Kuma Bimbongo Byapwa Nsina ya Bubi Bwoshe Ndi?

Biyendeka Mbimbiliya

Embwe. Mbimbiliya kuyendekele ngwayo bimbongo byapwa byabibi, nambe kwendeka ngwayo bikebyo binanene byuma byoshe byabibi. Majwi a kwendeka ngwabo ‘bimbongo byapwa nsina ya bubi bwoshe’ kuwahwilililile, co asa kutanganesa munu. Mbimbiliya ngwayo “cizemo ca bimbongo cinapu nsina ya miyati yoshe ya bubi.”a—1 Timateo 6:10.

Bika biyendeka Mbimbiliya ha bimbongo?

Mbimbiliya yamwesa ngwayo bimbongo byasa kukwasa munu nga abipangesa mwamubwa, co binasa ‘kumunyungilila.’ (Muka-kwambulula 7:12) Yashangala lalo baje bali na bimbunge bya kwana, baje banasa kwanako bakwabo bwana mu cifwa ca bimbongo.—Visimo 11:25.

Nameme ngoco, Mbimbiliya yatunangula ngwayo kutwapandele kumona bimbongo kupwa ngwe bikebyo bya seho manene mu kuyoya. Ngwayo: “Keti mukakateye mu cizemo ca bimbongo, pweni baka-kujauka na byuma bije muli nabyo.” (Vahevelu 13:5) Cilongesa ciliho cinapu kumona bimbongo mu ngila inapande na kujeneka kushakezeka bufuko. Ngeci, tunapande kujauka na byuma bitutonda manene mu kuyoya bya kufwa ngwe byakulya, bizalo, na mwakukala.—1 Timateo 6:8.

**Mwafwa bika Mbimbiliya yatunangula ngwayo kutwapandele kuzema bimbongo?**

Banu ba nuna kubakawana buyoye bwa myaka yoshe. (Efeso 5:5) Nuna yapwa cifwa cimo ca kulemesa tumponya nambe bulombelo bwa makuli. (Kolose 3:5) Kakangi mu kushaka kuwana nambe kukala na byuma byatonda, muka-nuna akombwanesa binangulo byabibwa. Mukanda wa Visimo 28:20 ngwawo, ‘Njambi anyanyamesa boshe baje bashaka kufuka bwasi.’ Banu ba cifweci basa kulikobelesa mu bukenya, bwizi, kujujwisa banu mangana babane bimbongo, linyanyamena, kukwata banu nambe kubatsiya.

Kuzema bimbongo kwasa kulingisa munu akale na futisi yaibi, nambe kunena byuma byeka byabibi. Mbimbiliya ngwayo ‘baje bashaka kufuka bawila mu ceseko, co bakwatiwa mu mweto wa mashungu amangi a bulema, a kubulumuna.’—1 Timateo 6:9.

Kukabangeya cinangulo cili mu Mbimbiliya cije cendeka ha bimbongo kutukwasa bati?

Nga kututabesa bimbongo kutulingisa tukale na futisi yaibi na kuzeyesa busamba bwetu na Yehova, co tupwa banu bababwa. Kutundaho, Njambi akala netu na kutukwasa. Njambi nakulahesa boshe baje balinga mwoshe mubasela kumuzibisa kubwaha ngwendi ‘kakabaseze nambe kubabyana.’ (Vahevelu 13:5, 6) Co lalo ngwendi “abezikisa baka-kulongwa.”—Visimo 28:20.

Bisoneka Bije Byendeka ha Bimbongo

Muka-kwambulula 7:12: ‘Bimbongo bikwasa.’

Bicilumbununa eci cisoneka: Bimbongo byasa kukwasa munu na kumunyungilila nga abipangesa mwamubwa.

Luka 12:15: “Kuyoya kwa munu kukwakundamene ku byuma byali nabyo, nambe afuke bati.”

Bicilumbununa eci cisoneka: Bimbongo keti bikebyo bya seho manene mu kuyoya. Co lalo kubyasa kutwobola.

1 Timateo 6:10: ‘Cizemo ca bimbongo cinapu muzi wa byuma byabibi bya miyati yoshe, co mwafwa ya kukala neci cizemo, bamo banatundu mu kukulahela, co banalitibanga bakebo babenya na byuma byabingi bije bizibisa kubabala.’

Bicilumbununa eci cisoneka: Bimbongo habyolika kubyabihile. Oloni baje bazema bimbongo na kubimona ngwe bikebyo bya seho manene mu kuyoya kwabo bakalinenela bukalu bakebo babenya. Obu bunasa kupwa kulitepa kwa binaanga nambe kujeneka kukala na mubila wa kulikangula mwafwa ya kupanga mu kutubakanesa.

Vahevelu 13:5: “Keti mukakateye mu cizemo ca bimbongo, pweni baka-kujauka na byuma bije muli nabyo.”

Bicilumbununa eci cisoneka: Kutwapandele kuzezama kushakezeka bufuko lino linaki. Tunapande kujauka na byuma mpundu bitutonda mu kuyoya.

Mateo 19:24: “Cacasi kuli kamelo kwita mu lisho lya nguya, kutubakana muka-kufuka kukobela mu Bumwene bwa mwilu.”

Bicilumbununa eci cisoneka: Yesu te atunda ha kulanya mukwenje umo wa kufuka ngwendi amukabangeye. Oloni ou mukwenje wabyanene mwafwa mbunge yendi yakele ku bufuko bwakele nabwo. Mukemwo Yesu wanene eci cinangulo. Munu uje atwameka bufuko kulutwe kutubakana kupangela Njambi nasa kwonowa kuwana buyoye bwa myaka yoshe.

a Ei vesi banainungulula lalo ngwabo: ‘Cizemo ca bimbongo cinapu muzi wa byuma byabibi bya miyati yoshe.’