. Kwasholokekele ngwe noku kubasa kutewela kwahi mwafwa baka-Ijipiti bakele na kubasheka. Nameme ngoco, Mosesa wononokele, co Yehova wamubezikisile ha kulinga cikomokeso cije cabobwele.” (Ekizo 14:1, 2, 9-11, 21, 22) Kevin watengulwile ngila ya kwambulwilamo. Bika byatundilemo? Wendekele ngwendi: “Njakomokele manene mwatubezikisilile Yehova. Hakulibanga twakele na kupanga simbu yailaha mu lihya, oloni twakele na kuwana lika munu umo nambe babali baje bakendeka ndaka ya Quechua. Hanoni tukayi ku myela ije ili na banu baje bakendeka ndaka ya Quechua. Co oku kunatukwasa tusimutwiye na banu babangi na kukala na mangenzi a kwilukila na bilongesa bya Mbimbiliya. Co lalo banu babangi bakaija ku biwano.” Nga twenda na likulahelo, Yehova atubezikisa.

17. Bika bimunalilongesa muno mu cilongesa?

¹⁷ Twasimutwiya ha byuma bitatu mutwasa kutwalelelaho kwenda na likulahelo. Oloni tunapande kwangula kulinga byuma byashaka Yehova ngwendi tulinge, omwo twangula mafilimu atushaka kukenga, byuma byakulizima nabyo buli, masikola atushaka kukobela na mwakulelela bana. Omwo twangula byakulinga kutwapandele kwaka lika mbunge ku byuma bitumona, oloni tunapande kwaka mbunge ku busamba bwetu na Yehova, binangulo byendi na cikulaheso cendi ca kutunyunga. Nga tulinga ngoco, co “twenda mu lizina lya Yehova Njambi yetu myaka yoshe.”—Mika 4:5.