CILONGESA 15
MWASO 30 Njambi Yange, Tate Yange, Kabusamba Kange
“Kushwena Kuyehi na Njambi Cikeco Cuma Cacibwa” Kuli Yetu!
“Kushwena kuyehi na Njambi cikeco cuma cacibwa kuli yange.”—SAMU 73:28.
BILI MUNO MU CILONGESA
Muno mu cilongesa tusimutwiya mutwasa kushwenena kuyehi na Yehova na bubwa butunda mu kulinga ngoco.
1-2. (a) Bika bitunapande kulinga mangana tulikute busamba bwa kukanyama na munu? (b) Bika bitusimutwiya muno mu cilongesa?
KUMA mwakala na kabusamba imwazema manene ndi? Mwalikutile bati nendi busamba? Hamo mwakele na kusikama nendi kushwa kumo, mwazibukile byaliwanene nabyo mu buyoye, co mwazibukile na byuma byashaka nebi byazinda. Mwanangukile ngweni wakala na bifwa byabibwa bije bimushaka kutembwinina. Ngeci mwamuzemene manene.
2 Kulikuta busamba bwa kukanyama na munu kukambata simbu, co kukatondeka kulifwita. Mu ngila imo lika, kukambata simbu mangana tulikute busamba bwa kukanyama na Yehova. Muno mu cilongesa, tusimutwiya mutwasa kushwenena kuyehi na Njambi na bubwa butunda mu kulinga ngoco. Tucisimutwiyeni tahi ha bubwa buli mu kushwena kuyehi na kabusamba ketu wakama Yehova.
3. Mwafwa bika tunapande kusinganyekesesa ha bubwa butunda mu kushwena kuyehi na Yehova? Lumbununeni.
3 Tuzibuka ngwetu neni mwakulahela ngweni kushwena kuyehi na Yehova kwapwa kwakubwa. Oloni kusinganyekesesa manene ha bubwa butundamo kutushongangeya tutwaleleleho kushwena kuyehi nendi. (Samu 63:6-8) Cakumwenako, tuzibuka ngwetu kulya byakulya bije bikanyamesa mubila, kulinga bweho bwa kukanyamesa mubila, kuwana simbu yaingi ya kulala na kunwa mema amangi byapwa byabibwa kuli yetu. Nameme ngoco, banu babangi kubesi kwaka mbunge ku byuma ebi. Ngeci bakaka bukangule bwabo mu bushonde. Oloni nga tusinganyekesesa ha bubwa butunda mu kulinga byuma bije bikanyamesa mubila, kutushongangeya tutwaleleleho kubilinga. Mu ngila imo lika, tuzibuka ngwetu kushwena kuyehi na Yehova kwapwa kwakubwa kuli yetu. Oloni nga tusinganyekesesa ha bubwa butunda mu kulinga ngoco, co tutwaleleleho kushwena manene kuyehi na Yehova.—Samu 119:27-30.
4. Bika byendekele muka-kwimba uje wasonekele mukanda wa Samu 73:28?
4 Tandeni Samu 73:28. Muka-kusoneka uje wasonekele Samu 73 wapwile Kalebi uje ibanene cipangi ca kwimba myaso ku tempele ya Yehova. Cisholoka ngwe wapangelele Yehova mu kulongwa ha myaka yaingi. Nameme ngoco, wamwene seho ya kwanuka ngwendi, “kushwena kuyehi na Njambi” kwapwa kwakubwa manene kuli ikeye na bakwabo. Co watondele ngwendi na nabo bazibuke ngoco. Mwafwa bika kwapwa kwakubwa kuzibuka mwamubwa Yehova na kukanyamesa busamba bwetu nendi?
“KUSHWENA KUYEHI NA NJAMBI” KUKATULINGISA TUBWAHELELE
5. (a) Mwafwa bika kushwena manene kuyehi na Yehova kutukwasa tupwe bakubwahelela? (b) Mana a Yehova asa kuminyungilila na kumikwasa bati? (Prov 2:6-16)
5 Tupwa manene ba kubwahelela nga tushwena manene kuyehi na Yehova. (Samu 65:4) Kuli byuma byabingi bitulingisa twendeke ngoco. Cakumwenako, nga tutanda byatuleka Yehova kwitila mu Mbimbiliya na kumwononoka, co tukala na mana. Byuma byakatulongesa Yehova bitunyungilila ku byuma bije byasa kutukobelesa mu bushonde na kutunyungilila ku bubi bwakama. (Tandeni Provebia 2:6-16.) Mukemwo Mbimbiliya inendeka ngwayo: “Nabwahelela munu uje awana mana na munu uje ashakezeka kunanguka.”—Prov 3:13.
6. Bika byazeyesele muka-kwimba?
6 Kwendeka lika busunga, bisimbu bimo nameme babusamba ba Yehova bakalizibi kubihya ku mbunge. Muka-kusoneka mukanda wa Samu 73, wazeyele mwashangumukile kusinganyekesesa ha byuma bije byamwene ngwendi kubyesi bwino. Washangumukile kusinganyeka ngwendi banu bababi bali na kulikuwa buyoye nameme kubesi na kwononoka Njambi. Co oku kwamulingisile alubale manene. Ngeci washangumukile kushungwiya byuma bibakele nabyo. Wasinganyekele ngwendi banu baje bapwa baka-lwozi na baka-kulyalesa bakele na byuma byoshe bibatondele. Bapwile bakulikangula, co lalo kubakele na kuyanda. (Samu 73:3-7, 12) Mwafwa ya byuma byakele na kumona, wasinganyekele ngwendi na seho ya kupangela Yehova yahi. Wazibile manene kubabala ku mbunge ngeci wendekele ngwendi: “Cili bene njinalisini ngoco kutwalelelaho kujelesa mbunge yange na kujelesa maboko ange mangana keti njikale na mulonga.”—Samu 73:13.
7. Bika bitwasa kulinga nga tuli na kuziba kubabala ku mbunge? (Taleni .)
7 Muka-kwimba wazibile manene kubabala ku mbunge, nameme ngoco walingileko bimo mangana atengulule bisinganyeka byendi. Ou muka-kwimba ‘wakobelele mu mwela wakama wa kujela wa Njambi,’ co Yehova wamukwasele akale na bisinganyeka binapande. (Samu 73:17-19) Yehova uje wapwa kabusamba ketu wa ha mbunge, akazibuka nga tuli na kuziba kubabala ku mbunge. Ngeci tumulombeni atukwase mangana tuzibuke byakulinga nga tuli na kuziba kubabala ku mbunge. Binangulo bya mu Mbimbiliya na bukwasi bwa bandolome na bandokazi, bitwana nzili mangana tutwaleleleho kupangela Yehova nameme tuli na kuziba kubabala ku mbunge. Nga tuli na bishoti Yehova atuzembeleka na kutukwasa tuwe mbunge.—Samu 94:19.a
Kalebi uje wasonekele mukanda wa Samu 73, nemana mu “mwela wakama wa kujela wa Njambi” (Taleni paragirafu 7)
“KUSHWENA KUYEHI NA NJAMBI” KUTULINGISA TUZIBUKE BITULI NA KUYOYELA NA KUTWANA LILABELELO
8. Kushwena kuyehi na Njambi kutukwasa mu bingila muka?
8 Kushwena kuyehi na Njambi kutukwasa mu bingila bikwabo bibali. Cakulibanga, kutukwasa tuyoye mwamubwa. Camucibali, kutukwasa tukale na lilabelelo lya kukanyama lya byuma bya kulutwe. (Jele 29:11) Tucisimutwiyeni manene ha bubwa buli mu kushwena kuyehi na Njambi.
9. Kushwena kuyehi na Yehova kutukwasa bati tupwe bakubwahelela?
9 Nga tulikuta busamba bwa kukanyama na Yehova tuyoya mwamubwa. Banu babangi ano matangwa bakendeka ngwabo kukwakele Njambi. Ngeci kubazibuka bibali na kuyoyela. Co bakasinganyeka ngwabo kulutwe banu boshe bakahwa kutsa. Oloni yetu kwitila mu kulilongesa Mbimbiliya, tunakulahela ngwetu “Njambi kwali, co lalo ngwendi ikeye muka-kwana cikandelela kuli baje bali na kumutonda manene.” (Hebe 11:6) Kutundaho Yehova watutangele ngwendi tumupangele. Ngeci nga tupangela Yehova tupwa bakubwahelela.—Kwitu 10:12, 13.
10. Yehova nakulahesa bika bangamba bendi? (Samu 37:29)
10 Banu babangi ano matangwa kubesi na lilabelelo lya byuma bya kulutwe. Bakapanga lika bipangi byabo, kukobela mu bulo, kukala na bana, na kulibwahesela mubakawanena bimbongo nga balikela bipangi. Kubazibuka byanakulahesa kukalinga Njambi kulutwe. Oloni yetu tuzibuka ngwetu Yehova akanyungilila bangamba bendi. (Samu 25:3-5; 1 Timo 6:17) Twakulahela Njambi uje wapwa lalo kabusamba ketu. Co tuzibuka ngwetu akalinga byuma byoshe byanakulahesa. Twalabelela byuma byabingi kulutwe, maneneni kukapangela Njambi myaka yoshe mu Paradaisi.—Tandeni Samu 37:29.
11. Bika bitunda mu kulikuta busamba na Njambi, co Njambi akalizibi bati mutukalikutu busamba nendi?
11 Kushwena kuyehi na Njambi kwapwa kwakubwa kuli yetu mu bingila byabingi. Cakumwenako, Yehova nakulahesa kutukonekela bubi bwetu nga tutenguluka mu busunga. (Isaya 1:18) Co kuzibuka ngoco kutukwasa tujeneke kutwalelelaho kuliziba kukala manene na mulonga mwafwa ya bubi butwalingile kunima. (Samu 32:1-5) Tukabwahelela mutukazibisa Yehova kubwaha ku mbunge. (Prov 23:15) Kuli byuma bikwabo byabingi bitukalikuu mwafwa ya kupwa babusamba ba Yehova. Oloni twasa kutwalelelaho bati kushwena kuyehi na Njambi?
TWASA KUTWALELELAHO BATI “KUSHWENA KUYEHI NA NJAMBI”
12. Byuma muka bimwalingile mangana mushwene kuyehi na Njambi?
12 Simbu kanda bamimbwitike na kupwa Mukaleho wa Yehova, mwalingile byuma byabingi bije byamilingisile mulikute busamba na Yehova. Mwalilongesele busunga hali Yehova Njambi na Yesu Kristu. Mwatengulukile mu busunga na kuseza bubi bweni. Mwamwesele ngweni mwakulahela Njambi, co mwalingile mwoshe mumwaselele kumwononoka. Oloni nga mushaka kushwena manene kuyehi na Njambi, co munapande kutwelelelaho kulinga ebi byuma.—Kolo 2:6.
13. Byuma muka bitatu bitukwasa tutwaleleleho kushwena kuyehi na Yehova?
13 Bika bitukwasa tutwaleleleho kushwena kuyehi na Yehova? (1) Tunapande kutwalelelaho kutanda na kulilongesa Mbimbiliya. Omwo tutanda Mbimbiliya tunapande kulingako bimo kutubakana kulilongesa lika bilongesa bya mashangumukilo bya Njambi. Tunapande kuzibisisa mwakasinganyekela Njambi na byuma byatonda ngwendi tulinge na kuyoya mu kulitombola na cizango cendi. (Efeso 5:15-17) (2) Tunapande kukanyamesa likulahelo lyetu ha kusinganyekesesa ha bukaleho bwabwingi buje bumwesa ngwabwo Yehova watuzema. (3) Tunapande kutwalelelaho kuzinda byuma byazinda Yehova na kujenjuka kulikuta busamba na banu baje bakalingi byuma byabibi.—Samu 1:1; 101:3.
14. Kwesekesa na majwi ali ku mukanda wa 1 Korinte 10:31, byuma muka bitwasa kulinga ha litangwa na litangwa bije bizibisa Yehova kubwaha ku mbunge? (Taleni na bikupulo.)
14 Tandeni 1 Korinte 10:31. Kunapu kwa seho manene kulinga byuma bije bizibisa Yehova kubwaha ku mbunge, bya kufwa ngwe kwambulula na kuya ku biwano. Oloni tunapande kulingako bimo kutubakana kulinga lika ebi byuma bibali. Byuma bitulinga ha litangwa na litangwa nabyo binapande kuzibisa Yehova kubwaha ku mbunge. Cakumwenako, nga tupwa ba kulongwa mu byuma byoshe na kupwa baka-kwana, co tuzibisa Yehova kubwaha ku mbunge. (2 Kori 8:21; 9:7) Yehova atonda lalo ngwendi tumwese kukandelela ku bwana bwanatwana bwa kuyoya. Tunapande kulya na kunwa mukwesekela na kulinga byuma bikwabo bije bitukwasa tukale na bukangule bwabubwa. Nga tulifwita kuzibisa Yehova kubwaha ku mbunge nameme mu byuma byabindondo, co atuzema manene.—Luka 16:10.
Twasa kuzibisa Yehova kubwaha ku mbunge ha kwendesa mwamubwa bimota, kunyungilila bukangule bwetu ha kulinga bweho buje bukanyamesa mubila na kulya byakulya byabibwa bije bikanyamesa mubila na kupwa baka-kwana (Taleni paragirafu 14)
15. Yehova atonda ngwendi tulinge bati bakwetu?
15 Yehova akamwesa ngozi ku banu boshe ipwe baka-kusungama nambe baka kujeneka kusungama. (Mate 5:45) Co atonda ngwendi netu tumwese bakwetu ngozi. Cakumwenako, atonda ngwendi bangamba bendi “keti bendeke munu mwamubi, keti bapwe baka-bicokota . . . bapwe baka-kuwa mbunge ku banu boshe.” (Tito 3:2) Ngeci kutwesi kulimona kupwa ba seho manene kutubakana baje kubalemesele Yehova. (2 Timo 2:23-25) Nga tumwesa bakwetu ngozi simbu yoshe, co tushwena kuyehi na Yehova.
TWASA KUSHWENA “KUYEHI NA NJAMBI” NAMEME TWASEBUKA
16. Muka-kusoneka mukanda wa Samu 73 washangumukile kuliziba bati munima ya kupangela Yehova ha myaka yaingi?
16 Bisimbu bimo munasa kuliziba ngweni Yehova kesi muyehi neni mwafwa ya kusebuka kweni. Oloni anukeni mwanja wa muka-kusoneka mukanda wa Samu 73. Wendekele ngwendi: “Mendi ange ashakele kupyansuka. Bilyato byange hahandende lika ngwe byasenutukile.” (Samu 73:2) Ou muka-kwimba walitabelele ngwendi, ‘walubalele’ co kakele na “kusinganyeka mwamubwa” ‘wafwile ngwe kasitu wa kujeneka mana’ mu mesho a Yehova. (Samu 73:21, 22) Kuma kusebuka kwendi kwamulingisile alizibe ngwendi Yehova kasa kumuzema na kumukonekela ndi?
17. (a) Bika byalingile muka-kwimba nameme wazeyele manene? (b) Bika bitulilongesa ku byuma byaliwanene nabyo? (Taleni na bikupulo.)
17 Nga muka-kwimba walizibile ngwendi Yehova namuyengula, hamo walizibile ngoco ha simbu yaindondo lika. Nameme wazeyele, wazibukile ngwendi napande kushwena kuyehi na Njambi. Mukwemo wasonekele ngwendi: “Oloni hano njili nobe simbu yoshe. Unanjikwata ku liboko lyange lya cilyo. Unjitwamenena muunjinangula, Co kutundaho unjitwamenena ku bumpau.” (Samu 73:23, 24) Netu tunapande kulomba Yehova atukanyamese nga tuliziba ngwetu likulahelo lyetu linazeye nambe nga tuliziba kuzeya mwafwa ya kusebuka kwetu. (Samu 73:26; 94:18) Nameme twalingi bubi bwakama twasa kushwena kuyehi na Yehova na kukulahela ngwetu ‘nalibwahesela kukonekela.’ (Samu 86:5) Tunapande kushwena kuyehi na Njambi maneneni nga tuliziba kuzeya.—Samu 103:13, 14.
Nga tuliziba ngwetu likulahelo lyetu lilina kuzeya, co tunapande kushwena manene kuli Yehova ha kulombela kuli Ikeye na kukunguluka simbu yoshe (Taleni paragirafu 17)
“KUSHWENA KUYEHI NA NJAMBI” MYAKA YOSHE
18. Mwafwa bika twasa kutwalelelaho kushwena kuyehi na Yehova myaka yoshe?
18 Twasa kutwalelelaho kushwena kuli Yehova myaka yoshe. Co lalo kutukecela kulilongesa byendi. Mbimbiliya inendeka ngwayo bingila bya Yehova, mana endi na mangana endi byapwa byakulitila, co ‘wahi asa kubizisisa.’—Loma 11:33.
19. Mukanda wa Samu utukwasa tukulahele byuma muka?
19 Mukanda wa Samu 79:13 wendeka ngwawo: “Yetu banu bobe na butanga bwa mu bulilo bwobe, tukakukandelela myaka yoshe na kukushangazala kutunda ku cisemwa cimo kuya ku cisemwa cikwabo.” Omwo mutwalelelaho kushwena kuyehi na Yehova kulaheleni ngweni amibezikisa ku myaka yoshe. Co neni mwasa kwendeka ngweni: “Njambi ikeye limanya lya mbunge yange na mutamba wange myaka yoshe.”—Samu 73:26.
MWASO 32 Pweni ba Kulongwa Kuli Yehova!
a Baje bakatwalelelaho kuliziba kukala na bishoti nambe kuliziba kubabala ku mbunge ha simbu yailaha, basa kulimona na ndotolo mangana abakwase. Nga mushaka kuzibuka byabingi, Taleni Kaposhi ka Kukengela, Na. 1 2023.