Pweni va Kulongwa Kuli Yehova

1, 2. Mwafwa vika Yonatana walikutilile vuthamba na Ndaviti na kupwa wa kulongwa kuli ikeye?

YONATANA hamo wakomokele kuthimpa kwa mwanike Ndaviti. Ndaviti wathsiyile Ngolyata, cho watwalele “mutwe wa ngolyata” kuli Mwene Saulu wa Isalele, ishe ya Yonatana. (1 Samwele 17:57) Yonatana wamwene ngwendi Njambi wakele na Ndaviti, cho kushangumuka vene oho, Yonatana na Ndaviti valikutile vuthamba. Valikumiyiye ngwavo vapwa va kulongwa kuli umo na mukwavo. (1 Samwele 18:1-3) Yonatana wapwile wa kulongwa kuli Ndaviti mu kuyoya kwendi kwoshe.

² Yonatana watwaleleleho kupwa wa kulongwa kuli Ndaviti nameme Yehova wangwile Ndaviti kupwa mwene wa Isalele uje akaingaho. Yonatana walijakamenene omwo ishe Saulu washakele kuthsiya Ndaviti. Yonatana wathzivukile ngwendi Ndaviti walishwekele mu mambo kuyehi na Holeshe, ngechi waileko kukamushongangeya akulahele Yehova. Yonatana walekele Ndaviti ngwendi: “Kethi ukale na lyova. Tate Saulu kakatha kukuvulumuna embwe. Ikeye nathzivuka mwamuvwa yove ukapwa mwene mu Isalele, cho yange njikapwa wa kukwata.”—1 Samwele 23:16, 17.

3. Chuma muka chapwile cha theho manene mu kuyoya kwa Yonatana kutuvakana kulongwa kuli Ndaviti, cho twathzivuka vati ngocho? (Kengeni chikupulo ha liputa 19.)

³ Kakangi tukathingimika vanu va kulongwa. Kuma twathingimika Yonatana mwafwa wapwile wa kulongwa kuli Ndaviti ndi? Embwe. Kulongwa kuli Njambi kukekwo kwapwile kwa theho manene mu kuyoya kwa Yonatana. Mukemwo wapwile wa kulongwa kuli Ndaviti, cho kamuthzivilile chipululu ha kumwangula kupwa mwene. Yonatana wakwathele Ndaviti akulahele Yehova. Ndaviti na Yonatana vapwile va kulongwa kuli Yehova na kuli umo na mukwavo. Vanyungile chino chikumiyo chavo: “Mwa vuthunga vene Shukulu Kalunga akale hamo netu, vatekulwila vove na vatekulwila vange, vakanyunge na kukoletha chikumiyo cha kujela echi tunalikumiya.”—1 Samwele 20:42.

4. (a) Vika vyatha kututhzivitha kuvwaha na kupwa kushuvuluka? (b) Vika vituthimutwiya muno mu ñanda?

⁴ Netu tunapande kupwa va kulongwa kuli vaka-nanga yetu na kuli vavuthamba vetu na kuli vandolome na vandokathzi mu chikungulukilo. (1 Tesalonika 2:10, 11) Oloni chuma chakama, tunapande kupwa va kulongwa kuli Yehova. Ikeye watwanene kuyoya. (Kujombolola 4:11) Nga tupwa va kulongwa kuli Njambi, cho tushuvuluka na kupwa va kuvwahelela. Oloni tuthzivuka ngwetu tunapande kulongwa kuli Njambi, nameme mu thimbu yaikalu. Muno mu ñanda, tuthimutwiya omwo mwanja wa Yonatana utukwatha tupwe va kulongwa kuli Yehova mu vingila evi viwana: (1) nga tulithziva ngwetu kutwapandele kuthingimika munu umo uje ali na moko, (2) nga twangula owo itunapande kumwetha kulongwa, (3) nga mukulunu mu chikungulukilo onwa kututhzivithitha nambe kutulinga mwamuvi, (4) nga chachikalu kunyunga lishiko lyetu.

NGA TULITHZIVA NGWETU KUTWAPANDELE KUTHINGIMIKA MUNU UMO UJE ALI NA MOKO

5. Mwafwa vika kwakaluwilile vaIsalele kupwa va kulongwa kuli Yehova omwo Saulu wapwile mwene?

⁵ Yonatana na vaIsalele vakele mu vukalu. Mwene Saulu, ishe ya Yonatana watengulukilile Yehova cho wamuvyanene. (1 Samwele 15:17-23) Oloni Njambi watavethele Saulu atwaleleho kuyula ha myaka yaingi. Ngechi chakaluwilile vanu kupwa va kulongwa kuli Njambi, mwafwa mwene uje wakele ha “litanda” lya Yehova wakele na kulinga vyavivi.—1 Mithzimbu 29:23.

6. Tuthzivuka vati ngwetu Yonatana wapwile wa kulongwa kuli Yehova?

⁶ Yonatana wapwile wa kulongwa kuli Yehova. Achithinganyekeni vyalingile Yonatana omwo Saulu washangumukile kutengulukila Njambi. (1 Samwele 13:13, 14) Ha thimbu oyo, kwethzile vaFilisitiya vavangi na matemba 30,000 kwakulwitha vaIsalele. Saulu wakele lika na mashwalale 600, cho ikeye na Yonatana vakevo lika vakele na vitwa. Oloni Yonatana katewele. Wanukile majwi a kapolofweto Samwele uje wendekele ngwendi: “Shukulu Kalunga . . . kakamithethze embwe, omwo nayongola kumipwitha vanu vendi.” (1 Samwele 12:22) Yonatana walekele lishwalale umo ngwendi: “Kukwethi chimuvindika [Yehova] kutuhyanetha, nambe tunapu tuvavandondo lika.” Ngechi Yonatana nowo lishwalale, vakalwithile vaFilisitiya, cho vathsiyile vanu vakweta ku 20. Yonatana wakulahelele Yehova, cho Yehova wamukwathele. Yehova wanenele lindunduma, cho vaFilisitiya vajujwile. VaFilisitiya valitengulukilile mwavomwavo, ngechi vaIsalele vahyanene.—1 Samwele 13:5, 15, 22; 14:1, 2, 6, 14, 15, 20.

7. Yonatana wayoyele vati na ishe?

⁷ Nameme Saulu watwaleleleho kutengulukila Yehova, oloni Yonatana kakangi wononokele kuli ishe. Chakumwenako, Saulu na Yonatana vakele na kuya hamo ku ndthzita mu kwovola vanu va Njambi.—1 Samwele 31:1, 2.

8, 9. Mwafwa vika tunapande kwononoka kuli vaje vali na moko?

⁸ Netu twatha kulongwa kuli Yehova nga twononoka mashiko amo a fulumende ya lifuti litwakala, ngwe mwalingile Yonatana. Yehova ashaka ngwendi twononoke kuli ava “vaka-kushwana” mwafwa ikeye navatavetha vatuyule. (Tandeni Loma 13:1, 2.) Mukemwo tunapande kuthingimika vantwama va fulumende, nameme tulithziva ngwetu kutwapandele kuvathingimika mwafwa kuvethi na vuthunga. Tunapande kwononoka kuli vaje voshe vanatavetha Yehova ngwendi vatutwamenene.—1 Kolinte 11:3; VaHevelu 13:17.

⁹ Ndokathzi Olga wa ku South America, wamwethele kulongwa kuli Yehova ha kuthingimika munalume wendi uje wakele na kumuyandetha.^[1] (Kengeni viñanda vya kushongo.) Vithimbu vimo munalume wendi kakele na kumwendeketha, nameme kumwendeka majwi amavi mwafwa wapwile Mukaleho wa Yehova. Munalume wendi wamuleke ngwendi litangwa limo akambata na vana na kumuthethza. Oloni Olga kamwilwithilile “vuvi vwendi.” Wethekele kupwa munakathzi wamuvwa. Wamutelekelele vyakulya na kumukushila vuthzalo na kunyunga vavushoko va munalume. (Loma 12:17) Vithimbu vimo, Olga wathindikiyiye munalume wendi kukamona vavushoko na vavuthamba vendi. Chakumwenako, munalume wendi mwashakele kuya ku kuthsa kwa vaishe ku nganda yeka, Olga wavwahethele vyuma vyoshe vivambatele mu vungendthzi. Cho omwo vatwalele muvila ku chachi, Olga wavandamenene hanja. Omwo mwetile myaka yaingi, munalume wendi washangumukile kumunyunga mwamuvwa mwafwa watwaleleleho kumuthingimika. Ano matangwa ou munalume akashongangeya Olga aye ku viwano na kumutwala. Thimbu imo nendi akai ku viwano.—1 Petulu 3:1.

NGA TWANGULA OWO ITUNAPANDE KUMWETHA KULONGWA

10. Yonatana wathzivukile vati ngwendi napandele kulongwa ku Ndaviti?

¹⁰ Yonatana wonwene mwakulingila omwo ishe Saulu wendekele ngwendi athsiya Ndaviti. Yonatana washakele kulongwa kuli ishe, cho washakele lalo kulongwa kuli Ndaviti. Yonatana wathzivukile ngwendi Njambi wakele na Ndaviti, kethi Saulu, mukemwo wangwile kulongwa kuli Ndaviti. Wanangwile Ndaviti alishweke, cho walekele lalo ishe ovyo kapandelele kuthsiya Ndaviti.—Tandeni 1 Samwele 19:1-6.

11, 12. Kuthzema Yehova kutushongangeya vati tupwe va kulongwa kuli ikeye?

¹¹ Alice, ndokathzi wa ku Australia, nendi wangwile munu yapandele kumwetha kulongwa. Omwo washangumukile kulilongetha Mbimbiliya, walekele nanga yendi vyakele na kulilongetha. Wavalekele lalo ngwendi kalingi navo chilika cha Kilisimasi, cho walumbunwine ovyo wavyanenene kuchilinga. Ha kulivanga kuvamulingile mumo, oloni mu kwita kwa thimbu vamuluvalelele manene. Vathinganyekele ngwavo Alice navayengula. Vaina ya Alice vendekele ngwavo kuvashakele kumumona lalo. Alice wendekele ngwendi: “Njalithzivile manene kuvihya mwafwa njathzemene nanga yange. Oloni njangwile kuthzema Yehova na Yesu, cho vanjimbwitikile ha chiwano chateleko.”—Mateo 10:37.

¹² Kutwapandele kulongwa ku vyuma vyeka kutuvakana kulongwa kuli Yehova. Chakumwenako, Henry wathzemene manene kweha chesi na chivunga cha vakwavo vaka-sikola, cho washakele ngwendi sikola yavo ihyane. Ngechi kakele na thimbu ya kuya mu lihya na ku viwano, mwafwa wakele na kweha ovu vweho kushongo ya chalumingo. Henry wendekele ngwendi wamwene chesi kupwa ya theho kutuvakana kulongwa kuli Njambi. Ngechi walikelele kweha chesi.—Mateo 6:33.

13. Vika vitukwatha kwangula vya kulinga nga tuli na vukalu mu nanga?

¹³ Thimbu imo kunatha kupwa kwakukalu kulongwa ku munu na munu wa mu nanga ha thimbu imo lika. Chakumwenako, Ken wendekele ngwendi: “Njashakele kuya na kumona vanana vavakulu na kuvalanya vakutumbame netu. Oloni vanana na munakathzi wange kuvashakele.” Wendekele ngwendi: “Kunjathele kuthzivitha umo kuvwaha kwa kujeneka kuluvaletha mukwavo.” Ken wathinganyekele viyendeka Mbimbiliya ha ñanda eyi, cho wawanene ngwendi napandele kuthzivitha munakathzi wendi kuvwaha na kulongwa kuli ikeye. Ken watondele ngila yeka ije yathzivithile munakathzi wendi kuvwaha. Walumbunwinine munakathzi ovyo napande kuthzivila ngothzi vainamweno. Walumbunwinine lalo vaina ovyo vanapande kuthingimikila munakathzi wendi.—Tandeni Kushangumuka 2:24; 1 Kolinte 13:4, 5.

NGA MUKULUNU MU CHIKUNGULUKILO ONWA KUTUTHZIVITHITHA NAMBE KUTULINGA MWAMUVI

14. Saulu wayoyele vati na Yonatana?

¹⁴ Twatha lalo kulongwa kuli Yehova nga mukulunu mu chikungulukilo atulinga mwamuvi. Mwene Saulu vamwangwile kuli Njambi, oloni wayandethele munendi wa kulithemena. Kathzivithithile vyalingithile Yonatana athzeme Ndaviti. Yonatana mwakele na kukwatha Ndaviti, Saulu waluvalele manene, cho wamushawile hakati ka mbunga. Oloni Yonatana watwaleleleho kuthingimika ishe. Watwaleleleho lalo kulongwa kuli Yehova na kuli Ndaviti uje yangwile Njambi kupwa mwene wa Isalele.—1 Samwele 20:30-41.

15. Tunapande kulinga vati nga ndolome katulingi mwamuvwa?

¹⁵ Ano matangwa, vakulunu mu vikungulukilo vyetu vakalifwiti kulinga mwamuvwa ku vanu voshe. Oloni ava vakulunu kuvalumbunukile. Mukemwo vithimbu vimo kuvethi kuthzivithitha nga tunalingi vimo. (1 Samwele 1:13-17) Nga kuvatwakwile nambe kututhzivithitha mwamuvwa, tunapande kupwa va kulongwa kuli Yehova.

NGA CHACHIKALU KUNYUNGA LISHOKO LYETU

16. Mu vingila muka mutwatha kupwa va kulongwa kuli Njambi?

¹⁶ Saulu washakele ngwendi Yonatana apwe shwana yendi, kethi Ndaviti embwe. (1 Samwele 20:31) Oloni Yonatana wathzemene Yehova, cho washakele kulongwa kuli ikeye. Ngechi kathzivilile Ndaviti chipululu, oloni walikutile vuthamba nendi na kunyunga lishiko lyendi. Woshe wathzema Yehova na kulongwa kuli ikeye, “thimbu yoshe akalingi vije vyanakulahetha, nameme vyuma vifwe vati indi vati kuli ikeye.” (Myatho 15:4) Netu nga tupwa va kulongwa kuli Njambi, cho tulinga vitunakulahetha. Chakumwenako, nga tulikuta kulinga vimo mu mingotho, cho tunapande kuvilinga nameme vyavikalu. Nga tukala na vukalu mu vulo, tumwetha ngwetu twathzema Yehova nga tupwa va kulongwa kuli muka-njuvo yetu.—Tandeni Malakiya 2:13-16.

17. Echi chilongetha chinamikwatha vati?

¹⁷ Tunapande kutembwinina Yonatana mu kupwa va kulongwa kuli Njambi, kutuvakana kukala na chipululu. Tunapande kulongwa kuli vandolome na vandokathzi vetu, nameme vanatuviyithila. Tunapande lalo kulongwa kuli Yehova, nameme mu thimbu yaikalu. Nga tulinga ngocho, tuthzivitha Yehova kuvwaha, cho tupwa va kuvwahelela. (Vithimo 27:11) Tukulaheleni ngwetu atulingila vyavivwa thimbu yoshe na kutunyunga. Mu chilongetha chinatako, tukathimutwiya vya vanu vamo vaje vapwile va kulongwa na vaje kuvapwile va kulongwa mu thimbu yayoyele Ndaviti.