KAYE KANASHULU NA BYUMA BYABIBI

3 | Likwatasaneni na Babusamba na Babushoko Bweni

BIKWAPWILA KWA SEHO

Banu babangi bakalishoshomwena manene mubakaliwana na bukalu bumo, co bakazeyesa nambe kutsiya busamba nambe bushoko bwabo kwa kujeneka kunanguka.

Bamo kubesi kusimutwiya na babusamba na babushoko bwabo nambe kukala hamo nabo.
Baje bali mu bulo bakalicokota kushwa kumo.
Bisemi kubesi kwaka mbunge ku bukalu bwa bana babo.

Bimunapande Kuzibuka

Babusamba basa kutukwasa tupwe ba kulikangula na kutulingisa tukolese mu simbu yaikalu.
Bishoti bikaija mwafwa ya bukalu bumo byasa kuzeyesa likwatasano linasa kukala mu naanga.
Mizimbu imo yaibi yasa kuzeyesa manene bana beni.

Bimwasa Kulinga

Mbimbiliya ngwayo: ‘Babusamba bamwesa cizemo cabo simbu yoshe, babushoko banasemukila kumwena hamo tuyando.’—Visimo 17:17.

Babusamba bababwa basa kutukwasa nambe kutunangulako ha byuma bimo bije byasa kutukwasa. Co kuzibuka ngweni kuli umo wamyaka mbunge kwasa kumitakamesa na kumilingisa mukolese mu bukalu bumunasa kuliwana nabwo.

BIKA BYASA KUMIKWASA?—Bimwasa Kulinga

Nga mwaliwana na bukalu bumo bwakama, kulinga ebi byuma kumilingisa mulikwatasane na babusamba na babushoko bweni

KANYAMESENI BULO BWENI

Kanyameseni bulo bweni

Mbimbiliya ngwayo: “Banu babali bapwa bababwa kutubakana munu umo . . . Nga umo wabo awila hasi, co mukwabo asa kumukwasa na kumwindula.” (Muka-kwambulula 4:9, 10) Baje bali mu bulo banapande kulikwatasana ngwe muka-kwendesa fulai na mukwasi wendi, keti ngwe baka-kwendesa bifulai baje balilwisa.

Lingeni mwoshe mumwasela kujeneka kulitulila matoto mwafwa ya bukalu bumuli na kuliwana nabwo. Kwateni mbunge.
Simutwiyeni ha bukalu bwoshe-bwoshe bumuli na kuliwana nabwo, nameme lumo mu calumingo. Waneni mumwasa kutepulwila obwo bukalu nambe kubumanesa, keti kulinazeka minye.
Waneniko simbu ya kulinga byuma bimwashaka mubaboshe.
Singanyekeseseni ha byuma byabibwa bimwalingilile hamo. Cakumwenako, mwasa kukenga bikupulo bya ha cilika ceni ca bulo nambe kulyanukisa byuma byeka.

“Baje bali mu bulo banasa kujeneka kulitombola ha byuma bimo, oloni anga basa kupangela hamo. Basa kwangwila hamo byakulinga na kupangela hamo mu kubishulisilila.”—David.

KANYAMESENI BUSAMBA BWENI

Kanyameseni busamba bweni

Keti mubandamene lika ngweni bakweni bamikwase, neni waneniko bingila bimwasa kukwaselamo bakweni. Kutakamesa bakweni neni kumitakamesa.
Esekeni kusimutwiya na babusamba beni bamo ha litangwa na litangwa mangana muzibuke mubili na kubendela byuma.
Ihuleni babusamba beni bamileke binabakwasa bakolese mu bukalu bubanaliwana nabwo bwa kulifwa nobu bumunaliwana nabwo.

“Nga twaliwana na bukalu bwakama, tunasa kujeneka kuzibuka mwamubwa byakulinga. Oloni babusamba banasa kutukwasa kwangula mwamubwa byakulinga. Banasa kutwanukisa nameme byuma bituzibuka laja. Babusamba betu batwaka mbunge, co netu tunapande kubaka mbunge.”—Nicole.

AKENI MBUNGE BANA BENI

Akeni mbunge bana beni

Mbimbiliya ngwayo: “Munu woshe napande kuzambula kuziba, oloni eshwale kukumbulula.” (Yakomba 1:19) Bana beni banasa kupwa ba kujeneka kuzituka kumileka bukalu bwabo nambe mubali na kulizibila, oloni nga mubatolilila mwamubwa, co bazituka kulinga ngoco.

Lingeni mwoshe mumwasela kukwasa bana beni bazituke kumileka mubali na kulizibila. Bamo banasa kuzituka kusimutwiya na bisemi babo nga bali na kulingako bimo nabo kutubakana nga banatumbama lika.
Moneni ngweni bana beni kubatolilila, kutanda nambe kukenga manene mizimbu yaibi.
Lekeni bana beni byuma bimunayongola kulinga mu kushaka kunyungilila naanga.
Libwaheseleni byakulinga nga kusholoka bukalu bwa cishitukila, co esekeni kubilinga hamo na bana beni.

“Simutwiyeni na bana beni na kubatabesa kwendeka biyongola byabo. Nga kumulingi ngoco, banasa kujeneka kumileka bukalu bubanaliwana nabwo nambe byuma bili ku mbunge yabo. Balekeni ngweni neni mukalizibi ngoco mumukaliwana na bukalu na kubaleka bikamikwasa.”—Bethany.