Cilongesa ca Mbimbiliya Cibakatwamenena Bakaleho ba Yehova Cafwa Bati?
Bakaleho ba Yehova banabwahesako ngila yaibwa imwasa kulilongeselamo Mbimbiliya. Eci cilongesa ca Mbimbiliya cimikwasa:
Mupwe ba kubwahelela mu kuyoya
Mupwe kabusamba ka Njambi
Muzibuke bikulaheso bya kulutwe bili mu Mbimbiliya
Bili hano ha liputa
Nga njitaba kulilongesa Mbimbiliya, kuma co banjisindiya kupwa Mukaleho wa Yehova ndi?
Kuma munu asa kulilongesa likalyendi kwa kujeneka yalilongesa nendi ndi?
Bika bikalingiwa ha cilongesa ca Mbimbiliya?
Mukaleho imulilongesa-longesa nendi amikwasa kuzibuka mwamubwa Mbimbiliya, omwo mulilongesa ñanda imo na imo. Kupangesa libulu lya Likuweni Kuyoya Myaka Yoshe!, muzibuka kamandondo- kamandondo muzimbu uli mu Mbimbiliya nomu muwasa kumikwasela. Nga mushaka kuzibuka byabingi, kengeni ei vidio.
Kuma njinapande kufweta ndi?
Embwe. Bakaleho ba Yehova bakakabangeya cinangulo canene Yesu bandongesi bendi. Wabashikile ngwendi: “Bamyanene bya bwana, co neni aneni bya bwana.” (Mateo 10:8) Co lalo kumulanda mabulu amupangesa mu kulilongesa aje anambateselela Mbimbiliya na libulu lya Likuweni Kuyoya Myaka Yoshe!
Cilongesa cikambata simbu ya kupwa hali?
Eli libulu lili na bilongesa 60. Yeni babenya mulyangwila mucendela cilongesa. Bwingi bwa baka-kulilongesa bakashaka kumanesa cilongesa cimo nambe kutubakana, mu calumingo.
Njasa kushangumuka bati kulilongesa?
1. Shulisilileni fomu ya ha intaneti. Tupangesa lika mizimbu yeni mu kubwahesa ngwetu Mukaleho wa Yehova umo amyendele.
2. Mukaleho umo asimutwiya neni. Amileka byalibungila mu cilongesa ca Mbimbiliya na kukumbulula bihula bimunasa kukala nabyo.
3. Neni nowo imulilongesa-longesa nendi mulizibasana mucendela cilongesa. Mwasa kulilongesa mesho na mesho, ha foni, ha video call, kupangesa mikanda nambe imeu. Kakangi, cilongesa cikambata ola imo. Oloni cinasa kupwa cacihi nambe cacilaha kwesekesa na simbu imuli nayo.
Kuma njasa kweseka lika tahi ndi?
Eyo. Mwasa kushulisilila fomu ya ha intaneti. Co omwo Mukaleho umo asimutwiya neni, mulekeni ngweni mushaka kweseka lika tahi muzibe mucizibikila cilongesa. Co apangesa broshuwa ya Likuweni Kuyoya Myaka Yoshe! ije ili na bilongesa bitatu byamaputukilo mangana amikwase kumona indi mwasa kulikuwa cilongesa.
Nga njitaba kulilongesa Mbimbiliya, kuma co banjisindiya kupwa Mukaleho wa Yehova ndi?
Embwe. Yetu Bakaleho ba Yehova twashaka kulilongesa na bakwetu Mbimbiliya, oloni kutwesi kubasindiya kulikwatasana netu. Tukendeka lika biilongesa Mbimbiliya mu kasingimiko mwafwa tuzibuka ngwetu munu na munu ali na nzili ya kulyangwila byakulinga.—1 Petulu 3:15.
Kuma njasa kupangesa Mbimbiliya yange ndi?
Eyo, mwasa kupangesa Mbimbiliya yoshe-yoshe imushaka. Tukalikuu kupangesa Mbimbiliya ya Bisoneka bya Kaye Kakaha ije ibananungulula mwamubwa, co lalo mu ngila yayasi. Nameme ngoco, tuzibuka ngwetu banu babangi bashaka kupangesa Bimbimbiliya bibanezilila.
Kuma njasa kulanyako bakwetu ku cilongesa ndi?
Eyo. Mwasa kulilongesela hamo na naanga yeni yoshe nambe kulanyako babusamba beni.
Bati nga njakele na kulilongesa Mbimbiliya na Bakaleho kunima, kuma njasa kushangumuka lalo kulilongesa ndi?
Eyo. Mwasa kulikuwa manene kulilongesa netu Mbimbiliya mu libulu lituli na kupangesa ha simbu ino kutubakana mumunakala na kulilongesela mabulu akwabo kunima. Eli libulu banalibwahesa mu ngila ije yendelela nebi bibatonda banu ano matangwa. Co linaliseze na mabulu atunakala na kupangesa kunima mwafwa lili na bikupulo na mavidio amangi. Co lalo limilingisa musimutwiye.
Kuma munu asa kulilongesa likalyendi kwa kujeneka yalilongesa nendi ndi?
Eyo. Nameme baka-kulilongesa babangi bakawana manene bukwasi nga kukala umo ibalilongesa nendi, bamo bakashaka tahi kulilongesa likalyabo. Mutamba wa ha webusaiti yetu wa Bikwata bya Kupangesa mu Kulilongesa Mbimbiliya umwesa bikwata bya bwana byasa kumikwasa omwo mulilongesa Mbimbiliya. Bikwata binatako byasa kumikwasa:
Bilongesa bya mu Mbimbiliya bya ha Intaneti. Ebi bilongesa bije bili mu ndaka ya Ingilishi, bimikwasa kuwana bikumbululo ku bihula bya kufwa ngwe: Njambi wapwa iya? Mwafwa bika mu kaye muli tuyando na bubi? Tangwa Njambi akamanesa tuyando ndi?
Mavidio Anemana ha Mbimbiliya. Awa mavidio amehi amwesa bilongesa bya seho bya mu Mbimbiliya.
Bikumbululo ku Bihula bya Kukundama ku Mbimbiliya. Ebi biñanda binakumbulula bihula bya kuliseza-seza bya kukundama ku Mbimbiliya.
Bisoneka Bibanalumbununa. Waneni biwalumbununa mavesi na endekesi ya kutsimana ibanapangesa mu Mbimbiliya.