Isaki wakele na myaka 40 mwambatele Rabeka. Wamuzemene manene. Mu kwita kwa simbu, bakele na bampasa ba banalume babali.

Munabo wa mukulunu wapwile Isau, wa mwanike wapwile Jakobu. Isau wazemene manene kuya mu shwata, co lalo wazibukile mwamubwa kuyomba. Oloni Jakobu ikeye wazemene kukala hembo.

Ha simbu ije, nga cisemi wa munalume atsa, munendi wa ntwatwa wa munalume bakele na kumwana mutamba wakama wa libu lyendi na bimbongo byendi. Ebi byuma babitumbwile ngwabo buswana. Mu naanga ya Isaki, buswana bwambateselele kutambula bikulaheso byakulahesele Yehova kuli Abrahamu. Isau kakele manene mbunge ku bikulaheso bya Yehova, oloni Jakobu wazibukile ngwendi byapwile bya seho manene.

Litangwa limo, Isau welukile kwimbo oku najuka manene mwafwa wayombele litangwa lya mutunu. Wawanene Jakobu ali na kuteleka byakulya byabibwa, co wendekele ngwendi: ‘Njinatsi njala, njaneko owo makunde a kubenga.’ Jakobu wamukumbulwile ngwendi: ‘Njikwana, oloni tahi njikulahese ngwobe unjana buswana bwobe.’ Co Isau wendekele ngwendi: ‘Buswana bunjikwasa bika? Wasa kubwambata. Yange njitonda byakulya.’ Musinganyeka ngweni byuma byalingile Isau byapwile byabibwa ndi? Embwe. Isau wanesele byuma bya seho manene mwafwa ya lilonga lya makunde.

Isaki mwakulubalele, simbu yetele oni ya kubezikisa munendi wa ntwatwa. Oloni Rabeka wakwasele Jakobu munabo wa mwanike mangana bamubezikise mu mwela wa yayendi. Isau mwazibukile byalingile shongo yendi, walubalele manene, co wayongwele kumutsiya. Isaki na Rabeka bashakele kunyungilila munabo Jakobu, ngeci bamulekele ngwabo: ‘Ya ukakale kuli nyokono Labani, kweta noho Isau akatula matoto.’ Jakobu watolililile bisemi bendi, co watewele mangana obole mwonyo wendi.

Yehova wakulahesele Jakobu ngwendi amunyungilila ngwe mwalingile kuli Abrahamu na Isaki. Jakobu watungile mu Halani, co wambatele na kukala na naanga yakama, co lalo wafukile manene.

Mu kwita kwa simbu, Yehova walekele Jakobu ngwendi: ‘Iluka kwimbo lyobe.’ Ngeci, Jakobu na naanga yendi bakutile bungenzi bwabulaha bwa kwiluka kwimbo lyabo. Mubakele mu ngila, banu bamo bezile kuli Jakobu na kumuleka ngwabo: ‘Isau ali na kwija na banalume 400.’ Jakobu wazibile lyoba mwafwa wasinganyekele ngwendi yayendi akumulinga mwamubi kwambateselela na naanga yendi. Ngeci, walombelele kuli Yehova ngwendi: ‘Njikulomba unjinyungilile kuli ndolome yange.’ Lyamukwabo, Jakobu watuminine Isau bimanga, bimembe, bingombe, tumele na bidonki.

Buje butsiki, Jakobu mwakele likalyendi wamwene kangelo. Uje kangelo washangumukile kulwa nendi. Balwile kweta mutondo. Nameme Jakobu wabetwele, watwaleleleleho kulwa. Co kangelo wendekele ngwendi: ‘Njecele njiye.’ Oloni Jakobu wabyanene. Wendekele ngwendi: “Kunjikwecela kubanga unanjibezikisa.”

Kumamaneselelo uje kangelo wabezikisile Jakobu. Ngeci, Jakobu wazibukile oni ngwendi Yehova kecelela Isau amulinge mwamubi.

Uje bene mutondo, Jakobu wamwene Isau halako ali na kwija na banalume 400. Jakobu wasezele naanga yendi munima, co walibangele mangana akaliwane na yayendi. Co watsikamene halutwe lwa ndolome yendi bisimbu 7. Isau mwamwene shongo yendi, wamushatukilile na kukamubumbateya. Co boshe babali balilile na kukala mu kwoloka. Musinganyeka ngweni Yehova walizibile bati Jakobu mwalingile byuma bije byanenele kwoloka mukati kendi na Isau?

Kutundaho, Isau welukile kwimbo lyendi, co Jakobu nendi welukile kwimbo lyendi. Jakobu wakele na bana ba banalume 12. Mazina abo apwile Rubeni, Simyoni, Levi, Juda, Dani, Nafutali, Gadi, Asha, Isakale, Zebuloni, Jozefu na Benjamini. Yehova wapangesele Jozefu umo waba bana mu kwobola banu bendi. Kuma muzibuka mwalingilile ngoco ndi? Tuwaneni cikumbululo mu cilongesa cinatako.