CILONGESA 2

Kwendeka Ngwe Uli na Kusimutwiya

Luka 6:45a

SIMPI YAKAMA: Endeka na lijwi lya cisemwa, lije limwesa muulizibila ha ñanda iwendeka na ha banu baje bakutolilila.

Lombela na kulibwaesela mwamubwa. Lombela kuli Yehova akukwase kwaka mana ha muzimbu uwendeka, keti hali yobe babenya. Zibuka bisimpi byakama biushaka kwendeka. Byendeke mu majwi obe, keti kutanda lijwi limo na limo ngwe mubanabisonekela mu mukanda.

Nga unangula kutanda Mbimbiliya, nambe mukanda woshe woshe, co zibuka muzimbu woshe mangana uutande kwa kujeneka kutanuka. Nga utanda majwi abendekele banu bamo, co atande na ntwima, oloni keti mu kukezima.
Endeka kutundilila kwisi ya mbunge. Lihule ngwobe, ‘Bika binjishaka banu bananguke ku ñanda yange?’ Bake mu bisinganyeka. Oku kukukwasa wimane bwino na kupangesa bilyo bya mubila na ku mesho mu ngila ije imwesa ngwayo wabaka mbunge, co wabazema.

Kwendeka mu cisemwa kwaliseze na kwendeka na litangalakazi. Endekesi yobe na majwi aupangesa binapande kumwesa kasingimiko ku muzimbu uuli na kwendeka.
Tala banu bauli na kwendeka nabo. Tala banu bawendeka nabo nga kulinga ngoco kucimwesa ngwabo uli na likamba. Omwo wendeka ñanda yobe, kenga munu umo na umo, kutubakana kwitisa lika mesho ha cibunga coshe.