Bubi Bwapwa Buka?
Biyendeka Mbimbiliya
Bubi bwapwa bilinga nambe biyongola bije kubilitombola na mashiko a Njambi. Bunambateselela kupokola mashiko a Njambi ha kulinga byuma byabibi nambe bya kuhenga mu mesho a Njambi. (1 Yowano 3:4; 5:17) Mbimbiliya inendeka lalo bya bubi bwa kujeneka kulinga byuma bimo byabibwa byanapande kulinga munu.—Yakomba 4:17.
Mu bindaka mubabangele kusoneka Mbimbiliya, lijwi lya bubi lilumbuna “kuloja” hanapandele kusungamesa munu. Cakumwenako, kwakele cibunga cimo ca maswalale mu Isalele kusañulu cije casele kwasha mwamubwa mamanya kupangesa cipapa kwa “kujeneka kuloja.” Awa majwi kuwalumbununa lijwi na lijwi alumbununa ngwawo “kubakele na kulinga bubi.” (Maako 20:16) Ngeci, kulinga bubi kunapu kuloja mashiko na binangulo bya Njambi.
Ha kupwa Ishamatanga, Njambi ali na lisesa lya kwakela banu mashiko na binangulo. (Kujombolola 4:11) Tukalitabela kuli ikeye ha bilinga byetu.—Loma 14:12.
Kuma munu asa kukala kwa kujeneka kulinga bubi bwoshe-bwoshe ndi?
Embwe. Mbimbiliya ngwayo “banu boshe banalingi bubi, co banangunuka ku kwamena kwa Njambi.” (Loma 3:23; 1 Vimyene 8:46; Muka-kwambulula 7:20; 1 Yowano 1:8) Mwafwa bika?
Banu ba kulibanga, Adama na Eva bapwile ba kulumbunuka mwafwa Njambi wabatangele mu cifwa cendi. (Kushangumuka 1:27) Oloni kulumbunuka kwabo kwahwile mwafwa kubononokele Njambi. (Kushangumuka 3:5, 6, 17-19) Co mubakele na bana, babatambwisile bubi na kujeneka kulumbunuka. (Loma 5:12) Mwene Ndabiti wendekele ngwendi: “Banjikitilile mu bubi.”—Myaso 51:5.
Kuma bubi bumo bwapwa bwakama kutubakana bukwabo ndi?
Eyo. Cakumwenako, Mbimbiliya ngwayo banu ba mu Sondoma “bapwile baka-bubi, balingile byuma byabibi manene.” (Kushangumuka 13:13; 18:20) Tusimutwiyeni ha byuma bitatu bije bimwesa indi bubi bwakama nambe bwabundondo.
Bukama bwabwo. Mbimbiliya inatunangula ngwayo kutwapandele kulinga bubi bwakama bwa kufwa ngwe bukwizi, kulemesa tumponya, kwiba, kupenda, kulyapula bakwetu, kutsiya, na bundemone. (1 Kolinte 6:9-11; Kujombolola 21:8) Mbimbiliya imwesa ngwayo ebi byuma binaliseze na bubi bwanasa kulinga munu mu kukasumuna bwa kufwa ngwe kwendeka nambe kulinga byuma bimo bije bizibisa bakwabo kubabala ku bimbunge. (Visimo 12:18; Efeso 4:31, 32) Nameme ngoco, Mbimbiliya inatunangula ngwayo kutwapandele kumona ngwe bubi bumo bwabundondo manene mwafwa bunasa kutulingisa tulinge bubi bwakama na kupokola mashiko a Njambi.—Mateo 5:27, 28.
Binalingisa munu abulinge. Banu bamo banasa kulinga bubi mwafwa ya kujeneka kuzibuka byatonda Njambi ngwendi tulinge. (Vilinga 17:30; 1 Timateo 1:13) Nameme Mbimbiliya kuimwesa ngwayo kulinga ngoco kunapande, imwesa ngwayo kunaliseze na kupokwela mashiko a Njambi shakelo. (Kulava 15:30, 31) Banu bakalingila bubi shakelo mwafwa ya “kukaluwisa bimbunge” byabo.—Njelemiya 16:12.
Bisimbu byalinga munu obwo bubi. Mbimbiliya imwesa lalo ngwayo kuli kuliseza mukati ka kulinga bubi lumo lika na kwilukila-ilukila kulinga bubi ha simbu yailaha. (1 Yowano 3:4-8) Baje bakalingi ‘bubi bwa shakelo,’ munima ya kuzibuka byabibwa, bakatambula kashitiko kuli Njambi.—Vahevelu 10:26, 27.
Baje bakalingi bubi bwakama bakalizibi kukala na mulonga na kuzeya. Cakumwenako, Mwene Ndabiti wasonekele ngwendi: “Bubi bwange bunanjihyana, cihiso cange cinanjihyana kutubakana nzili yange.” (Myaso 38:4) Oloni Mbimbiliya inabakulahesa ngwayo: “Baka-bubi becele bilinga byabo bya bubi, co batengulule biyongola byabo. Batengulukile kuli Shukulu Kalunga Njambi yetu, ikeye muka-mema ku mbunge na muka-kusambesa bwasi.”—Isaya 55:7.