Twaleleniho Kupangela Yehova mu Kuvwahelela
THINGANYEKENI litangwa limwavwahelelele manene mu kuyoya kweni. Lyapwile litangwa limwakovelele mu vulo, indi litangwa lyathemukile muneni wa ntwatwa ndi? Indi mpamo lyapwile litangwa livamimbwitikile? Litangwa livamimbwitikile hamo likelyo limwavwahelelele manene mu kuyoya kweni. Olyo litangwa, vandolome na vandokathzi yeni vavwahelelele manene ha kumimona musholola ngweni mwathzema Njambi na mbunge yeni yoshe na mwonyo weni woshe na mana eni oshe na ndthzili yeni yoshe.—Mako 12:30.
Kuli vyuma vyamithzivitha kuvwaha mu kupangela Yehova kutunda havamimbwitikilile. Oloni vaka-kwambulula vamo vaje vapwile va kuvwahelela, ano matangwa kethi va kuvwahelela. Mwafwa vika? Mwafwa vika tunapande kutwalelelaho kupangela Yehova mu kuvwahelela?
VIKA VYALINGITHA VAMO VAJENEKE KUVWAHELELA?
Muthzimbu wa Vumwene ukatuthzivitha manene kuvwaha. Mwafwa vika? Mwafwa Yehova natukulahetha ngwendi Vumwene vwendi ololo vunyongetha kano kaye kakavi na kunena kaye kakaha ka Njambi. Ku Zefaniya 1:14 ngwavo: “Litangwa lije omwo Shukulu Kalunga akathompa vanu lili muyehi-yehi, lili na kwija vwathi-vwathi.” Oloni nga tuthinganyeka ngwetu lichili kulako, cho twatha kuthzeya. Echi chitulingitha tuthzeye mu chipangi chetu kuli Njambi.—Vithimo 13:12.
Kuwanako thimbu ya kuthikama na vandolome na vandokathzi vetu kwatha kutushongangeya tupangele Yehova mu kuvwahelela. Mpamo Vilinga vyavivwa vya vanu va Yehova vitwamwene vikevyo vyatushongangeyeye twije mu vulombelo vwa vuthunga na kushangumuka kupangela Njambi mu kuvwahelela. (1 Petulu 2:12) Oloni twatha kulinga vati nga ndolome nambe ndokathzi yetu vanamwendekela mwafwa ya kujeneka kwononoka mashiko a Njambi? Echi chinatha kuthzeyetha vamo mu chikungulukilo, cho vanatha kulikela kupwa va kuvwahelela.
Kuthzema manene vufuko nakwo kwatha kutwonowetha kuvwahelela. Mu ngila muka? Kaye ka Satana kali na kushongangeya vanu valande vyuma vije kethi vya theho manene. Mukemwo tunapande kwanuka majwi a Yesu. Wendekele ngwendi: “Munu na umo wai atha kupangela vashukulu vavali, kuvanga athzindeho umo na kuthzemaho mukwavo, nambe apwa wa kulongwa ku umo na kushaula mukwavo. Cho kuwatha kupangela Njambi na kupangela lalo vimbongo.” (Mateo 6:24) Kutwatha kupangela Yehova mu kuvwahelela oku tushaka kukala na vyuma vyoshe vitumona mu kaye.
KUPWA VA KUVWAHELELA MU KUPANGELA YEHOVA
Kupangela Yehova kuchapwile chitele kuli vaje vamuthzema. (1 Yowano 5:3) Anukeni ngweni Yesu wendekele ngwendi: “Ijeni kuli yange yeni voshe munajuka na kwambata vya kulema, cho njikamihwimitha. Lilemekeni mandauluwa yange, cho lilongetheni kuli yange, omwo yange njimuka lyovwa-ovwa na kulikehetha mu mbunge, cho mukawana kuhwima ku myonyo yeni. Omwo mandauluwa yange yayathi, na chitele change chachehu.” (Mateo 11:28-30) Kupwa vaka-Kilisitu va vuthunga kwapwa kwakuvwa, cho kukatunenela kuvwahelela. Kuli vyuma vyavingi vije vitulingitha tupangele Yehova mu kuvwahelela. Tuthimutwiyeniko vitatu.—Hambakuke 3:18.
Tuli na kupangela Njambi wa kuvwahelela uje Watwanene Mwonyo. (Vilinga 17:28; 1 Timateo 1:11) Tuthzivuka ngwetu tuli na kwana kuyoya kwetu kuli Ishamatanga wetu. Ngechi tunapande kutwalelelaho kumupangela mu kuvwahelela, nameme muneti myaka yaingi kutunda havatumbwitikilile indi embwe.
Kuthinganyeka vivukalinga Vumwene kulutwe na kupanga na ndthzili, kukekwo kukakwatha Héctor atwaleleleho kupwa wa kuvwahelela
Thinganyekeni Héctor uje napangela Yehova mu vuntwama vwa kuthzenguluka ha myaka 40. Nameme vene mu ‘vukulunu’ anga achili na kupangela Yehova mu kuvwahelela. (Myatho 92:12-14) Munakathzi wendi wavinja, oloni ocho kuchathzeyethele Héctor, anga ali na kupangela Njambi mu kuvwahelela. Héctor ngwendi: “Thimbu imo njikathzeye ha kumona mushongo wa muka-njuvo yange uli na kukola, cho njikawana vukalu vwa kumunyunga. Oloni echi kuchathzeyethele kuvwahelela kwange mu kupangela Njambi. Njithzivuka ngwange Yehova ikeye wanjanene mwonyo, cho ikeye watangele vanu voshe. Echi chikanjilingitha njimuthzeme manene na kumupangela na mbunge yoshe. Njiketheka kupanga na ndthzili mu kwambulula, cho njikathinganyeka manene vya lilavelelo lyetu lya Vumwene mangana kethi njithzeye.”
Yehova natwana ñombelo ya ndando ya kupatula ije itukwatha tupwe va kuvwahelela mu kuyoya. Chili vene “Njambi wathzemene vaka-kaye manene ngechi wanene Munendi umo lika, ngechi woshe akulahela kuli ikeye kethi anyone, oloni akale na mwonyo wa myaka yoshe.” (Yowano 3:16) Nga tukala na likulahelo mu ñombelo yatwanene Njambi, vivi vyetu vatha kuvithambetha, cho lalo tukayoya myaka yoshe. Echi chinapande kutushongangeya tumwethe kukandelela. Kukandelela ku ñombelo, kutulingitha tupangele Yehova mu kuvwahelela.
Jesús wayoyele vuyoye vwavwathi, cho wapangelele Yehova mu kuvwahelela ha myaka yaingi
Ndolome umo wa ku Mexico wa lithzina lya Jesús wendekele ngwendi: “Njapwile njindungo wa chipangi change mwafwa thimbu imo njakele na kuya ku chipangi nameme ngwavo kunjapandele kuyako. Njakele na kulinga ngocho mangana njiwane vimbongo vyavingi. Cho njalilongethele vya Yehova na kuthzivuka ngwange wanene Munendi mangana akuthsile vanu. Njakele na lishungu lyakama lya kumupangela. Ngechi njalikundikile kuli Yehova, cho munjapangele mu kampani myaka 28, njalikelele na kushangumuka kupangela Yehova thimbu yoshe.” Kutundoho vene, Jesús washangumukile kupangela Yehova mu kuvwahelela.
Tunavwahelela mwafwa futithi yetu matangwa ano inapu ya kujela. Mwanuka muyafwile futithi yeni thimbu kanda muthzivuke Yehova ndi? Kapotolo Paulu wanukithile vaka-Kilisitu va ku Loma ngwendi: Ha kulivanga mwapile “vindungo va vuvi” oloni munapu oni “vindungo va vuthunga.” Vakele na lilavelelo lya kukayoya myaka yoshe mwafwa futithi yavo yapwile yaivwa. (Loma 6:17-22) Netu tuli na kukavangeya mashiko a Yehova, mukemwo kutwethi kuliwana mu vukalu vuje vukaija kuli vaka-futithi yayuvi. Kukavangeya mashiko, kukanene kuvwahelela.
“Myaka injinapangela Yehova ikeyo inapu ya kuvwahelela manene mu kuyoya kwange.”—Jaime
Thinganyekeni lalo hali Jaime. Kakulahelele ngwendi Njambi kwali, watavele ngwendi vyuma vyalithzilile lika cho lalo wapwile muka-kulwa. Jaime washangumukile kuya ku viwano vya vaka-Kilisitu, cho chithzemo chivakamumwetheleko, chamushongangeyeye. Jaime walombele kuli Yehova amukwathe kukala na likulahelo kuli ikeye mangana echele yoyethi yendi yalaja. Jaime ngwendi: “Njashangumukile kamando-kamandondo kutava ngwange kwakala Njambi wa ngothzi, Tate yetu wa chithzemo. Kunyunga mashiko a Yehova a kuthungama kunanjikwatha. Ngwe kunjatengulukile, mpamo ino thimbu ngwe njinathsi ngechi mwa vamo vaje vapwile vavuthamba vange vaka-kulwa. Myaka injinapangela Yehova ikeyo inapu ya kuvwahelela manene mu kuyoya kwange.”
KETHI MUTHZEYE
Vika vitunapande kulinga omwo tuvandamena kunyonga kwa kano kaye kakavi? Kethi mwivale ngweni tuli na kulinga chithzango cha Njambi, cho lalo tuli na kuvandamena kukayoya myaka yoshe. “Ngechi vene, kethi tujuke mu kulinga mwamuvwa embwe, omwo nga kutujuka, thimbu ikaija omwo tukateja.” (Ngalatiya 6:8, 9) Yehova ali na kutukwatha. Ngechi tukanyameni na kupanga na ndthzili mangana tukale na vifwa vije vikatukwatha kwovoka “ñavava yakama,” na kutwalelelaho kupangela Yehova mu kuvwahelela.—Kujombolola 7:9, 13, 14; Yakomba 1:2-4.
Twakulahela ngwetu Yehova akavethzikitha kulikoletha kwetu mwafwa athzivuka vituli na kulinga na chithzemo chitukamwetha kuli ikeye na lithzina lyendi. Nga tutwalelelaho kumupangela mu kuvwahelela, cho tukapwa ngwe Ndaviti uje wendekele ngwendi: “Thimbu yoshe Shukulu Kalunga ali muyehi nange mu kunjikwatha, cho na chimo chai chatha kunjithzivitha lyova. Ngechi vene, mbunge yange ivwahelela na kujolela, cho njikakala mwamuvwa kujeneka lyova.”—Myatho 16:8, 9.