Tukulukazi, Mwapwa mu ba Seho mu Cikungulukilo

Hamo neni kumwasa kulinga byuma bimwakele na kulinga kunima mwafwa ya kukulubala. Nameme munapangela Yehova mu kulongwa ha myaka yaingi, munasa kushangumuka kulimona mu ngila ya kuhenga mwafwa kumwasa kulinga byuma byabingi ha simbu ino. Cakumwenako, munasa kushangumuka kwesekesa byuma bimwakele na kulinga kunima na byuma bimwasa kulinga ha simbu ino. Nga mukemwo mumuli na kulizibila, co mwasa kuhyana bati bisinganyeka bya cifweci?

YEHOVA ATONDA NGWENDI MULINGE BYUMA MUKA?

Lihuleni ngweni, ‘Yehova atonda ngwendi njilinge byuma muka?’ Majwi ali ku mukanda wa Detronoma 6:5 asa kumizembeleka. Awa majwi ngwawo: “Zemeni Shukulu Kalunga Njambi yeni na bimbunge byeni byoshe, na mwonyo weni woshe, na nzili yeni yoshe.” MBB.

Kwesekesa nou mukanda, Yehova atonda ngwendi mumupangele na mbunge yeni yoshe na mwonyo weni woshe na nzili yeni yoshe. Kuzibuka ngoco kumilingisa mujeneke kulyesekesa ku bakweni nambe kwesekesa byuma bimwasa kulinga ha simbu ino ku byuma bimwakele na kulinga kunima.

Mumwapwile banike, hamo mwakele na kulinga mwoshe mumwasela kupangela Yehova. Nameme byuma binatenguluka ha simbu ino, muli na kulinga mwoshe mumwasela kupangela Yehova kwesekesa na nzili yeni. Nga mumona byuma mu ngila ei, co munanguka ngweni muli na kupangela Yehova na nzili yeni yoshe ngwe mumwakele na kulingila kunima.

MUCASA KUKWASA BAKWENI NAMEME MUNAKULUBALA

Kutubakana kwaka manene mbunge ku byuma kumwasa kulinga ha simbu ino, akeni mbunge ku bingila mumwasa kukwasela bakweni ha kupwa kakulukazi. Ha kupwa muka-Kristu wa kakulukazi, mwasa kulinga byuma bije kumwakele na kulinga mumwapwile banike. Cakumwenako, mwasa kulinga byuma binatako:

Lekeniko bakweni byuma bimunalilongesa mu kuyoya kweni. Singanyekeseseni ha majwi a mu Mbimbiliya anatako:

Mwene Devidi wendekele ngwendi: “Njapwile nji mwanike, co hano njinakolo. Oloni kanda njimoneho munu wa kusungama bamumbila kuti, nambe kumona bana bendi baya na kuhelyangela kuya na kutonda byakulya.”—Samu 37:25.

Joshua wendekele ngwendi: ‘Simbu yange ya kutsa inete. Munu na munu azibuke mu mbunge yendi na mu mwonyo wendi ngwendi Yehova Njambi yeni namyana byuma byoshe byabibwa bije byakulahesele. Bikulaheso byoshe binalingiwa, co kukwesi cimo canonwa cahi.’—Joshua 23:14.

Hamo mumwapwile banike mwapangesele awa majwi mu kushongangeya bakweni. Nameme ngoco, majwi a Joshua na Devidi apwile a kutundilila kwisi ya mbunge mwafwa balimwenenene mwabakwaselele Yehova ha myaka yaingi.

Nga munapangela Yehova ha myaka yaingi, neni mwasa kuleka bakweni bubwa bukatundu mu kupangela Yehova. Kuma muli na kwanuka simbu imwalimwenenene Yehova akwasa banu bendi mu ngila ya kulitila ndi? Nga mukemwo, co lekeniko bakweni. Kulinga ngoco kumilingisa mubwahelele ngecilika mumukabwahelela mumukashongangeya bakweni. Mwasa kushongangeya manene bandolome na bandokazi beni nga mubaleka byuma bimunaliwana nabyo mu kuyoya kweni.—Loma 1:11, 12.

Ngila ikwabo imwasa kushongangeyelamo bakweni inapu kukunguluka kushwa kumo ku biwano ku Njibo ya Bumwene nga citaba kulinga ngoco. Nga mulinga ngoco, co mukanyama na kushongangeya bandolome na bandokazi beni. Connie itundeka hakulibanga wendekele ngwendi: “Kuya ku biwano bya cikungulukilo ku Njibo ya Bumwene kukanjikwasa mangana keti njizeye. Kunjasa kuzeya mwafwa bandolome na bandokazi bakanjimwesa cizemo ku Njibo ya Bumwene. Njikeseka kumwesa kukandelela ku bakwetu ha kubanako bwana bwabundondo. Co lalo njikapangako binjasa mu cipangi ca Yehova ngecilika mwa bandolome na bandokazi bange.”

YEHOVA AKAKANDELELA KU BYOSHE BIMUKAMULINGILA

Mu Mbimbiliya muli byakumwenako byabingi bya banu baje baazemene manene Yehova nameme kubasele kulinga byabingi ngwe mubakele na kulingila kunima. Tucisimutwiyeni ha cakumwenako ca Simyoni, Kaisalele wa kakulukazi uje wacikele na kuyoya mwasemukile Yesu. Simyoni mwakele na kuya ku tempele, hamo wakele na kumona bakwenje bapanga bipangi bya seho ku tempele. Hamo Simyoni wasinganyekele ngwendi kesi na seho kuli Yehova mwafwa kasele kupangela Yehova ngwe mubakele na kulingila obo bakwenje. Oloni Yehova wamwene Simyoni kupwa ngamba yendi wa kulongwa, co wamubezikisile omwo wamwene Yesu oku acili mbututu. Co lalo Yehova wapangesele Simyoni mu kupolofweta byou Mesiya. (Luka 2:25-35) Cili bene Yehova kakele mbunge ku bukulukazi bwa Simyoni, oloni wakele mbunge ku likulahelo lyendi lya kukanyama, “co sipilitu ya kujela yakele hali ikeye.”

Neni kulaheleni ngweni Yehova wamona bipangi bimukamupangela mu kulongwa kupwa bya seho manene, nameme kumwasa kulinga byuma byabingi. Yehova “atambula bwana buje bwana munu, kwesekesa na byuma byali nabyo, keti kwesekesa na byuma bije kesi nabyo.”—2 Kori 8:12.

Ngeci akeni mbunge ku byuma bimwasa kulinga. Cakumwenako, singanyekeseseni ha bingila bya kuliseza-seza mumwasa kwambulwila nameme nga mwambulula lika simbu yaindondo. Mwasa kushongangeya bandolome na bandokazi beni ha kubatumina foni nambe kubasonekela kadi. Mwasa lalo kubashongangeya nga mubamwesa cizemo mu byuma byabindondo, maneneni nga munapangela Yehova ha myaka yaingi.

Bamo kubasa kulinga byabingi mwafwa ya kujeneka kulikangula mwamubwa ku mubila. Taleni byakuliwana nabyo bya ku East Africa mu cipalo cili kwisi ca mutwe wa “Mbimbiliya Yamwobwele.”

Anukeni ngweni likulahelo lyeni na kulongwa kweni byasa kushongangeya bakweni. Munakela bakweni mwanja wa kukolesa, co kulaheleni ngweni “Njambi wapwa wa kusungama, ngeci kasa kwibala bipangi byeni na cizemo cimunamwesa mwafwa ya lizina lyendi omwo munapangela bakujela na kutwalelelaho kubapangela.”—Hebe 6:10.

TWALELELENIHO KULINGA MWOSHE MUMWASELE KUKWASA BAKWENI

Baka-kutondesesa banawana ngwabo tukulukazi baje bakakwasa bakwabo, bakakala na bukangule bwabubwa na kusinganyeka mwamubwa na kuyoya simbu yailaha.

Nameme ngoco, kulingila bakwetu byuma byabibwa kukumanesa bukalu bukaija mwafwa ya bukulukazi. Kubanga Bumwene bwa Njambi lika bukebwo bukamanesa byuma bikalingisa banu bakulubale na kutsa, kulumbununa bubi butwatambwile kuli Adama.—Loma 5:12.

Oloni kupangela Yehova kuje kunambateselela na kukwasa bakweni bamuzibuke, kumilingisa mukulahelele manene byuma byanatukulahesa Yehova kulutwe na kumikwasa mulikangule ku mubila. Tukulukazi, zibukeni ngweni Yehova akakandelela ku byuma bimukamulingila, co bandolome na bandokazi bakakandelela ku mwanja weni wa likulahelo.