Muzimbu Muka Waubwa?

1. Muzimbu muka wa waubwa utunda kuli Njambi?

Njambi ashaka banu balikuwe kuyoya hano hasi. Watangele lifuti-libu na byoshe byakalaho mwafwa wazema banu. Ololo anena byuma byabibwa mangana banu balikuwe kuyoya. Akatundisa tuyando twoshe ku banu.​—Tandeni Njelemiya 29:11.

Kukwesi fulumende yasa kutundisako bukenya, mishongo na kutsa. Oloni kuli muzimbu waubwa. Ololo Njambi atundisako bifulumende bya banu na kunena fulumende yendi. Banu ba Njambi bakatumbama mu kwoloka, co wahi akabinja.​—Tandeni Isaya 25:8; 33:24; Ndanyele 2:44.

2. Bika ou muzimbu waubwa unapwila wa seho ano matangwa?

Tuyando tukahwa omwo Njambi akatundisa banu bababi hano hasi. (Zefaniya 2:3) Ebi byuma byabibi bakabitundisako mwaka uka? Lijwi lya Njambi lyendekele laja ha byuma bije bili na kunena tuyando ku banu. Byuma binakulingiwa ano matangwa, bimwesa ngwabyo ololo Njambi atundisako bubi.​—Tandeni 2 Timateo 3:1-5.

3. Bika bitunapande kulinga?

Tunapande kulilongesa bya Njambi mu Lijwi lyendi, Mbimbiliya. Mbimbiliya inapu ngwe mukanda wa kutunda kuli cisemi cetu. Ituleka mwakuyoyela bwino mu simbu ino na byuma bitunapande kulinga mangana kulutwe tuyoye myaka yoshe hano hasi. Bamo kubashaka ngwabo mulilongese Mbimbiliya. Oloni keti mulikele, mwafwa imikwasa mukalikuwe buyoye bwabubwa kulutwe.​—Tandeni Visimo 29:25; Kujombolola 14:6, 7.