Kushwena Kuyehi na Bandolome na Bandokazi Kwapwa Kwakubwa Kuli Yetu!

1-2. Cuma muka catonda manene Yehova, co ashaka ngwendi tulinge bika?

YEHOVA atonda ngwendi tulinge mwamubwa bakwetu. Yesu watulongesele ngwendi tuzeme bakwetu ngwe mutwalizemena yetu babenya. (Mate 22:37-39) Kuzema bakwetu mungila ei kunambateselela na kumwesa ngozi banu baje kubesi kupangela Yehova. Nga tumwesa banu boshe ngozi, co tutembwinina Yehova Njambi uje “akanyokesela nyonzi baka-kusungama na baka-kujeneka kusungama.”—Mate 5:45.

² Yehova wazema banu boshe. Oloni wazema manene baje bakalingi byuma byabibwa. (Iwano 14:21) Ashaka ngwendi tumutembwinine. Co ali nakutushongangeya ‘tuzeme manene’ bandolome na bandokazi betu na kubamwesa ‘manene cizemo.’ (1 Pita 4:8; Loma 12:10) Cizemo ca cifweci cinalifu na cizemo citwakala naco hali babushoko bwetu nambe kabusamba ketu itwazema.

3. Bika bitunapande kwanuka ha cizemo?

³ Binemo bikatondo kubinyungilila mangana bikole. Mu ngila imolika, netu tunapande kupanga na nzili mangana cizemo cetu kuli bakwetu citwaleleleho kukola. Kapositolo Paulu wanangwile baka-Kristu ngwendi: “Cizemo ceni ca kuzema bandolome citwalelele.” (Hebe 13:1) Yehova atonda ngwendi tutwaleleleho kuzema manene bakwetu. Muno mu cilongesa tusimutwiya bitunapande kushwenena manene kuyehi na bakwetu baka-Kristu, nomwo mutwasa kulingila ngoco.

MWAFWA BIKA TUNAPANDE KUSHWENA MANENE KUYEHI NA BAKWETU?

4. Ngwe mumwesela mukanda wa Samu 133:1, bika byasa kutukwasa tutwaleleleho kumona likwatasano lili mukati ketu kupwa lya seho? (Taleni na bikupulo.)

⁴ Tandeni Samu 133:1. Tulitabasana na muka-kwimba uje wendekele ngwendi kulikwatasana na banu baje bazema Yehova kwapwa “kwakubwa,” co lalo “kuzibisa kubwaha.” Oloni ngecilika munu mwanasa kwonowela kunanguka bubwa bwa muti wakama uje wakamono ha litangwa na litangwa, netu tunasa kwonowa kunanguka bubwa bwa likwatasano lili mukati ketu. Tukamono bandolome na bandokazi betu kushwa kumo hamo calumingo na calumingo. Bika byasa kutukwasa tutwaleleleho kubamona kupwa ba seho? Cizemo cetu ca kuzema bandolome na bandokazi cikola nga tuwana simbu ya kusinganyekesesa ha seho ya umo na umo wabo mu cikungulukilo na kuli yetu.

5. Kulizema umo na mukwabo kwasa kushongangeya bati bakwetu?

⁵ Banu bamo baje bakakunguluka netu lwaku libanga, bakakomoka manene mubakamono likwatasano lili mukati ketu. Co eci cikeco cikabalingisa balizibe ngwabo banawana busunga. Yesu wendekele ngwendi: “Banu boshe bakazibuka ngwabo mu bandongesi bange, nga mulizema mukati keni.” (Iwano 13:35) Tucisimutwiyeni byuma byaliwanene nabyo Chaithra, muna sikola wa ha yuniveziti uje wakele na kulilongesa Mbimbiliya na Bakaleho ba Yehova. Bamulanyele ku ciwano ca mutambela. Munima ya kuya oku ku ciwano ha litangwa lya kulibanga, walekele yakalilongesa nendi Mbimbiliya ngwendi: “Hanga njasemukila, bisemi bange kanda banjibumbateyeho. Oloni ku ciwano ceni banjibumbateyeye lwakupwa 52 ha litangwa limo lika. Njalizibile ngwange Yehova ali na kupangesa banu bendi mu kunjimwesa ngwendi wanjizema. Nange njishaka kukala mu naanga ya cifweci.” Chaithra watwaleleleho kulilongesa Mbimbiliya na kutengululako bimo mu kuyoya kwendi, co bamumbwitikile mu 2024. Kwendeka lika busunga, nga banu bamona bifwa byetu byabibwa na cizemo cili mukati ketu, co bakala na lishungu lya kulilongesa bya Yehova.—Mate 5:16.

6. Kushwena kuyehi na bandolome na bandokazi betu kutunyungilila bati?

⁶ Kushwena kuyehi na bandolome na bandokazi kwasa kutunyungilila. Kapositolo Paulu wanangwile bakwabo baka-Kristu ngwendi: “Twaleleleniho kulishongangeya umo na mukwabo ha litangwa na litangwa, mangana keti kukale umo akaluwisa mbunge mwafwa ya nzili ya bubi ya kungumuna.” (Hebe 3:13) Nga twazeye, co lalo kuli na kutukaluwila kulinga byuma byabibwa, Yehova asa kupangesa mukwetu muka-Kristu uje nananguka buzeye bwetu mangana atukwase. (Samu 73:2, 17, 23) Bukwasi bwa cifweci butukwasa manene.

7. Kulitombola muka kuli mukati ka cizemo na likwatasano? (Kolose 3:13, 14)

⁷ Tuli mu mbunga ya banu baje bakamwesa cizemo kuli umo na mukwabo, ngeci tukatambula bibezikiso byabingi. (1 Iwa 4:11) Cakumwenako, cizemo cikatushongangeya ‘tutwaleleleho kwecelela buzeye bwa umo na mukwabo,’ co oku kukabwezelela ku likwatasano lili mukati ketu. (Tandeni Kolose 3:13, 14; Efeso 4:2-6) Ku biwano tukalikuu kukala mu kwoloka na bandolome na bandokazi betu kutubakana cibunga ca banu boshe-boshe hano hasi.

LISINGIMIKENI UMO NA MUKWABO

8. Yehova akatukwasa bati tulikwatasane na bandolome na bandokazi betu?

⁸ Yehova Ikeye lika asa kutukwasa tulikwatasane. Yehova akatulingisa tulikwatasane nameme kutwalumbunukile. (1 Kori 12:25) Mbimbiliya yendeka ngwayo: ‘Njambi natulongesa kulizema umo na mukwabo.’ (1 Tesa 4:9) Oku kulumbununa ngwabo Yehova akapangesa Mbimbiliya mu kutuleka bitunapande kulinga mangana tulikute busamba bwa kukanyama na bakwetu. Mwasa kutabesa ‘Njambi amilongese’ nga mulilongesa byendi na kupangesa byuma bimuli na kulilongesa. (Hebe 4:12; Yako 1:25) Co ebi bikebyo bibakalifwiti kulinga Bakaleho ba Yehova.

9. Bika bitulilongesa ku mukanda wa Loma 12:9-13 ha kusingimika bakwetu?

⁹ Lijwi lya Njambi likatulongesa bati tushwene manene kuyehi na bakwetu? Tucisimutwiyeni ha byuma byendekele kapositolo Paulu kutalesa ha ñanda ije ili ku mukanda wa Loma 12:9-13. (Tandeni.) Kapositolo Paulu wendekele ngwendi: “Mu kulisingimika umo na mukwabo, pweni bakulibanga.” Bika byalumbunwine Paulu mwendekele awa majwi? Tunapande kuwana bingila bya mwa ‘kuzemena manene’ bakwetu bya kufwa ngwe; Kupwa baka-kukonekela, baka-kutambula bangenzi na kupwa baka-kwana. (Efeso 4:32) Kumwapandele kubandamena ngweni ndolome nambe ndokazi ashwene kuli yeni. Oloni “Pweni bakulibanga” kulinga ngoco. Nga mulinga ngoco, co mulimwena busunga bwa majwi endekele Yesu, a kwendeka ngwawo: “Mu kwana muli kubwahelela kwakama kutubana mu kutambula.”—Bili 20:35.

10. Twasa kupanga bati na nzili “mu kulisingimika umo na mukwabo”? (Taleni na cikupulo.)

¹⁰ Nangukeni ngweni Paulu mwamanesele kwendeka ngwendi tulisingimike umo na mukwabo, wendekele lalo ngwendi: “Pangeni na nzili, keti mupwe bolwa.” Muka-kupanga na nzili akapanga na ntwima, co lalo wapwa muka-kuundangana. Nga banamwana cipangi akacipanga mwamubwa. Mukanda wa Provebia 3:27, 28 utushongangeya ngwawo: “Keti wonowe kulinga byuma byabibwa kuli baje babitonda, okuni uli na nzili ya kukwasa.” Ngeci nga twananguka ngwetu mukwetu atonda bukwasi, tunapande kweseka mwoshe mutwasela mangana tumukwase bwasi-bwasi. Kutwapandele kukwata-kwata ku masinde na kusinganyeka ngwetu munu weka amukwasa.—1 Iwa 3:17, 18.

11. Bika byasa kutukwasa tushwene kuyehi na bakwetu?

¹¹ Ngila imo itwasa kusingimikilamo bakwetu inapu kubakonekela bwasi-bwasi nga banatubihisila. Mukanda wa Efeso 4:26 wendeka ngwawo: “Keti mutokese litangwa oku mucinalubala.” Mwafwa bika? Mwafwa vesi 27 yendeka ngwayo nga mulinga ngoco, co ‘musezela Liyabolo bukobelelo.’ Mu Mbimbiliya, Yehova nelukila-ilukila kutuleka ngwendi tulikonekele umo na mukwabo. Mukanda wa Kolose 3:13 unatuleke ngwawo: “Twaleleleniho . . . kulikonekela umo na mukwabo kutundilila kwisi ya mbunge.” Kukonekela bakwetu yapwa ngila imo yaibwa manene itwasa kushwenenamo kuli bakebo. Nga tukonekela bakwetu, co tukwasa mu ‘kunyungilila likwatasano lya sipilitu mu kwoloka kuje kunatukutila hamo.’ (Efeso 4:3) Ngeci mubwihi, kulikonekela umo na mukwabo kunena likwatasano na kutukwasa tukale mu kwoloka.

12. Yehova akatukwasa bati mangana tukonekele bakwetu?

¹² Simbu imo kunasa kutukaluwila kukonekela baje banatubiisila. Oloni sipilitu ya Njambi yasa kutukwasa tubakonekele. Munima ya kutushongangeya ngwayo, “lizemeni manene umo na mukwabo” na “kupanga na nzili” Mbimbiliya inatushongangeya lalo ngwayo: “Kaleni na ntwima ya sipilitu.” Kulumbununa ngwabo sipilitu ya Njambi yasa kutukwasa tukale na ntwima na nzanzu. (Loma 12:11) Ngeci sipilitu ya Njambi, yasa kutukwasa tumwese manene cizemo na kukonekela bakwetu kutundilila kwisi ya mbunge. Ebi bikebyo bikatulingisa tulombe manene Yehova mangana atukwase.—Luka 11:13.

“MUKATI KENI KETI MUKALE KULYANGUNUNA”

13. Byuma muka byasa kutulingisa tulyangunune?

¹³ Mu cikungulukilo, mwakala “banu ba miyati yoshe” baje batunda ku bisemwa bya kuliseza-seza. (1 Timo 2:3, 4) Mwafwa yoku kuliseza, umo na umo wetu nasa kwangula byuma bije biliseza na byuma bibangula bakwabo bya kufwa ngwe; Sholwesi, sakesi, nambe byuma byakulizimanabyo buli. Nga kutunyanyama oku kuliseza kwasa kutulingisa tujeneke kulikwatasana. (Loma 14:4; 1 Kori 1:10) Ha kuwana ngwe Njambi natulongesa kulizema umo na mukwabo, tunapande kunyanyama mangana keti tumone byuma bitwangula yetu kupwa byabibwa manene kutubakana bibangula bakwetu.—Filp 2:3.

14. Tunapande kupwa banu ba cifwa muka, co mwafwa bika?

¹⁴ Twasa kulikwatasana mu cikungulukilo, nga tulifwita kutwalelelaho kulishongangeya umo na mukwabo simbu yoshe. (1 Tesa 5:11) Mu myaka ineti, banu baje banazeyele nambe kutunda mu cikungulukilo baneluka kuli Yehova. Twabatambula mu cizemo! (2 Kori 2:8) Tucisimutwiyeni ha byuma byalingiwile kuli ndokazi umo uje washangumukile lalo kukunguluka munima ya kuzeya ha myaka 10. Wendekele ngwendi: “Bandolome na bandokazi banjikwatele mu liboko na kunjimweswila.” (Bili 3:19) Kumwesa ngozi mu ngila ei kwamukwasele bati? Wendekele ngwendi: “Njalizibile ngwange Yehova ali na kunjikwasa njipwe lalo wa kubwahelela.” Nga tushongangeya bakwetu, co Kristu atupangesa mu kuhwimisa boshe baje ‘bali na kuundangana na kwambata byakulema.’—Mate 11:28, 29.

15. Byuma muka bikwabo bitwasa kulinga mangana tukwase cikungulukilo cilikwatasane? (Taleni na cikupulo.)

¹⁵ Ngila ikwabo itwasa kunenelamo kwoloka inapu kwitila mu byuma bitwendeka. Mukanda wa Yombi 12:11 wendeka ngwawo: “Kuma litwi kulyesi kumakela majwi ngwe ndaka muikamakela byakulya ndi?” Muka-kuteleka mwamubwa, akabanga tahi kumakela byakulya byanateleka mangana azibe indi binabwaha simbu kanda abyane banu. Mu ngila imo lika, netu tunapande kusinganyekesesa ha byuma bitwendeka simbu kanda tubyendeke. (Samu 141:3) Cilengo cetu cinapu ca kwendeka byuma bije bitunga bakwetu, kubahwimisa na byuma bije ‘bikwasa baje bali na kutolilila.’—Efeso 4:29.

16. Beya maneneni banapande kwendeka majwi a kushongangeya?

¹⁶ Bisemi na banalume baje banambata, banapande kunyanyama na byuma bibendeka na kwendeka mu ngila ije ishongangeya bakwabo. (Kolo 3:19, 21; Tito 2:4) Bakulunu mu cikungulukilo nabo banapande kuhwimisa na kuzembeleka butanga bwa Yehova. (Isaya 32:1, 2; Gala 6:1) Mu Mbimbiliya mwakala cisimo ca kwendeka ngwaco: “Lijwi libanendeka ha simbu inapande lyapwa lyalibwa manene!”—Prov 15:23.

CIZEMO “MU BILINGA NA MU BUSUNGA”

17. Twasa kumwesa bati ngwetu twazema bandolome na bandokazi betu kutundilila kwisi ya mbunge?

¹⁷ Kapositolo Iwano watushongangeyeye ngwendi: “Cizemo cetu keti cipwe lika ca mu majwi nambe ca ha kanwa, oloni cipwe ca mu bilinga na mu busunga.” (1 Iwa 3:18) Tutonda kuzema bandolome na bandokazi betu kutundilila kwisi ya mbunge. Twasa kulinga bati ngoco? Kusikama manene na bandolome na bandokazi betu kutukwasa tushwene kuyehi nabo na kulizema manene umo na mukwabo. Ngeci waneniko simbu ya kusikama na bandolome na bandokazi beni ku biwano nambe mu lihya. Endeleni bandolome na bandokazi beni. Nga tulinga ngoco, co tumwesa ngwetu, ‘Njambi natulongesa kulizema umo na mukwabo.’ (1 Tesa 4:9) Co lalo tulimwena busunga bwa majwi akwendeka ngwawo: “Kwapwa kwakubwa, co lalo kuzibisa kubwaha bandolome kukala hamolika mu kulikwatasana.”—Samu 133:1.