Mwafwa Bika Banu Kubesi na Kusingimika Bakwabo?

BIKA KWAPWILA KWA SEHO KUSINGIMIKA BAKWETU?

Kusingimika bakwetu kulingisa bukalu bujeneke kulibwezelela.

Cisimo cimo ca mu Mbimbiliya ngwaco: “Kukumbulula mu kuwa mbunge kwolwesa butenu, oloni majwi amabi alingisa munu alubale.” (Provebia 15:1) Majwi na bilinga bya kujeneka kasingimiko bikalingisa bukalu bulibwezelele, co kakangi ebi byuma bikanene bukalu bwakama.
Yesu wendekele ngwendi: “Kanwa kakendeka byuma binashulu mu mbunge.” (Mateu 12:34) Kujeneka kusingimika bakwetu kunasa kumwesa mutwamwena banu ba mubala weka, ndaka yeka, nambe baje batunda ku lifuti lyeka na cisemwa ceka.

Mu myaka ineti, baka-kutondesesa banawana ngwabo banu bakutubakana 32,000 ba mu mafuti 28, banendekele ngwabo kujeneka kukala na kasingimiko kuli na kutwalelelaho kulibwezelela manene.

MWASA KUSINGIMIKA BATI BAKWENI?

Munapande kusingimika banu boshe ipwe ku sikola nambe ku bipangi nameme kumulitombola na biyongola byabo. Nangukeni byuma bimwasa kulitombola na bakweni. Kulinga ngoco kumikwasa mangana keti mubasompe.

“Likeleni kusompa bakweni mangana neni keti bamisompe.”—Mateu 7:1.

Lingeni bakweni ngwe mumushakela ngweni bamilinge. Nga muzibila bakweni ngozi na kubalinga mwamubwa, nabo bamilinga mwamubwa.

“Mumushakela ngweni bakweni bamilinge, neni balingenimo.”—Luka 6:31.

Pweni baka-kukonekela. Nga bakweni bamilinga mwamubi nambe kumyendeka mwamubi, keti muzambwile kusinganyeka ngweni banalingila shakelo.

“Kuzibisisa kulingisa munu atepulule butenu bwendi, co kunapu kwakubwa kuli ikeye kujeneka kwaka mbunge ku mulonga.”—Provebia 19:11.

Mu Njibo ya Bumwene ya Bakaleho ba Yehova simbu kanda biwano bishangumuke. Banu ba bisemwa na myaka ya kulisezaseza bali na kulimeneka na nzazu na kusimutwiya.

BITULI NA KULINGA

Bakaleho ba Yehova bali na kukwasa banu ba mu bitingitingi byabo na babakapanga nabo kusingimika bakwabo.

Tukalilongesa na banu Mbimbiliya kwa kujeneka kubafwetasa, co kutwesi kusindiya bakwetu bakulahele byuma bitwakulahela nambe kubasindiya batabe biyongola byetu. Oloni omwo tukambulula muzimbu waubwa, tukapangesa cinangulo ca mu Mbimbiliya cije cendeka ngwabo: “Lingeni ngoco mu kuwa mbunge na kasingimiko kakama.”—1 Pita 3:15; 2 Timothi 2:24.

Kutwesi kuzinda bakwetu, co ku biwano byetu tukakunguluka na banu ba miyati ya kuliseza-seza baje bashaka kulilongesa Mbimbiliya. Tukalifwiti kwecelela tupenga twa bakwetu na ‘kusingimika banu boshe.’—1 Pita 2:17.

Tukasingimika bifulumende bya mu mafuti mutwakala. (Loma 13:1) Tukononoka mashiko na kufweta mitelo. Co kutwesi kulikobelesa mu biñanda bya bupolitiki, nameme ngoco, tukasingimika biyongola bya bakwetu ha biñanda bya cifwa eci.