Njambi Wakala na Mazina Angahi?

Biyendeka Mbimbiliya

Njambi wakala na lizina lyendi mpundu limolika. Mu Cihebelu bakalisoneka ngwabo יהוה. Co mu Mbunda kakangi tukalitumbula ngwetu “Yehova.”a Kwitila muli kapolofweto Isaya, Njambi wendekele ngwendi: “Yange Yehova. Likelyo lizina lyange.” (Isaya 42:8 NWT) Eli lizina liwaniwa bisimbu bya kweta ku 7,000 mu mabulu a kuzenga a kusañulu. Co kukwesi majwi akwabo abakasanesa Njambi nambe lizina lya munu nambe lya njambi weka lije liwaniwa lwalwingi kulitubakana.b

Kuma Yehova wakala na mazina akwabo ndi?

Nameme Mbimbiliya imwesa ngwayo Yehova likelyo lizina mpundu lya Njambi, oloni inamwesa lalo ngwayo kuli mazina a bulemu nambe majwi akwabo abakamusanesa. Majwi nambe endekesi inatako imwesa mwafwila Yehova nambe bifwa byakala nabyo.

Endekesi	Bisoneka	Lumbunwisi
*Allah*	(Kukwesi)	Lijwi lya “Allah” lyapwa lijwi lya Cialabya lije lilumbununa “Njambi,” co kulyapwile lizina lyendi mpundu. Mu Bimbimbiliya bya mu ndaka ya Cialabya na bindaka bikwabo banapangesa lijwi lya “Allah” kulumbununa lijwi lya “Njambi.”
Muka-nzili Yoshe	Kushangumuka 17:1	Wakala manene na nzili. Endekesi ya Cihebelu ya ’El Shad·daiʹ, ije ilumbununa “Njambi Muka-nzili Yoshe,” iwaniwa lwa kupwa 7 mu Mbimbiliya.
Aufa na Omega	Kujombolola 1:8; 21:6; 22:13, NWT	Ei endekesi ilumbununa ‘wa kulibanga na wa mamaneselelo’ nambe ‘mashangumukilo na mamaneselelo.’ Co imwesa ngwayo kukwesi Njambi Muka-nzili Yoshe nakalako kubanga Yehova, co lalo kukukakala weka. (Isaya 43:10) Aufa cikeco cisona ca kulibanga ku bisona bya Cigriki, co omega cikeco cisona ca mamaneselelo.
Uje Wakala ku Myaka Yoshe	Ndanyele 7:9, 13, 22	Kesi na mashangumukilo; nakalako simbu yoshe, simbu kanda banu nambe cuma coshe-coshe cikaleko.—Myaso 90:2.
Ishamatanga	Isaya 44:24	Ikeye watangele byuma byoshe.
Tate	Mateo 6:9	Ikeye nalingisa byuma byoshe biyoye.
Njambi	Kushangumuka 1:1	Cuma ca kulemesa; Ca nzili. Lijwi lya Cihebelu lya ʼElo·himʹ limwesa ngwalyo Yehova wapwa wakama, wakala manene na nzili, co nafwila kumusingimika.
Njambi ya binjambi	Kwituluka mu Mashiko 10:17	Ei endekesi imwesa ngwayo Njambi ikeye wakama manene, co nalisezela kulako na binjambi ba kujeneka seho babali na kulemesa banu bamo.—Isaya 2:8.
Mulongesi Wakama Manene	Isaya 30:20, 21, NWT	Bilongesa byendi bikatukwasa na kututwamenena.—Isaya 48:17, 18.
Njambi wa kubwahelela	1 Timateo 1:11, NWT	Wapwa wa kubwahelela.—Myaso 104:31.
Njapwa Munjapwa	Kutuuka 3:14	Yehova asa kupwa cuma coshe-coshe mangana ashulisilile cizango cendi. Awa majwi banawanungulula lalo ngwabo “Njipwa Mwoshe-Mwoshe Munjishakela Kupwa” nambe “Njipwa Mwoshe Munjangula Kupwa” (Mbimbiliya ya The Emphasised Bible, yanungulwile J. B. Rotherham; New World Translation) Ei endekesi itukwasa kuzibuka bililumbununa lizina lya Yehova, lije libanendeka mu vesi inatako.—Kutuuka 3:15, NWT.
Lifuwa	Kutuuka 34:14	Atonda ngwendi tulemese lika ikeye. Awa majwi banawanungulula lalo ngwawo “kashaka ngwendi banu balemese binjambi beka” nambe “ashaka ngwendi banu balemese lika ikeye.”—God’s Word Bible; New World Translation.
Mwene wa myaka yoshe	1 Timateo 1:17	Ciyulo cendi kucesi na maputukilo nambe mamaneselelo.
Shukulu	Myaso 135:5	Babenya cuma; Mu Cihebelu ngwabo ʼA·dhohnʹ nambe ʼAdho·nim‘.
Wahakamwa ya Byoshe	Ezekiyele 38:18	Ikeye wakama manene.
Wakujela	Visimo 9:10	Wapwa wa kujela manene kutubakana munu nambe cuma coshe-coshe.
Muka-kumunga	Isaya 64:8, NWT	Ali na moko hali munu na munu na miyati ya banu boshe ngwe muka-kumunga mwakela na moko ha buma.—Loma 9:20, 21.
Muka-kwamena	Yombi 33:30	Napatula banu ku bubi na kutsa kwitila mu ndando ya kupatula ya Yesu Kilistu.—Yowano 3:16.
Limanya	Myaso 71:3	Wapwa cimpaka, co lalo akobola banu bendi.
Mwobole	Isaya 45:21, NWT	Akobola banu ku bushonde.
Kanyungi	Myaso 23:1	Waka mbunge bangamba bendi.
Wahakamwa ya Hakamwa	Ndanyele 7:18, 27	Mwene wakama manene.

Mazina a myela mu Bisoneka bya Cihebelu

Mazina a myela imo abanasoneka mu Mbimbiliya ali na lizina mpundu lya Njambi, oloni kukulumbununa ngwabo nawo apwa mazina a Njambi.

Lizina lya mwela	Bisoneka	Lumbunwisi
Yehova-jaire	Kushangumuka 22:13, 14, NWT	Yehova Atwana.
Yehova-nisi	Kutuuka 17:15, NWT	Yehova Wapwa Cisini Cange ca Cimweso nambe “Cizibukiso.” (Today’s New International Version) Yehova wapwa Njambi uje asa kunyungilila banu bendi na kubakwasa.—Kutuuka 17:13-16.
Yehova-shalomu	Maako 6:23, 24, NWT	Yehova Wapwa Kwoloka.
Yehova-shama	Ezekiyele 48:35, majwi a kwinikila, American Standard Version	Yehova Kwali.

Bika bitunapande kuzibukila lizina lya Njambi na kulipangesa?

Njambi wamona lizina lyendi lya Yehova kupwa lya seho, mukemwo walingisile liwaniwe bisimbu byabingi mu Mbimbiliya.—Malakiya 1:11.
Yesu Muna Njambi watwaleleleleho kumwesa seho ya lizina lya Njambi. Cakumwenako, walombelele kuli Yehova ngwendi: ‘Bajelese lizina lyobe.’—Mateo 6:9; Yowano 17:6.
Nga banu bazibuka lizina lya Njambi na kulipangesa, co basa kulikuta busamba nendi. (Myaso 9:10; Malakiya 3:16) Kulikuta busamba na Yehova kulingisa munu awane bukwasi ku cikulaheso cendi cije cimwesa ngwaco: ‘Njikamena baje boshe banjizema na kunyunga baje bazibuka lizina lyange.’—Myaso 91:14.
Mbimbiliya ngwayo: ‘kubali baje babakatumbula ngwabo “binjambi,” nambe mwilu nambe hano hasi, mwafwa kubali “binjambi” babangi ba ngacije na “bashukulu.”’ (1 Kolinte 8:5, 6) Nameme ngoco, Mbimbiliya yamwesa ngwayo kwakala Njambi umolika wa busunga wa lizina lya Yehova.—Myaso 83:18, NWT.

a Baka-kulilongesa bamo ba Bahebelu bashaka kusanesa Njambi lizina lya “Yawe.”

b Lizina lya Yehova bakalibatwila lalo ngwabo “Jah.” Co ei sanesi iwaniwa bisimbu bya kweta ku 50 mu Mbimbiliya, kwambateselela nomu mubakalipangesela mu endekesi ya “Hallelujah,” nambe ‘Haleluya,’ ije ilumbununa ngwayo ‘Shangaleni Jah.’—Kujombolola 19:1; American Standard Version; King James Version.