CILONGESA 33
MWASO 4 ‘Yehova Ikeye Kanyungi Kange’
Kulaheleni Ngweni Yehova Wamizema
“Njinakukokela kuli yange na cizemo cije kucesi kutenguluka.”—JELE 31:3.
BILI MUNO MU CILONGESA
Muno mu cilongesa tusimutwiya bikwapwila kwa seho kuzibuka ngwetu Yehova watuzema na byuma bitunapande kulinga mangana tukulahele manene ngwetu Yehova watuzema.
1. Bika byamilingisile mulikundike kuli Yehova? (Taleni na cikupulo.)
KUMA mucanuka simbu imwalikundikile kuli Yehova ndi? Kuzibuka Yehova na kumuzema manene bikebyo byamishongangeyeye mulikundike kuli ikeye. Co mwamukulahesele ngweni mwaka cizango cendi mu mutamba wakulibanga mu kuyoya kweni na kutwalelelaho kumuzema na mbunge yeni yoshe na mwonyo weni woshe na bisinganyeka byeni byoshe na nzili yeni yoshe. (Maki 12:30) Kutunda bene haje, cizemo ceni kuli Yehova cinatwalelelaho kukanyama. Oloni mwasa kukumbulula bati nga munu amihula ngwendi, “Kuma wazema Yehova ndi?” Twakulahela ngwetu mwasa kumukumbulula ngweni, “Njazema Yehova kutubakana cuma coshe-coshe.”
Kuma mucanuka mumwazemenene Yehova mumwalikundikile kuli ikeye na kulyangwila kumibwitika ndi? (Taleni paragirafu 1)
2-3. Yehova atonda ngwendi tukulahele byuma muka, co bika bitusimutwiya muno mu cilongesa? (Jelemiya 31:3)
2 Oloni mwasa kukumbulula bati nga munu amihula ngwendi, “Kuma mwakulahela ngweni Yehova wamizema ndi?” Kuma mukwata-kwata ku masinde kukumbulula mwafwa ya kusinganyeka ngweni Yehova kasa kumizema ndi? Ndokazi umo uje walizibile ngwendi kubamuzemene kubwanike, wendekele ngwendi: “Njazema manene Yehova kutundilila kwisi ya mbunge. Oloni bisimbu bimo kukanjikaluwila kukulahela ngwange nendi wanjizema.” Bika byasa kumikwasa muzibuke mwakalizibila Yehova hali yeni?
3 Yehova ashaka ngwendi mukulahele ngweni wamizema manene. (Tandeni Jelemiya 31:3.) Ikeye wamikokele mangana mulilongese byendi na kupwa kabusamba kendi. Co mu mwalikundikile kuli Yehova na kulyangwila kumimbwitika, mwatambwile bwana bwa kulitila manene kuli ikeye buje bunapu cizemo cije kucesi kutenguluka. Oku kulumbununa ngwabo Yehova wamizema manene, co kakamiseze. Cizemo cendi cije kucesi kutenguluka, cikeco cikamushongangeya amone bangamba bendi ba kulongwa hamolika neni kupwa ‘bufuko bwendi bwa seho.’ (Mala 3:17, ftn.) Yehova atonda ngwendi mulizibe ngweni wamizema manene ngwe mwalizibilile kapositolo Paulu. Paulu wakulahelele manene ngwendi Yehova wamuzema, ngeci wendekele ngwendi: “Njinataba ngwange, kutsa, nambe kuyoya, nambe tungelo, nambe bifulumende, nambe byuma biliko hano, nambe bikaija kulutwe, nambe binzili, nambe bulaha bwa kuya mwilu, nambe kuloba, nambe cuma ceka ca kutanga, na cimo cahi casa kutwangununa ku cizemo ca Njambi.” (Loma 8:38, 39) Muno mu cilongesa, tusimutwiya bikwapwila kwa seho kukulahela ngwetu Yehova watuzema, co tusimutwiya na byuma byasa kutukwasa tukulahele ngoco.
SEHO YA KUKULAHELA NGWETU YEHOVA WATUZEMA
4. Twasa kulwisa bati cimo ca bilinga bya linyanyamena bya Satana?
4 Kukulahela ngwetu Yehova watuzema, kutukwasa tulwise cimo ca “bilinga bya linyanyamena bya Liyabolo.” (Efeso 6:11) Satana alinga mwoshe mwasela mangana atwonowese kupangela Yehova. Ngila imo yakapangesa, yapwa kutulingisa tusinganyeke ngwetu Yehova katuzemene. Oloni awa apwa makuli. Mbimbiliya inesekesa Satana ku ndumba. (1 Pita 5:8, 9) Bindumba bakashaka kukwata tusitu baje banazeye, baje kubasa kulilwila. Mu ngila imolika, Satana kakangi akatulwisa nga twazeye nambe nga twajuka. Co lalo akatulwisa nga tuli na kuliziba kubihya mwafwa ya bukalu butwaliwanene nabwo kunima nambe butuli na kuliwana nabwo ha simbu ino nambe nga twalishoshomwena mubikafwila byuma kulutwe. (Prov 24:10) Satana nakulahela ngwendi asa kutwalelelaho kutuzeyesa mangana tulikele kupangela Yehova. Oloni twasa ‘kubyanena’ Satana na bilinga byendi bya linyanyamena nga tulinga mwoshe mutwasela kukulahela ngwetu Yehova watuzema.—Jems 4:7.
5. Mwafwa bika kwapwa kwa seho kuliziba ngwetu Yehova watuzema, co lalo watwaka manene mbunge?
5 Nga tukulahela ngwetu Yehova watuzema, co tushwena manene kuyehi nendi. Mwafwa bika twendekela ngoco? Twendeka ngoco mwafwa Yehova watutangele na cashu ca kuzema bakwetu na kushaka kutuzema. Nga munu atumwesa cizemo, oku kukatushongangeya netu tumumwese cizemo. Nga tuliziba ngwetu Yehova watuzema manene, co netu tumuzema manene. (1 Iwa 4:19) Co omwo cizemo cetu hali Yehova citwalelelaho kukola, nendi atwalelelaho kutuzema manene. Mbimbiliya inatuleke mwamubwa ngwayo: “Shweneni kuli Njambi, co nendi ashwena kuli yeni.” (Jems 4:8) Ngeci bika bitunapande kulinga mangana tukulahele manene ngwetu Yehova watuzema?
BIKA BYASA KUTUKWASA TUKULAHELE NGWETU YEHOVA WATUZEMA?
6. Bika bimunapande kulinga nga muli na kuuwasana indi Yehova wamizema?
6 Twaleleleniho kulombela kuli Yehova mangana amikwase kuzibisisa byamizemena. (Luka 18:1; Loma 12:12) Mwasa kulombela kuli Yehova bisimbu byabingi ha litangwa na litangwa mangana amikwase muzibuke mwakalizibila hali yeni. Bisimbu bimo munasa kuliziba kuzeya manene, co kunasa kumikaluwila kukulahela ngweni Yehova wamizema. Oloni anukeni ngweni Yehova wapwa wakama kutubakana mbunge yeni. (1 Iwa 3:19, 20) Yehova amizibuka mwamubwa kutubakana nomu mumulizibukila yeni babenya, co akamono bifwa byabibwa bimwakala nabyo bije hamo yeni kumwanangukile ngweni mwakala nabyo. (1 Samwe 16:7; 2 Kolo 6:30) Ngeci ‘mulekeni byoshe bili ku mbunge yeni’ na kumulomba mangana amikwase mukulahele manene ngweni wamizema. (Samu 62:8) Kutundaho, lingeni byuma bilitombola na malombelo eni ha kulinga byuma binatako.
7-8. Mukanda wa Bisamu utukwasa bati tukulahele ngwetu Yehova watuzema?
7 Kulaheleni byanendeka Yehova. Yehova wapangesele sipilitu yendi ya kujela mu kutwamenena baje basonekele Mbimbiliya. Ngeci twakulahela ngwetu byuma bibasonekele hali Yehova byapwa bya busunga. Cakumwenako, Mwene Devidi wendekele mwamubwa mwakatunyungila Yehova ngwendi: “Yehova ali muyehi na baje banapokoka bimbunge. Akobola baje banazeye.” (Samu 34:18, ftn.) Nga mwazeye munasa kusinganyeka ngweni na umo wahi azibisisa mumuli na kulizibila nambe asa kumikwasa. Oloni Yehova nakulahesa kukala manene muyehi neni ha simbu ya cifweci mangana amikwase. Mwafwa azibuka mwamubwa ngwendi mutonda manene bukwasi bwendi. Devidi wasonekele lalo ngwendi: “Kungulwila misozi yange mu ngonga yobe ya cilambu.” (Samu 56:8) Yehova akamimono nga mwazeye, wamyaka manene mbunge, co akalizibi kubihya mwakamimono muyanda. Ngecilika mwa limbase limo lya mema a mu ngonga ya cilambu mulyapwila lya seho manene kuli munu uje ali na kwenda mu mambo, na misozi yeni nayo yapwa ya seho manene kuli Yehova. Co akanuka bisimbu byoshe bimukazibi kubabala ku mbunge na kulila. Devidi wendekele kutalesa kuli Yehova ngwendi: “Uzibuka bingila byange byoshe.” (Samu 139:3) Yehova akamono byuma byoshe bimukalingi, oloni akaka manene mbunge ku byuma byabibwa bimukalingi. (Hebe 6:10) Mwafwa bika? Mwafwa akakandelela manene mumukeseka mwoshe mumwasela kulinga byuma bije bimuzibisa kubwaha.a
8 Yehova akatuzembeleka kupangesa bisoneka bya cifweci mu kutuleka ngwendi watwaka mbunge, co lalo watuzema manene. Ngwe mutunamwena ha kulibanga, Satana atonda ngwendi tukulahele ngwetu Yehova katuzemene. Ngeci nga simbu imo mushangumuka kuuwasa indi Yehova wamizema, co lihuleni ngweni, ‘Iya injinapande kukulahela, Satana “ishe ya makuli” indi “Njambi wa busunga”?’—Iwano 8:44; Samu 31:5.
9. Yehova nakulahesa byuma muka kuli boshe baje bamuzema? (Ekizoda 20:5, 6)
9 Singanyekeseseni mwakalizibila Yehova ha banu baje bamuzema. Tucisimutwiyeni byendekele Yehova kuli Mosesa na kuli baIsalele. (Tandeni Ekizoda 20:5, 6.) Yehova nakulahesa ngwendi atwalelelaho kumwesa banu baje bamuzema cizemo cije kucesi kutenguluka. Awa majwi atukwasa tukulahele ngwetu, Njambi wa kulongwa kasa kutambula cizemo ku bangamba bendi na kujeneka kubamwesa cizemo cendi. (Nehe 1:5) Ngeci nga mushangumuka kusinganyeka ngweni Yehova kamizemene, co lihuleni ngweni, ‘Kuma njazema Yehova ndi?’ Kutundaho, anukeni ei simpi: Nga mwazema Yehova na kweseka mwoshe mumwasela kumuzibisa kubwaha, mwasa kukulahela ngweni wamizema manene. (Dani 9:4; 1 Kori 8:3) Oku kulumbununa ngwabo nga mwakulahela ngweni mwazema Yehova, co kumwapandele kuuwasana indi wamizema. Mwasa kukulahela ngweni Yehova atwalelelaho kumizema simbu yoshe, co kakamiseze.
10-11. Yehova atonda ngwendi mumone bati ndando ya kupatula? (Galatiya 2:20)
10 Singanyekeseseni ha ndando ya kupatula. Ndando ya kupatula ya Yesu Kristu inapu bwana bwakama manene bwa nana banu Yehova. (Iwano 3:16) Oloni kuma bwapwa bwana na kuli yeni ndi? Eyo! Tucisimutwiyeni byuma byaliwanene nabyo kapositolo Paulu. Anukeni ngweni Paulu walingile byuma byabibi simbu kanda apwe muka-Kristu, co lalo wapandele kutwalelelaho kulifwita na buzeye bwendi. (Loma 7:24, 25; 1 Timo 1:12-14) Oloni wamwene ndando ya kupatula kupwa bwana bwamwanene Yehova. (Tandeni Galatiya 2:20.) Anukeni ngweni Yehova wahwimininine Paulu asoneke awa majwi. Co lalo byuma byoshe bibasonekele mu Mbimbiliya babisonekele mangana bitulongese. (Loma 15:4) Majwi a Paulu amwesa ngwawo Yehova atonda ngwendi mukulahele ngweni, ndando ya kupatula ya Yesu yapwa bwana bwanamyana. Nga mumona ndando ya kupatula mu ngila ei, co mukulahela manene ngweni Yehova wamizema.
11 Twakandelela manene kuli Yehova ha kutuma Munendi kwija na kututsila. Oloni cuma cikwabo cezilile Yesu hano hasi, capwile kulongesa banu busunga hali Njambi. (Iwano 18:37) Obu busunga bunambateselela nomu mwakalizibila Yehova ha bana bendi.
YESU AKATUKWASA BATI TUKULAHELE NGWETU YEHOVA WATUZEMA
12. Mwafwa bika twasa kukulahela byendekele Yesu hali Yehova?
12 Mwakele hano hasi, Yesu washolwele mwamubwa mwafwila Yehova. (Luka 10:22) Twasa kukulahela byendekele Yesu hali Yehova. Mwafwa bika? Mwafwa Yesu wakele simbu yailaha manene na Yehova mwilu kutubakana munu woshe-woshe simbu kanda aije hano hasi. (Kolo 1:15) Yesu azibuka mwamuzemena Ishe, co lalo nalimwena Ishe mwanamwesela cizemo ku tungelo ba kulongwa na bana bendi boshe ba kulongwa ba hano hasi. Yesu akakwasa bati bakwabo bakulahele ngwabo Njambi wabazema?
13. Yesu atonda ngwendi tumone bati Yehova?
13 Yesu atonda ngwendi tuzibuke mwakalizibila Yehova hali yetu. Mu Mikanda ya Muzimbu Waubwa, Yesu natumbula “Tate” kutalesa kuli Yehova lwa kutubakana 140. Co lalo mwakele na kwendeka kuli baka-kumukabangeya, Yesu wakele na kupangesa majwi a kufwa ngwe, “Ishweni” nambe “Ishweni wa mwilu.” (Mate 5:16; 6:26) Simbu Yesu kanda aije hano hasi bangamba ba Yehova bakele na kutumbula Yehova ngwabo ‘Muka-nzili Yoshe,’ ‘Wahakamwa Manene,’ ‘Ishamatanga’ na mazina akwabo akulifwa. Oloni ha bisimbu byabingi Yesu wakele na kutumbula Yehova ngwendi ‘Tate yetu.’ Oku kumwesa ngwabo Yehova atonda ngwendi bangamba bendi boshe balizibe kukala manene muyehi nendi ngecilika mwanike mwakashubuluka kukala muyehi na ishe uje wamuzema. Ngeci Yesu watulongesele ngwendi Yehova watuzema ngwe cisemi wa munalume mwazemena bana bendi. Tucisimutwiyeni ha byakumwenako bibali omwo Yesu wapangesele lijwi lya Tate mu kulumbununa Yehova.”
14. Yesu wamwesele bati ngwendi umo na umo wetu wapwa wa seho manene kuli Tate yetu wa mwilu? (Mateu 10:29-31) (Taleni na cikupulo.)
14 Tucisimutwiyeni ha majwi endekele Yesu aje ali ku mukanda wa Mateu 10:29-31. (Tandeni.) Tunzilili bapwa tuzila babandondo manene baje kubasa kuzema nambe kulemesa Yehova. Nameme ngoco, Tate yetu wamona tunzilili kupwa ba seho manene, co akananguka nameme nga kanzili umo awila hasi. Nga Yehova wamona kanzilili uje wapwa kazila wamundondo manene kupwa wa seho, co twakulahela ngwetu Yehova waka mbunge umo na umo wetu mwafwa twamuzema, co lalo tukamulemesa. Yesu wendekele lalo ngwendi Tate yetu azibuka nameme mu binapu binkambu bya ku mitwe yetu. Hakuwana ngwe Yehova azibuka nameme byuma byabindondo bya ha mubila wetu, twakulahela manene ngwetu watwaka mbunge. Mwa busunga, Yesu atonda tukulahele ngwetu umo na umo wetu wapwa wa seho manene kuli Tate yetu wa mwilu.
Yehova wamona tunzilili kupwa tuzila ba seho kuli ikeye. Co akananguka nameme kanzilili umo awila hasi. Nga Yehova waka mbunge aba tuzila babandondo, co mwasa kukulahela ngweni wamyaka mbunge mwafwa mwamuzema, co lalo mukamulemesa (Taleni paragirafu 14)
15. Majwi ali ku mukanda wa Iwano 6:44 atuleka bika hali Tate yetu wa mwilu?
15 Tucisimutwiyeni ha cakumwenako cikwabo omwo Yesu wapangesele lijwi lya “Tate.” (Tandeni Iwano 6:44.) Ishweni wa mwilu ikeye wamikokele na kumikwasa mulilongese byendi na kumuzema. Mwafwa bika walingile ngoco? Mwafwa wamwene bifwa byabibwa muli yeni. (Bili 13:48) Yesu mwendekele majwi ali ku mukanda wa Iwano 6:44, hamo watalesele ku majwi endekele Yehova aje ali ku mukanda wa Jelemiya 31:3. Oku ku mukanda, Yehova wendekele ku banu bendi ngwendi: “Njinakukokela kuli yange na cizemo cije kucesi kutenguluka.” (Jele 31:3 ftn.; esekeseni Hosiya 11:4.) Awa majwi alumbununa bika? Awa majwi alumbununa ngwawo Tate yetu wa mwilu akamono bifwa byabibwa muli yetu bije hamo kutwesi kunanguka ngwetu tuli nabyo.
16. (a) Bika byanatulongesa Yesu, co mwafwa bika tunapande kumukulahela? (b) Bika byasa kumikwasa mukulahele manene ngweni Yehova wapwa Ishweni wa mwilu? (Taleni na cipalo ca “Yehova Wapwa Tate Yetu Wamubwa.”)
16 Yesu natulongesa ngwendi Yehova kapwile lika Ishe oloni wapwa lalo Tate yetu. Atonda ngwendi tukulahele ngwetu Yehova watuzema, co lalo watwaka manene mbunge. Ngeci nga simbu imo kuli na kumikaluwila kukulahela ngweni Yehova wamizema, co anukeni byendekele Yesu na kumukulahela mwafwa simbu yoshe akendeka busunga, co lalo ikeye azibuka mwamubwa Ishe kutubakana munu woshe-woshe.—1 Pita 2:22.
TWALELELENIHO KUKULAHELA MANENE NGWENI YEHOVA WAMIZEMA
17. Mwafwa bika tunapande kutwalelelaho kukulahela ngwetu Yehova watuzema?
17 Tunapande kutwalelelaho kukulahela manene ngwetu Yehova watuzema. Anukeni ngweni, Satana ali na kulinga mwoshe mwasela mangana atwonowese kupangela Yehova. Atonda ngwendi tuzeye, ngeci atwalelelaho kulinga mwoshe mwasela mangana atwonowese kukulahela ngwetu Yehova watuzema. Kutwapandele kukulahela makuli a Satana.—Yombi 27:5.
18. Mwasa kukanyamesa bati likulahelo lyeni ngweni Yehova wamizema?
18 Muno mu cilongesa, mwalilongesa bimunapande kulinga mangana mukulahele manene ngweni Yehova wamizema. Mwasa kumulomba amikwase kumona bifwa byabibwa byakamono muli yeni. Singanyekeseseni manene ha mavesi a mu Mbimbiliya aje analumbununa mwakakela Yehova mbunge baje bamuzema. Anukeni ngweni, simbu yoshe Yehova wazema baje bamuzema. Co lalo anukeni ngweni wamyanene ndando ya kupatula kupwa bwana. Kulaheleni ngweni Yehova wapwa Ishweni ngwe mwendekelele Yesu. Ngeci, nga munu amihula ngwendi: “Kuma wakulahela ngwobe Yehova wakuzema ndi?” Mukumbululeni mu kusimpa ngweni: “Eyo, Yehova wanjizema! Co njikalingi mwoshe munjasela ha litangwa na litangwa mu kumumwesa ngwange njamuzema.”
MWASO 154 Cizemo Kucesi Kuhwa