Kwaseni Baje Bashaka Kulilongesa bya Njambi

1. Byuma muka bibakalingi banu mutukabambulwila? (Bilinga 13:47, 48; 16:14, 15)

BANU babangi mu simbu ya baka-Kristu bakulibanga, batambwile busunga mubazibile muzimbu waubwa wa Bumwene. (Tandeni Bilinga 13:47, 48; 16:14, 15.) Na ano matangwa, banu bamo bakabwahelela mubakazibi muzimbu waubwa lwakulibanga. Nameme bamo kubesi kutambula ou muzimbu ha bungenzi bwakulibanga, mu kwita kwa simbu bakataba kulilongesa bya Yehova na kushangumuka kumulemesa. Bika bitunapande kulinga nga tuwana banu “ba bimbunge byabibwa”?

2. Cipangi cetu ca kwambulula cinalifu bati na cipangi ca ndimi?

² Twasa kwesekesa cipangi ca kwambulula ku cipangi ca ndimi. Ndimi akateje bimbuto bije bilibanga kuhya na kutwalelelaho kushangelela na kunyunga bije kanda bihye. Mu ngila imolika, nga tuwana munu uje nalibwahesela kutambula muzimbu wa Bumwene, tunapande kumukwasa bwasi-bwasi mangana apwe ndongesi ya Kristu. Oloni baje kubalibwaheselele kuutambula, tucitwalelelaho kubakwasa bamone seho ya kulilongesa bya Njambi na Mbimbiliya. (Iwano 4:35, 36) Kupwa baka-kunanguka kutukwasa tuzibuke ngila yaibwa mwakusimutwiiya na banu batwambulwila. Muno mu cilongesa, tusimutwiya bitunapande kulinga nga tusimutwiya na munu ha bungenzi bwakulibanga mangana tukwase baje banalibwahesela kutambula muzimbu wa Bumwene. Tusimutwiya lalo mutwasa kukwasela banu ba cifweci batwaleleleho kushwena kuyehi na Yehova na kumupangela.

TWASA KUKWASA BATI BAJE BANALIBWAHESELA KUTAMBULA MUZIMBU WA BUMWENE?

3. Bika bitunapande kulinga nga tuwana baje bashaka kulilongesa bya Yehova? (1 Korinte 9:26)

³ Mutukawana banu baje bashaka kulilongesa busunga, tukashaka kubakwasa balilongese bya Yehova na kushwena kuyehi nendi oho bene. Nga tuwana banu ba cifweci ha bungenzi bwakulibanga, tunapande kushangumuka kulilongesa nabo Mbimbiliya na kubalanya ku biwano byetu.—Tandeni 1 Korinte 9:26.

4. Endekeni cakumwenako ca munu uje watabele bwasi kulilongesa Mbimbiliya.

⁴ Kushangumuka cilongesa ca Mbimbiliya. Banu bamo batukasimutwiya nabo bakashaka kulilongesa Mbimbiliya oho bene. Cakumwenako, litangwa limo lyamuciwana mu Canada, munakazi umo waile ku katambo na kwambata broshuwa ya Likuweni Kuyoya Myaka Yoshe! Ndokazi uje wakele ha katambo walekele uje munakazi ngwendi asa kulilongesa nendi Mbimbiliya kwa kujeneka kufweta kupangesa ije broshuwa. Uje munakazi watabele, co balyanene manamba a foni. Kutundaho, lije bene litangwa, uje munakazi watuminine uje ndokazi kamuzimbu na kumwihula simbu ibasa kulilongesa. Uje ndokazi mwalekele uje munakazi ngwendi bashangumuka kulilongesa ku mamaneselelo a calumingo, uje munakazi wamwihwile ngwendi: “Bati nga tushangumuka imene? Kuma mwasa kwija imene ndi?” Uje munakazi waile ku biwano cije bene calumingo na kushangumuka kulinga mwamubwa ku sipilitu.

5. Bika byasa kutukwasa tuzibuke ngila yaibwa mwakulekela munu bya cilongesa ca Mbimbiliya? (Taleni na bikupulo.)

⁵ Keti banu boshe basa kutaba bwasi kulilongesa Mbimbiliya ngwe uje munakazi. Bamo kukambata simbu mangana bashangumuke kulilongesa Mbimbiliya. Ngeci tunapande tahi kusimutwiya nabo ha byuma bije byabaya ku mbunge. Nga tutwalelelaho kumwesa ngwetu twabaka mbunge, co mu kwita kwa simbu basa kushangumuka kuliongesa Mbimbiliya. Bika bitwasa kwendeka nga tuleka munu bya kulilongesa Mbimbiliya? Tuwana cikumbululo ku byuma bibendekele bandolome na bandokazi bamo baje bakala na cashu ca kushangumuka bilongesa bya Mbimbiliya.

6. Bika bitunapande kwendeka mangana tukwase munu amone ngwendi kulilongesa Mbimbiliya kumukwasa?

⁶ Baka-kwambulula na bapainiya bamo bendekele ngwabo mu mitambela imo ya kaye kwapwa kwakubwa kujenjuka kupangesa majwi a kufwa ngwe “cilongesa,” “cilongesa ca Mbimbiliya” nambe “kumilongesa” nga mushaka kuleka munu bya cilongesa ca Mbimbiliya. Bendekele ngwabo kuli majwi aje asa kupanga mwamubwa a kufwa ngwe, “kusimutwiya” na “kuzibuka Mbimbiliya.” Nga mushaka ngweni munu imunaliwana nendi akasimutwiye neni lalo, co mwasa kwendeka ngweni “Kukomokesa kuzibuka ngwetu Mbimbiliya inakumbulula bihula bya seho manene bitukalihula mu buyoye,” nambe ngweni “Nameme Mbimbiliya yapwa libulu lya bulombelo, ikatukwasa mu buyoye bwetu bwa ha litangwa na litangwa.” Mwasa kutwalelelaho kwendeka ngweni, “Mu minutu ya kupwa 10 nambe 15 mwasa kulilongesa byuma bya seho manene bije bimikwasa mu kuyoya kweni.” Mwasa kumuleka bya kulilongesa Mbimbiliya kwa kujeneka kupangesa majwi a kufwe ngwe “kulyangwila matangwa” nambe “calumingo na calumingo,” mwafwa nga mulinga ngoco, co mumulingisa alizibe ngwendi kulilongesa Mbimbiliya capwa cipangi cakama manene.

7. Simbu muka ibakananguka busunga bwa mu Mbimbiliya banu bamo? (1 Korinte 14:23-25)

⁷ Balanyeni ku biwano. Cisholoka mu simbu ya kapositolo Paulu, banu bamo bakele na kunanguka busunga bwa mu Mbimbiliya mubakele na kuya ku biwano bya baka-Kristu. (Tandeni 1 Korinte 14:23-25.) Ebi bikebyo bili na kulingiwa na ano matangwa. Baka-kulilongesa Mbimbiliya babaha bakakolo bwasi ku sipilitu nga bashangumuka kuya ku biwano. Simbu muka imunapande kubalanya ku biwano? Mu libulu lya Likuweni Kuyoya Myaka Yoshe! ha cilongesa 10, hali cilanyo ca kulanya munu ku biwano. Nameme ngoco, mwasa kulanya munu ku biwano nameme simbu kanda mwete ha cilongesa 10. Nga musimutwiya na munu ha bungenzi bwakulibanga, mwasa kumulanya ku biwano bya ku mamaneselelo a calumingo. Co mwasa kumuleka mutwe wa ñanda ya Mbimbiliya yoco calumingo. Co lalo mwasa kumuleka simpi imo ili mu cilongesa ca Kaposhi ka Kukengela ka Kulilongesa koco calumingo.

8. Bika bitunapande kuleka munu itulanya ku biwano byetu? (Isaya 54:13)

⁸ Nga mulanya munu uje ashaka kulilongesa Mbimbiliya ku biwano, co mulumbunwineni mwamubwa kuliseza kuli mukati ka biwano byetu na biwano bya baka-bulombelo byanezilila. Muka-kulilongesa Mbimbiliya umo mwakele ku cilongesa ca Kaposhi ka Kukengela ka Kulilongesa lwakulibanga, wehwile mulongesi wendi ngwendi, “Kuma muka-kutwamenena Kaposhi ka Kukengela azibuka mazina a banu boshe ndi?” Ndokazi wamulekele ngwendi tubaboshe tukeseka mwoshe mutwasela kukwata mazina a bandolome na bandokazi betu mwafwa twapwa lika ngwe naanga. Uje muka-kulilongesa Mbimbiliya wendekele ngwendi ku ceci yabo banu babangi kubalizibuka mazina. Twasa kumulumbunwina lalo bingila bikwabo mubinalisezela biwano byetu na biwano bya baka-bulombelo. (Tandeni Isaya 54:13.) Cakumwenako, tukakunguluka mu kulemesa Yehova na kulilongesa kuli ikeye na kulitakamesa umo na mukwabo. (Hebe 2:12; 10:24, 25) Oku kukalingisa biwano byetu byende mwamubwa na kutukwasa tulilongese bya Yehova, co kutwesi kukabangeya bisemwa. (1 Kori 14:40) Co lalo myela itukalemesela bakaitungu mwamubwa na mu ngila yayasi mangana kutupwile kwakwasi kulilongesa. Kulingila kutwesi kulikobelesa mu biñanda bya bupolitiki, kutwesi kubisimutwiya nambe ku biwano. Co lalo kutwesi kulinga bimata. Cibwaha manene nga mumwesa muka-kulilongesa Mbimbiliya vidio ya mutwe wa Bika Bikalingiwa ku Njubo ya Bumwene? Nga mulinga ngoco, co mumukwasa azibukile cimweja byakawana nga aya ku Njibo ya Bumwene.

9-10. Nga tulanya munu ku biwano byetu, bika bitwasa kumuleka mangana keti alishoshomwene? (Taleni na cikupulo.)

⁹ Bamo bakakwata-kwata ku masinde kukunguluka netu mwafwa bakasinganyeka ngwabo nga baija ku biwano byetu, co tubalomba baseze bulombelo bwabo. Lekeni munu imulanya ngweni tukabwahelela kutambula bangenzi, co kutwesi kubasindiya bendeke nambe kulingako byuma bimo. Baje bali na binaanga basa kwija na bana babo. Ku biwano byetu banike kubesi kubalongesela kwa likalyabo, oloni bakalilongesela hamo na bisemi babo. Kulinga ngoco kukwasa bisemi bazibuke ngwabo bana babo kubesi mu bushonde. Co kubakwasa lalo bazibuke bibali na kulilongesa bana babo. (Detro 31:12) Ku biwano byetu kutwesi kufwetesa nambe kwitisamo lilonga. Tukakabangeya lishiko lya Yesu lije lyendeka ngwalyo: “Bamyanene bya bwana, co neni aneni bya bwana.” (Mate 10:8) Mwasa kuleka lalo munu imuli na kulanya ngweni nashubuluka kuzala mu ngila yoshe-yoshe ije imwesa kasingimiko. Njambi akamono mbunge ya munu keti sholwesi, embwe.—1 Samwe 16:7.

¹⁰ Nga munu aija ku biwano, lingeni mwoshe mumwasela mangana mumukwase alizibe ngwendi munamutambula. Muzimbuleni ku bakulunu ba cikungulukilo na ku bandolome na bandokazi. Nga aliziba ngwendi munamutambula, co asa kukaija lalo. Ha simbu ya biwano nga munanguka ngweni kesi na Mbimbiliya, co tandeleni hamo nendi Mbimbiliya na kumukwasa azibisise ñanda ya Mbimbiliya nomu mutukalilongesela.

BIMUNAPANDE KULINGA NGA MUSHANGUMUKA KULILONGESA NA MUNU MBIMBILIYA

11. Mwasa kukabangeya bati simbu na cinoneko ca munu imukalilongesa nendi Mbimbiliya?

¹¹ Bika bitunapande kwanuka nga tulilongesa na munu Mbimbiliya? Kabangeyeni simbu na cinoneko ca munu imukalilongesa nendi. Nga mwalikumiya kulilongesa, co lingeni mwoshe mumwasela kuyako ha simbu imunalikumiya nameme nga banu mu citingitingi ceni kubesi kunyunga simbu. Nga mulilongesa lwakulibanga, cibwaha nga mulilongesa ha simbu yaindondo lika. Bandolome na bandokazi baje banalilongesa na banu babangi Mbimbiliya bendekele ngwabo kwapwa kwakubwa kumanesa cilongesa nameme nga munu imuli na kulilongesa nendi acishaka kuzibuka byabingi. Co lalo keti mwendeke manene, oloni aneni simbu babenya njibo endeke mwali na kulizibila.—Prov 10:19.

12. Omwo tushangumuka kulilongesa na munu Mbimbiliya cilengo muka citunapande kukala naco?

¹² Mucishangumuka lika kulilongesa na munu Mbimbiliya, cilengo ceni cinapande kupwa ca kumukwasa azibuke na kuzema Yehova na Yesu. Mwasa kulinga ngoco nga mumuleka byuma biyendeka Mbimbiliya kutubakana kumuleka biyongola byeni. (Bili 10:25, 26) Kapositolo Paulu watwakelele mwanja waubwa mwafwa mwakele na kulongesa banu, bilongesa byendi byemanene hali Kristu uje yatumine Yehova mangana akutukwase kumuzibuka na kumuzema. (1 Kori 2:1, 2) Kapositolo Paulu wamwesele lalo seho ya kukwasa bandongesi babaha bakale na bifwa byabibwa bije bitwasa kwesekesa ku goudi, siuva na mamanya a seho. (1 Kori 3:11-15) Ebi bifwa binambateselela likulahelo, mana, kunanguka na kuzibila Yehova lyoba. (Samu 19:9, 10; Prov 3:13-15; 1 Pita 1:7) Tembwinineni mwakele na kulongesela kapositolo Paulu ha kukwasa munu imukalilongesa nendi akale na likulahelo lya kukanyama na kukanyamesa busamba bwendi na Ishe wa mwilu wa cizemo Yehova.—2 Kori. 1:24.

13. Twasa kumwesa bati mbunge ya kubandamena na kupwa baka-kuzibisisa omwo tukwasa baje bashaka kulilongesa Mbimbiliya? (2 Korinte 10:4, 5) (Taleni na cikupulo.)

¹³ Tembwinineni mwakele na kulongesela Yesu ha kukala na mbunge ya kubandamena na kupwa baka-kuzibisisa. Keti mwihule munu imuli na kulilongesa nendi bihula bije byasa kumuzibisa shwamwa. Nga kuli simpi yali na kwonwa kuzibisisa, co mwasa kuseza oyo simpi na kutwalelelaho kulilongesa. Co nga mwamanesa, mwasa kwilukila ije simpi imunasezele. Kutubakana kumusindiya atabe byuma bimuli na kulilongesa, mwaneni simbu ya kusinganyekesesa na kutengulula bisinganyeka byendi. (Iwano 16:12; Kolo 2:6, 7) Mbimbiliya inendeka ngwayo bilongesa bya makuli byapwa ngwe “byuma bya kukola manene” bitunapande “kuhyana.” Mu ndaka yakulibanga ibasonekele Mbimbiliya, bapangesele cakumwenako ca kaposhi kaje kabanapande kuwisa. (Tandeni 2 Korinte 10:4, 5.) Kunasa kukaluwa kuli munu imukalilongesa nendi Mbimbiliya kwecela kukulahela byuma byanakulahela ha myaka yaingi. Ngeci munapande kumukwasa tahi atunge kaposhi kakaha ka cifwisa. Kulumbununa ngwabo munapande kumukwasa akulahele Yehova. Kulinga ngoco kulingisa kumupwile kwakwasi kwecela kukulahela byuma byanakulahela ha myaka yaingi.—Samu 91:9.

MWASA KUKWASA BATI BABAHA BAJE BANAIJA KU BIWANO?

14. Tunapande kulinga bati baje banaija lwakulibanga ku biwano byetu?

¹⁴ Yehova atonda ngwendi tulinge banu boshe mwamubwa na kujeneka kubamwesa kangu mwafwa ya mwela kubatunda, cisemwa cabo nambe mwafwa ya byuma bibali nabyo. (Jems 2:1-4, 9) Ngeci twasa kumwesa bati cizemo baje banaija lwakulibanga ku biwano byetu?

15-16. Twasa kukwasa bati baje banaija ku biwano byetu lwakulibanga mangana balizibe kushubuluka?

¹⁵ Bamo bakaija ku biwano byetu mu kushaka kumona bikalingiwako, nambe hamo kuli umo wabashongangeyeye kwija ku biwano byetu. Ngeci kutwapandele kukwata-kwata ku masinde kusimutwiya na banu ba cifweci nga banaija ku biwano. Batambuleni mwamubwa na nzanzu, oloni keti mumwese manene nzanzu ya kutubakanesa kutewa mubazibisa shwamwa. Balanyeni batumame hamo neni, co tandeleni hamo nabo Mbimbiliya na mabulu a kulilongesa nambe kubana abo nga kuwali. Kutundaho, waneni bingila bikwabo mumwasa kubakwasela balizibe kushubuluka. Munalume umo mwaile ku Njibo ya Bumwene, walekele ndolome uje wamutambwile ngwendi nalishoshomwenene manene mwafwa te kazalele mwamubwa ngwe mubanazalelele bakwabo boshe. Uje ndolome wakwasele uje munalume alizibe kushubuluka na kumuleka ngwendi nameme tukazala mwamubwa ku biwano, kutwalisezele na banu boshe. Mu kwita kwa simbu, uje munalume bamumbwitikile, oloni kesi kwibala mwamukwaselele uje ndolome alizibe kushubuluka mwezile lwakulibanga ku biwano. Tunapande kwanuka ngwetu nga tutambula munu uje naija ku biwano lwakulibanga, tunapande kunyanyama na kujeneka kumwihula bihula bije byasa kumuzibisa shwamwa nambe kumwihula biñanda bije kubyatukundamene.—1 Pita 4:15.

¹⁶ Twasa kukwasa lalo baje banaija ku biwano lwakulibanga balizibe kushubuluka nga twendeka mu kasingimiko ha banu baje kubapwile Bakaleho ba Yehova nambe ha byuma bibakulahela omwo tusimutwiya, kukumbulula nambe kwendeka biñanda. Keti mupangese majwi nambe endekesi ije yasa kubatanwisa nambe kubalingisa balizibe ngwabo muli na kubashaula. (Tito 2:8; 3:2) Cakumwenako, kutwapandele kwendeka ha byuma bibakulahela mu ngila ije kuimwesa kasingimiko. (2 Kori 6:3) Bandolome baje bakendeka biñanda bya Mbimbiliya bya mbunga banapande kunyanyama manene hali ei ñanda. Basa kumwesa ngwabo banaka mbunge banu baje kubapwile Bakaleho baje banakunguluka nga balumbununa majwi nambe byuma bije kuyasa kuzibisisa mbunga.

17. Bika bitunapande kulinga nga tuwana banu “ba bimbunge byabibwa” mu cipangi cetu ca kwambulula?

¹⁷ Cipangi ca kupwisa banu bandongesi tunapande kucipanga bwasi-bwasi. Co tuli na kutwalelelaho kuwana banu “ba bimbunge byabibwa bya kushaka kuyoya myaka yoshe.” (Bili 13:48) Nga tuwana banu baje bashaka kulilongesa Mbimbiliya, keti tukwata-kwate ku masinde kushangumuka kulilongesa nabo Mbimbiliya nambe kubalanya ku biwano byetu. Nga tulinga ngoco, co tubakwasa bashangumuke kwenda mu “ngila . . . itwala ku kuyoya.”—Mate 7:14.