Kuma Muli na Kuzibisa Yehova Kubwaha Ndi?

1. Bangamba ba Yehova bamo ba kulongwa basa kuuwasana ha byuma muka?

KUTUTAKAMESA kuzibuka ngwetu banu ba Yehova basa kumuzibisa kubwaha! Mbimbiliya ngwayo: ‘Yehova washaka banu bendi.’ (Samu 149:4) Oloni simbu imo bamo bakazeye na kusinganyeka ngwabo hamo kubasa kuzibisa Yehova kubwaha ku mbunge. Bangamba ba Njambi bamo babanendeka mu Mbimbiliya, nabo bisimbu bimo balizibile ngoco.—1 Samwe 1:6-10; Yombi 29:2, 4; Samu 51:11.

2. Beya basa kuzibisa Yehova kubwaha?

² Mbimbiliya imwesa ngwayo banu ba kujeneka kulumbunuka basa kuzibisa Yehova kubwaha. Mu ngila muka? Tunapande kukulahela Yesu Kristu na kutumbwitika. (Iwano 3:16) Nga munu alinga ngoco, amwesa ku mbunga ngwendi natenguluka ku bubi bwendi na kukulahesa ngwendi alinga cizango ca Njambi. (Bili 2:38; 3:19) Yehova akabwahelela banu mubakalingi ngoco na kulikuta busamba nendi. Nga tutwalelelaho kuyoya mu kulitombola na kulikundika kwetu, tuzibisa Yehova kubwaha na kutwalelelaho kupwa babusamba bendi.—Samu 25:14.

3. Byuma muka bitusimutwiya?

³ Bika byasa kulingisa bamo balizibe ngwabo kubasa kuzibisa Njambi kubwaha? Yehova akamwesa bati ngwendi watuzema? Co muka-Kristu asa kukulahela bati ngwendi ali na kuzibisa Njambi kubwaha?

BIKA BYASA KULINGISA BAMO BALIZIBE NGWABO KUBESI NA KUZIBISA YEHOVA KUBWAHA?

4-5. Bika bitwasa kukulahela nameme tuliziba ngwe tu bangoco?

⁴ Kushwa ku bwanike, bwingi bwetu tukalizibi ngwe kutwapwile ba seho. (Samu 88:15) Ndolome wa lizina lya Adrián ngwendi: “Ha myaka ineti, njinalizibi ngwe njiwangoco. Munjapwile mwanike, njalombelele ngwange naanga yange ikakala mu Paradaisi, nameme njalizibile ngwange yange kunjasa kukakalamo mwafwa kunjapandele.” Tony uje nakolela mu naanga ya banu baje kubapwile baka-Kristu wendekele ngwendi: “Bisemi bange kubakele na kunjileka ngwabo banjizema nambe kunjileka ngwabo njili na kubazibisa kubwaha. Oku kwanjilingisile njilizibe ngwange byuma byoshe binjakele na kulinga kubyakele na kubazibisa kubwaha.”

⁵ Nga bisimbu bimo mukalibizi ngwe keti mu ba seho, anukeni ngweni Yehova ikeye namikokela kuli ikeye. (Iwano 6:44) Yehova akamono bifwa byabibwa bituli nabyo bije bitunasa kujeneka kumona, co azibuka mwamubwa mubyafwila bimbunge byetu. (1 Samwe 16:7; 2 Mizi 6:30) Ngeci, twasa kumukulahela nga atuleka ngwendi watumona kupwa ba seho.—1 Iwa 3:19, 20.

6. Kapositolo Paulu walizibile bati ha bubi bwalingile kunima?

⁶ Simbu kanda tulilongese busunga, yetu bamo hamo twakele na kulinga byuma bije binasa kutulingisa tutwaleleleho kuliziba kukala na mulonga. (1 Pita 4:3) Bangamba ba Yehova bamo baje banamupangela mu kulongwa ha myaka yaingi nabo banasa kulifwita na buzeye bumo. Kuma neni mukalizibi ngweni Yehova kasa kumikonekela ndi? Nga mukemwo, co kuzibuka ngweni bangamba bamo ba Yehova kunima nabo balizibile ngoco kumitakamesa. Cakumwenako, kapositolo Paulu walizibile kubindama mwakele na kusinganyekesesa ha tupenga twendi. (Loma 7:24) Ha simbu ei, Paulu te natenguluka laja ku bubi bwendi na kumumbwitika. Nameme ngoco, walyendekele ngwendi ‘ikeye wamundondo ku tupositolo boshe’ na kwendeka ngwendi ikeye “muka-bubi kutubakana boshe.”—1 Kori 15:9; 1 Timo 1:15.

7. Tunapande kwanuka bika ha bubi butwalingile kunima?

⁷ Tate yetu natukulahesa ngwendi atukonekela nga twatenguluka. (Samu 86:5) Ngeci, nga twatenguluka mu busunga, twasa kukulahela ngwetu Yehova natukonekela.—Kolo 2:13.

8-9. Bika byasa kutukwasa nga tuli na kuliziba ngwetu byuma bituli na kulinga kubyasa kuzibisa Yehova kubwaha?

⁸ Tubaboshe tushaka kulinga mwoshe mutwasela kupangela Yehova. Nameme ngoco, bamo banasa kuliziba ngwabo byahi bibasa kulinga bije bizibisa Yehova kubwaha ku mbunge. Ndokazi wa lizina lya Amanda ngwendi: “Kakangi njikasinganyeka ngwange kupangela Yehova na nzili yange yoshe kulumbununa kulinga byabingi simbu yoshe mu cipangi cendi. Ngeci, kakangi njikalingi byabingi bije bitubakana seteko ya byuma binjasa kulinga. Co munjikonowa kulinga byuma bimo, njikalizibi kuzeya na kusinganyeka ngwange hamo kunjesi na kuzibisa Yehova kubwaha.”

⁹ Bika bitukwasa tujeneke kuliziba ngwetu byahi bitwasa kulinga bije byasa kuzibisa Yehova kubwaha? Anukeni ngweni Yehova kapwile wa kukaluwa mbunge. Kesi kutonda ngwendi tulinge byuma bije kutwasa kulinga. Akakandelela ku byuma byoshe bitukalingi na mbunge yetu yoshe. Kutundaho, singanyekeseseni ha banu bamo babanendeka mu Mbimbiliya baje bapangelele Yehova na bimbunge byabo byoshe. Cakumwenako, singanyekeni hali Paulu. Wapangele na nzili ha myaka yaingi, kwenda mangenzi amalaha na kushimbika bikungulukilo byabingi. Oloni byuma mubyatengulukile, kasele kulinga byabingi. Kuma ha simbu oyo kakele na kuzibisa Yehova kubwaha ndi? Embwe. Watwaleleleleho kulinga byuma byasele kulinga, co Yehova wamubezikisile. (Bili 28:30, 31) Mu ngila imolika, byuma bitunasa kulinga mu kupangela Yehova binasa kutenguluka. Oloni byuma bitulingisa tumupangele bikebyo bya seho manene kuli ikeye. Tusimutwiyeniko ha bingila byali na kumweselamo Yehova ngwendi watuzema.

YEHOVA AKAMWESA BATI NGWENDI WATUZEMA?

10. Twasa kuzibuka bati ngwetu Yehova ali na kutuleka ngwendi watuzema? (Iwano 16:27)

¹⁰ Kwitila mu Mbimbiliya. Yehova akashaka kuwana bingila bya kumweselamo banu bendi ngwendi wabazema, co bali na kumuzibisa kubwaha. Yehova walekele Yesu ngwendi wamuzema, co akamuzibisa kubwaha. Bisoneka bimwesa ngwabyo wendekele ngoco ha bisimbu bibali. (Mate 3:17; 17:5) Kuma neni mushaka kuziba Yehova amileka ngwendi muli na kumuzibisa kubwaha ndi? Kutwasa kuziba Lijwi mpundu lya Yehova kutundilila mwilu. Akendeka netu kwitila mu Lijwi lyendi Mbimbiliya. Nga tutanda majwi endekele Yesu kuli bandongesi bendi, kunapu lika ngwe Yehova ikeye ali na kwendeka owo majwi kuli yetu. (Tandeni Iwano 16:27.) Yesu watembwininine Ishe mu kulumbunuka. Nga tutanda majwi a Yesu aje amwesa ngwawo bandongesi bendi baje bapwile ba kulongwa nameme kubapwile ba kulumbunuka bakele na kumuzibisa kubwaha, tulinga ngwe tuli na kuziba Yehova endeka owo majwi kuli yetu.—Iwano 15:9, 15.

11. Mwafwa bika kuliwana na byeseko kukulumbununa ngwabo kutwesi na kuzibisa Yehova kubwaha? (Jemusi 1:12)

¹¹ Kwitila mu bilinga byendi. Yehova ashaka kutukwasa. Cakumwenako, nalibwahesela kutukwasa kuwana byuma bya ku mubila bitutonda. Simbu imo Yehova akecelela bangamba bendi baliwane na bukalu ngwe mukwafwililile kuli Yombi. (Yombi 1:8-11) Oloni kuliwana na byeseko kukulumbununa ngwabo kutwesi na kuzibisa Njambi kubwaha. Byeseko byasa kutulingisa tumwese mutwazemena Njambi na kumukulahela. (Tandeni Jemusi 1:12.) Nga twaliwana na ceseko, twasa kulimwena mwatuzemena, omwo atukwasa kutwalelelaho kukolesa.

12. Bika bitulilongesa ku byuma byaliwanene nabyo Dmitrii?

¹² Tusimutwiyeniko ha cakumwenako ca ndolome wakala mu Asia wa lizina lya Dmitrii. Cipangi cendi cahwile, co kasele kuwana ceka ha bingonde byabingi. Ou ndolome wamwesele ngwendi wakulahelele manene Yehova omwo wapangele manene cipangi ca kwambulula kutubakana mwakele na kucilingila kunima. Kwetile lalo bingonde, oloni anga kawanene cipangi ceka ca ku mubila. Mu kwita kwa simbu wabinjile manene, co kasele nambe kutunda ha mwela. Washangumukile kuliziba ngwe kapwile munalume wamubwa kuli munakazi wendi na kuliziba ngwe kapwile cisemi wamubwa. Co walihwile indi anga wacikele na kuzibisa Yehova kubwaha. Litangwa limo mangwezi, munendi wa mumbanda wamupulintilile lipapelo lyakele na majwi ali ku Isaya 30:15 aje endeka ngwawo: ‘Mu kwoloka na mu kukulahela mukemwo mumuwana nzili.’ Wanenelele ishe olyo lipapelo ku mwela wendi na kumuleka ngwendi, “Tate, nga muliziba kuzeya, anukeni ou mukanda.” Ndolome Dmitrii wanangukile ngwendi Yehova wakwasele naanga yendi kutwalelelaho kukala na byakulya bya kupwamo, bizalo na kwakukala. Co wendekele ngwendi: “Cuma cinjapandele kulinga capwile kuwa mbunge na kutwalelelaho kukulahela Njambi.” Nga neni muli na kuliwana na ceseko ca kulifwa, anukeni ngweni Yehova wamyaka mbunge, co amikwasa mutwaleleleho kukolesa.

13. Yehova asa kupangesa beya mu kumwesa ngwendi watwaka mbunge, co asa kulinga bati ngoco?

¹³ Kwitila muli bakweni baka-Kristu. Yehova akapangesa bandolome na bandokazi betu mu kumwesa ngwendi watuzema. Cakumwenako, asa kulingisa bamo bendeke majwi aje asa kututakamesa nga tunazeye. Ebi bikebyo byalimwenenene ndokazi umo mu Asia ha simbu yakele manene mu bishoti. Cipangi cendi ca ku mubila cahwile. Kutundaho, washangumukile kubinja manene. Kutundaho lalo, muka-limbo lyendi walingile bubi bumo bwakama, co bamutundisile ha bukulunu. Ou ndokazi ngwendi: “Kunjazibisisile byanenesele ngoco. Njalizibile ngwange hamo kuli bimo binjabiisile mukemwo Yehova wanjumbilile kuti.” Ndokazi yetu walombele Yehova amukwase kumona indi wamuzema. Co Yehova walingile bati ngoco? Ou ndokazi lalo ngwendi: “Bakulunu mu cikungulukilo basimutwiiye nange na kunjanukisa mwanjizemena Yehova.” Mu kwita kwa simbu walombele lalo Yehova amukwase kumona indi anga wacimwakele mbunge. Co ngwendi: “Ha litangwa olyo bene, njatambwile mukanda watundile kuli bandolome na bandokazi. Munjatandele majwi abo a kunjitakamesa, njalizibile ngwange Yehova wanjizibile.” Yehova kakangi akamwesa ngwendi tuli na kumuzibisa kubwaha kwitila mu majwi amabwa abanasa kwendeka bakwetu.—Samu 10:17.

14. Ngila muka ikwabo yakamweselamo Yehova ngwendi tuli na kumuzibisa kubwaha?

¹⁴ Yehova akamwesa lalo ngwendi watwaka mbunge omwo akapangesa bakwetu baka-kukulahela mu kutunangula nga kulinga ngoco kunapande. Cakumwenako, mu simbu ya tupositolo, Yehova wapangesele kapositolo Paulu mu kusonekela bakwabo baka-kukulahela mikanda 14. Omu mu mikanda mwakele binangulo bya nzili bije bibendekele mu cizemo. Mwafwa bika Yehova wahwimininine Paulu asoneke ebi binangulo? Yehova wapwa cisemi wamubwa, co akanangula bana bendi mwafwa ‘wabazema.’ (Prov 3:11, 12) Ngeci, nga munu umo atunangula kupangesa Mbimbiliya, kutwapandele kuliziba ngwetu Yehova natulubalela. Tunapande kutambula oco cinangulo na kumona ngwetu Yehova watuzema. (Hebe 12:6) Byuma muka bikwabo bimwesa ngwabyo Yehova watuzema?

BYUMA BIKWABO BIMWESA NGWABYO YEHOVA WATUZEMA

15. Yehova akana beya sipilitu yendi ya kujela, co kuzibuka ngoco kutukwasa bati?

¹⁵ Yehova akana sipilitu yendi ya kujela kuli baje bakamuzibisa kubwaha. (Mate 12:18) Lihuleni ngweni, ‘Kuma njili na kumwesa bifwa bimo bya sipilitu ya kujela ndi?’ Kuma njikamwesa bakwetu mbunge ya kubandamena kutubakana munjakele na kulingila simbu kanda njililongese busunga ndi? Kulinga mwoshe mumwasela kukala na bushuka bwa sipilitu ya Njambi kumilingisa mulimwene ngweni muli na kuzibisa Yehova kubwaha!—Taleni cipalo ca Bushuka bwa Sipilitu ya Njambi . . . ”

16. Yehova ali na kupangesa beya mu kwambulula muzimbu waubwa, co oku kumilingisa mulizibe bati? (1 Tesalonika 2:4)

¹⁶ Yehova nana baje bakamuzibisa kubwaha cipangi ca kwambulula muzimbu waubwa. (Tandeni 1 Tesalonika 2:4.) Moneni bukwasi bwawanene ndokazi wa lizina lya Jocelyn mu kwambulwila bakwabo muzimbu waubwa. Litangwa limo ou ndokazi mwendukile walizibile manene kuzeya. Wendekele ngwendi: “Kunjakele na nzili, co njalizibile ngwe njiwangoco. Oloni njakele na kulinga bupainiya, co olyo litangwa njapandele kuya mu lihya. Ngeci, njalombelele na kuya mu lihya.” Owo mutondo, ndokazi Jocelyn waliwanene na munakazi wa lizina lya Mary uje watabele kushangumuka kulilongesa Mbimbiliya. Munima ya bingonde, Mary wendekele ngwendi wakele na kulomba bukwasi kuli Njambi omwo ndokazi Jocelyn wakutotele ha cikolo. Ndokazi Jocelyn ngwendi mwakanuka byalingiwile, akamono ngwendi Yehova wamwesele ngwendi wamuzema. Oloni keti banu boshe batambula muzimbu utukambulula. Nameme ngoco, tuzibuka ngwetu Yehova abwahelela nga tulinga mwoshe mutwasela kwambulwilako bakwetu ou muzimbu.

17. Bika bimulilongesa ku byuma byendekele ndokazi Vicky ha ndando ya kupatula? (Samu 5:12)

¹⁷ Ndando ya kupatula inalingisa banu base kuzibisa Yehova kubwaha. (1 Timo 2:5, 6) Oloni bati nga tuliziba ngwetu kutwesi na kuzibisa Yehova kubwaha nameme twakulahela mu ndando ya kupatula, co lalo banatumbwitika? Anukeni ngweni kutwapandele kulinga byuma kwesekesa lika nomu mutulizibila. Simbu yoshe tunapande kukulahela Yehova. Wamona baje banakulahela mu ndando ya kupatula kupwa baka-busunga, co nakulahesa kubabezikisa. (Tandeni Samu 5:12; Loma 3:26) Kusinganyekesesa ha ndando ya kupatula kwakwasele ndokazi wa lizina lya Vicky. Litangwa limo munima ya kusinganyekesesa ha ndando ya kupatula wendekele ngwendi: “Yehova namwesa ngwendi wanjizema ha simbu yailaha. . . . Oloni kunjanangukile ngoco. Co kwapwile ngwe njakele na kumuleka ngwange: ‘Kuwasa kuzema munu wa kufwa ngwe yange. Mulambu wa Munobe kuwasa kufwika bubi bwange.’” Kusinganyekesesa ha bwana bwa ndando ya kupatula kwamulingisile alizibe ngwendi Yehova wamuzema. Netu nga tusinganyekesesa ha ndando ya kupatula, tulimwena ngwetu Yehova watuzema.

18. Kutwalelelaho kuzema Tate yetu wa mwilu kutulingisa tukulahele bika?

¹⁸ Nameme twasa kupangesa byuma bitunasimutwiya, simbu imo tunasa kuliziba kuzeya na kusinganyeka ngwetu hamo kutwesi na kuzibisa Yehova kubwaha. Nga muliziba ngoco, anukeni ngweni “baje batwalelelaho kumuzema” bamuzibisa kubwaha. (Jems 1:12) Twaleleleniho kushwenya kuyehi na Yehova na kunanguka byuma bimwesa ngwabyo watuzema. Simbu yoshe anukeni ngweni Yehova “kesi kulako na umo na umo wetu.”—Bili 17:27.