Mwasa Kupwa Kabusamba ka Yehova

Yehova ashaka ngwendi mumuzibuke mwamubwa. Mwafwa bika? Mwafwa azibuka ngwendi nga muzibuka bifwa byendi, nomu mwakalingila byuma, nebi byanayongola kumilingila, co mwasa kupwa kabusamba kendi. Kuma mwasa kulikuta busamba na Njambi ndi? (Tandeni Myaso 25:14.) Bika bimunapande kulinga mangana mupwe kabusamba kendi? Mbimbiliya inakumbulula ebi bihula. Co lalo inamwesa byuma bimwesa ngwabyo kulikuta busamba na Yehova kukekwo kwa seho manene.

1. Yehova ashaka ngwendi mulinge bika?

‘Shwenyeni kuyehi na Njambi, co na ikeye lalo ashwenya kuyehi neni.’ (Yakomba 4:8) Awa majwi alumbununa bika? Yehova ashaka ngwendi mupwe kabusamba kendi. Banu bamo bakasinganyeka ngwabo kubasa kulikuta busamba na Njambi mwafwa kubasa kumumona. Oloni Mbimbiliya ije yapwa Lijwi lyendi, inamwesa bifwa byakala nabyo bije bitunapande kuzibuka mangana tulikute busamba nendi. Nga tutanda-tanda Mbimbiliya, co busamba bwetu na Yehova bukanyama nameme kutwasa kumumona.

2. Mwafwa bika Yehova wapwa Kabusamba wamubwa manene?

Wahi wamizema manene ngwe mwamizemena Yehova. Ashaka ngwendi mupwe ba kubwahelela, co hoshe hamutondela bukwasi, mwasa kulombela kuli ikeye. ‘Akeni bukalu bweni bwoshe hali ikeye mwafwa wamyaka mbunge.’ (1 Petulu 5:7) Simbu yoshe, Yehova nalibwahesela kutolilila kuli babusamba bendi na kubazembeleka na kubakwasa.—Tandeni Myaso 94:18, 19.

3. Bika bitunapande kulinga mangana tupwe babusamba ba Yehova?

Yehova wazema banu boshe. Oloni, ‘wapwa kabusamba ka baka-busunga.’ (Visimo 3:32) Yehova ashaka ngwendi babusamba bendi balinge byuma byamona ngwendi byabibwa. Kashaka ngwendi balinge byuma byamona ngwendi byabibi. Banu bamo bakasinganyeka ngwabo kubasa kulinga byuma byatonda Yehova kwa kujeneka kulinga byuma byabibi. Oloni Yehova akatuzibisisa. Munu woshe-woshe uje azema Yehova kutundilila kwisi ya mbunge na kulinga mwoshe mwasela mangana amuzibise kubwaha, asa kupwa kabusamba kendi.—Myaso 147:11; Vilinga 10:34, 35.

TONDESESENI

4. Abilahama wapwile kabusamba ka Yehova

Ñanda ya mu Mbimbiliya ya Abilahama uje ibatumbwile lalo ngwabo Abilama itumwesako byalibungila mu kulikuta busamba na Njambi. Tandeni bya Abilahama ku Kushangumuka 12:1-4, na kusimutwiya ha bihula binatako:

• Yehova walekele Abilahama ngwendi alinge bika?

• Bika byamukulahesele Yehova?

• Co Abilahama walingile bika?

5. Yehova ashaka ngwendi babusamba bendi balinge bika?

Kuli byuma bitukashaka ngwetu babusamba betu balinge na bije kutwesi kushaka ngwetu balinge.

• Mukashaka ngweni babusamba beni bamilingile bika?

Tandeni 1 Yowano 5:3, na kusimutwiya ha cihula cinatako:

• Yehova ashaka ngwendi babusamba bendi balinge bika?

Nga tutengulula futisi yetu yaibi na kukala na bilinga byabibwa, co tumwesa ngwetu tuli na kwononoka Yehova. Tandeni Isaya 48:17, 18, na kusimutwiya ha cihula cinatako:

• Mwafwa bika Yehova akaleke babusamba bendi ngwendi batengulule futisi yabo yaibi?

6. Yehova akakwasa bati babusamba bendi?

VIDIO: Yehova Nanjikwasa Manene (3:20)

• Yehova wakwasele bati munakazi ali omu mu vidio akolese nameme wakele mu bishoti?

Tandeni Isaya 41:10, 13, na kusimutwiya ha bihula binatako:

• Yehova nakulahesa bika babusamba bendi?

• Mumona bati, kuma Yehova asa kupwa kabusamba wamubwa ndi? Mwafwa bika?

7. Babusamba ba Yehova bakasimutwiya nendi

Kusimutwiya na Yehova kukanyamesa busamba bwetu nendi. Tandeni Myaso 86:6, 11, na kusimutwiya ha bihula binatako:

• Twasa kwendeka bati na Yehova?

• Yehova asa kwendeka bati netu?

SIMPI YAKAMA

Yehova ashaka ngwendi mupwe kabusamba kendi, co amikwasa mangana mushwenye kuyehi nendi.

Kwitulukamo

• Yehova akakwasa bati babusamba bendi?

• Mwafwa bika Yehova akaleke babusamba bendi ngwendi batengulule futisi yabo yaibi?

• Mumona bati, kuma kwakukalu kupwa kabusamba ka Yehova ndi? Mwafwa bika?

WANENI BIKWABO

Kulikuta busamba na Njambi kumikwasa bati?

“Banu Banapande Kuzibuka Yehova Njambi” (Kaposhi ka Kukengela ka February 15, 2003)

Tandeni biñanda bije bimikwasa mupwe kabusamba ka Njambi.

“Njasa Kupwa Bati Kabusamba ka Njambi?” (Bikumbululo ku Bihula Bibakehula Babaha, Volyumu 2, capita 35)

Tandeni biñanda bimwesa byuma byalingisile munakazi umo endeke ngwendi kulikuta busamba na Yehova kunamukwasa.

“Njatewele Manene Kutsa” (Kaposhi ka Kukengela ka Na. 1 2017)

Zibeni bibanendeka bakwenje na bambanda bamo mu kushangazala Yehova.

Bika Byalibungila mu Kupwa Kabusamba ka Njambi? (1:46)