Pweni Vavuthamba Va Njambi Myaka Yoshe!

Kulikuta vuthamba kwapwa kwakukalu, cho kunyunga vuthamba nakwo kwapwa kwakukalu. Njambi akamikwithula nga mulikuta nendi vuthamba nakutwalelela kupwa kavuthamba kendi. Yesu wendekele kuli vaje vamukulahelele ngwendi: “Vuthunga vukamipatula.” (Yowano 8:32) Awa majwi alumbununa vika?

Mwatha kupwa vakupatuka mu thimbu yino. Mwatha kupwa vakupatuka ku vilongetha vya makuli vije vali nakukundwiya kuli Satana. Mwatha kupatuka ku tuyando vali nakumona vanu vavangi vaje kuvatanekeya Yehova. (Loma 8:22) Vavuthamba va Njambi vapatuka lalo ku “lyova lya kutsa.”—VaHevelu 2:14, 15.

Mukapwa vakupatuka mu kaye kakaha ka Njambi. Tumbamethi yeni kulutwe yikapwa yakupatuka! Mu Palandaisi ya hano hathi, tukapatuka ku vindthzita, kukuvavala, ku vutothzi, na ku vuhutu na njala. Tukapatuka lalo ku kukuluvala na kuthsa, na ku lyova, ku tuyando, na ku vilinga vyakuhenga. Mbimbiliya yendeka hali Njambi ngwayo: “Yove uvaana vyakulya vyakupwisamo, nakuvakutisa voshe na vyakulya.”—Myaso 145:16.

Vavuthamba va Njambi vakayoya myaka yoshe. Kuyoya kwa myaka yoshe kunapu vwana vwakama manene vwa kutunda kuli Njambi vuje vwakana voshe vaje vashaka kupwa vavuthamba vendi. (Loma 6:23) Achithinganyekeni ha vyuma vimukalinga nga mukayoya myaka yoshe!

Mukakala na thimbu ya kulinga vyuma vyavingi. Mpamo mukashaka kulilongetha mwakwimbila vithandthzi. Indi mpamo mukashaka kulilongetha kuthona nambe chipangi cha kushonga. Mukashaka kutanekeya lalo miyati ya tuthitu nambe miti. Indi mpamo mukashaka kukendangana nakumona mafuti na vanu va kulithethza-thethza. Mukatha kulinga vyoshe evi mwafwa mukayoya myaka yoshe!

Mukakala na thimbu ya kulikuta vuthamba na vanu vavangi. Mukatha kutanekeya vanu vavangi vakwavo vaje vanapu vavuthamba va Njambi mwafwa mukayoya myaka yoshe. Mukatanekeya vyuma vivakapanga, na vilinga vyavo vyavivwa, cho vakapwa lalo vavuthamba veni. Mukavathzema, cho navo vakamithzema lalo. (1 Kolinte 13:8) Kuyoya myaka yoshe kukamilingitha mukalikute vuthamba na munu woshe hano hathi! Chakama manene, vuthamba vweni na Yehova vukakola mukuya kwa myaka. Pweni kavuthamba ka Njambi myaka yoshe!